Иона
4 Ио́на уи даараӡа игәамԥхаӡеит азы, иԥсахы еибакын, 2 Иегова иҳәара далагеит: «Иегова, сара сыдгьыл аҿы саныҟазгьы издыруан убас ишыҟалоз, убри азоуп Тарши́шҟа сыбналаны сцарц зысыӡбаз, избанзар сара издыруан уара згәы ҳалалу*, арыцҳашьареи ачҳареи злоу, бзиабарала* иҭәу, ауаа арыцҳара иақәзыршәар зҭахым Анцәа шуакәу. 3 Уажәшьҭа, Иегова, суҳәоит, исымх сыԥсҭазаара, сыԥсы ҭазар аасҭа, сыԥсыр еиҳа еиӷьуп».
4 Иегова Ио́на ус диазҵааит: «Угәы ахьыԥжәаз иашоуп ҳәа угәы иаанагома?»
5 Уи ашьҭахь Ио́на ақалақь далҵны дцан, мрагыларатәи аганахь ала ақалақь аҿаԥхьа днатәеит. Уа иара ашәшьыра изҭоз ахыҵакырҭа иргылан, ақалақь иахьуа ибарц азы дныҵатәеит. 6 Усҟан Анцәа Иегова амҟәыба еизирҳаит, Ио́на иханы ашәшьыра ҟаларц, иԥсгьы еивигарц азы. Ио́на уи амҟәыба даараӡа деигәырӷьеит.
7 Аха адырҩаҽны ашамҭазы Анцәа ду ахәаҷа ааишьҭын, амҟәыба ҵнафааит, иаргьы ҩеит. 8 Амра ангыла, Анцәа мрагыларантәи зегь ықәыццышәаа иқәызҵоз ишыз аԥша ааишьҭит. Ио́на амра ихы иасын, иԥсы маҷхарц ак ааигымхеит. Иара аԥсра даҳәо, абас иҳәон: «Сыԥсы ҭазар аасҭа, сыԥсыр еиҳа еиӷьуп».
9 Анцәа Ио́на диазҵааит: «Амҟәыба азы абас угәы ахьыԥжәаз иашоуп ҳәа угәы иаанагома?»
Ио́на иҳәеит: «Ааи, иашоуп, убраанӡа сгәы ԥжәаны сыҟоуп, аԥсра сҭахуп». 10 Аха Иегова иҳәеит: «Уара еиҭоумҳаз, еизумырҳаз, уахыкала изызҳаз, уахык алагьы иҩаз амҟәыба рыцҳаушьеит. 11 Нас, сара ацәгьеи абзиеи ззеиҩымдыраауа* 120 000-ҩык инареиҳаны ауаа ахьынхо, аԥстәқәагьы ахьырацәоу ақалақь ду Нине́виа рыцҳасшьар акәӡамзи?»