Аԥхьаҩцәа рызҵаарақәа

Дызусҭада Исаиа 60:1 аҿы «аԥҳәыс» ҳәа зыӡбахә ҳәоу, насгьы ҵакыс ирымоузеи ажәақәа «бгыл», «блашала»?

Исаиа 60:1 аҿы иануп: «Бгыл аԥҳәыс, блашала, избанзар былашара каҷҷеит. Иегова ихьӡ-иԥша бара барлашоит». Аконтекст излаҳнарбо ала, «аԥҳәыс» ҳәа ара зыӡбахә ҳәоу уи аамҭазы Иудеиа аҳҭнықалақьс иҟаз Сион, ма Иерусалим, ауп (Ис. 60:14; 62:1, 2)a. Ари ажәеинраалаҿы Иерусалим израильтәи ажәлар зегь аанарԥшуеит. Ицәырҵуеит ҩ-зҵаарак. Актәи, ианбагылеи, насгьы ишԥагылеи Иерусалим, илашо ианбалагеи, насгьы ишԥалагеи? Аҩбатәи, иамоума уи аԥааимбаражәа еиҳау даҽа наӡашьак?

Ианбагылеи, насгьы ишԥагылеи Иерусалим, илашо ианбалагеи, насгьы ишԥалагеи? 70 шықәса рыҩныҵҟа ауриацәа вавилонаа итҟәаны ирыман. Урҭ ашықәсқәа раан Иерусалими аныҳәарҭеи ԥыххааса еилажьын. Аха мидааи персааи Вавилон анырга, израильаа рыԥсадгьыл ахь ахынҳәреи ииашоу амҵахырхәара аиҭашьақәыргылареи азин рырҭеит (Езд. 1:1—4). 537 шықәсазы ҳ. ҟ.12 биԥара ирыҵанакуаз Анцәа изиашаз имаҵзуҩцәа Иерусалимҟа ихынҳәит (Ис. 60:4). Дара Иегова акәырбанқәа изнагареи аныҳәақәа азгәаҭареи иалагеит, аныҳәарҭа аиҭашьақәыргыларагьы рҽазыркит (Езд. 3:1—4, 7—11; 6:16—22). Убасала Иегова ихьӡ-иԥша дырҩегь Иерусалим, даҽакала иуҳәозар, Анцәа ижәлар, арлашо иалагеит. Уи ажәлар ракәзар, Иегова дыззымдыруаз, адоуҳатә лашьцара иҵаз ажәларқәа рзы илашарбагахеит.

Аха уи аамҭазы Исаиа иԥааимбаражәа аҵыхәтәанынӡа имнаӡаӡеит, избанзар израильаа реиҳараҩык Анцәа изыӡырҩра иаҟәыҵит (Неем. 13:27; Мал. 1:6—8; 2:13, 14; Матф. 15:7—9). Ԥыҭрак ашьҭахь дара Мессиагьы — Иисус Христос — мап ицәыркит (Матф. 27:1, 2). Аҵыхәтәаны, 70 шықәсазы ҳ. ҳ. аан Иерусалими уа иҟаз аныҳәарҭеи аҩынтәраан ихырбгалан.

Иегова ус шыҟалоз заа иҳәахьан (Дан. 9:24—27). Ус анакәха, Иегова Исаиа 60-тәи ахаҿы зыӡбахә ҳәоу аиҭашьақәыргылара иазку аԥааимбаражәақәа адгьыл аҿы иҟаз Иерусалим инадҳәаланы аҵыхәтәанынӡа инаӡарц акәӡамызт ииҭахыз. Уи акәӡамызт гәҭакыс имаз.

Иамоума ари аԥааимбаражәа еиҳау даҽа наӡашьак? Ааи, аха уи зыдҳәалоу асимволтә ҵакы змоу даҽа ԥҳәыск лоуп — «хыхь иҟоу Иерусалим». Апостол Павел уи иазкны иҳәеит: «Уи ҳан ауп» (Гал. 4:26). Хыхь иҟоу Иерусалим — уи Анцәа изиашоу адоуҳатә шамҭақәа рыла ишьақәгылоу Иегова иорганизациа жәҩантәи ахәҭа ауп, лара лхәыҷқәа — Иисуси доуҳала иалху 144 000-ҩык ақьырсианцәеи роуп. Даргьы, Павел иеиԥш, ажәҩан аҿы инхалоит. Иԥшьоу адоуҳала иалху ақьырсианцәа «иԥшьоу ажәлар» роуп — «Анцәа иитәу Израиль» (1 Пиотр 2:9; Гал. 6:16).

Ишԥагылеи, насгьы илашо ишԥалагеи хыхь иҟоу Иерусалим? Игылаз, насгьы илашо иалагаз иара ахәыҷқәа роуп — адгьыл аҿы инхо иԥшьоу адоуҳала иалху ақьырсианцәа. Шәааи еиҿҳарԥшып Исаиа 60-тәи ахаҿы иану аԥааимбаражәеи урҭ рҭоурыхи.

Избан доуҳала иалху ақьырсианцәа гылар зрыхәҭаз? II ашәышықәсазы ҳ. ҳ. аан аҵабырг иацәхьаҵыз аҳаскьын бааԥс еиԥш ирацәахеит азы, иԥшьоу адоуҳала иалхыз ақьырсианцәа адоуҳатә лашьцара иҵахеит (Матф. 13:37—43). Убасала дара Вавилон Ду атҟәара, даҽакала иуҳәозар, амцдинхараҵара аимпериа атҟәара, иақәшәеит. Дара «адунеи аҵыхәтәантәи амшқәа» ҳәа зыӡбахә ҳәоу аамҭақәа рҟынӡа итҟәаны иҟан (Матф. 13:39, 40). Уи апериод алагеит 1914 шықәсазы. 1919 шықәсазы иԥшьоу адоуҳала иалху ақьырсианцәа ахақәиҭра роуит, иаразнакгьы илашо иалагеит, даҽакала иуҳәозар, гәацԥыҳәарала Аҳра иазку ажәабжь бзиа ауаа рыларҵәара иалагеитb. Убри нахыс ажәларқәа зегь рҟынтә ауаа адоуҳатә лашарахь еихо иалагеит. Урҭ рыбжьара иҟоуп Анцәа иитәу Израиль аҟынтә адгьыл аҿы иаанхаз, Исаиа 60:3 аҿы зыӡбахә ану аҳцәагьы (Аат. 5:9, 10).

Ҳаԥхьаҟа доуҳала иалху ақьырсианцәа Анцәа илашара еиҳагьы идырлашалоит. Дара адгьыл аҿы рыԥсҭазаара хыркәшаны, ажәҩан аҿы рыԥсы анҭалалак, «Иерусалим ҿыц», мамзаргьы 144 000-ҩык аҳцәеи аԥшьаҩцәеи рыла ишьақәгылоу Христос иҭаца, ракәхоит (Аат. 14:1; 21:1, 2, 24; 22:3—5).

Исаиа 60:1 иану аԥааимбаражәа анаӡараҿы Иерусалим ҿыц ихадоу ароль азалхуп. (Иаҿшәырԥш Исаиа 60:1, 3, 5, 11, 19, 20 Аатра 21:2, 9—11, 22—26.) Иерусалим — ажәытәан израильтәи аҳ аҳра ахьынтәиуаз қалақьын, убас еиԥш Иерусалим ҿыцгьы адунеи ҿыц аҿы Христос аҳра ицзуло напхгарахоит. Ишԥеилкаатәу Иерусалим ҿыц «ажәҩан аҟынтә, Анцәа иҟынтә [илбаауеит]» ҳәа иҳәоу ажәақәа? Уи иаанагоит доуҳала иалху Христос иашьцәа адгьыл аҿы инхало ауаа ишрыцхраало. Иерусалим ҿыц алашара Анцәа ҳаҭыр ду иқәызҵало ауаа «рымҩа арлашалоит». Дара агәнаҳаи аԥсреи рҟынтә ахақәиҭра роуеит (Аат. 21:3, 4, 24). Убасала аԥааимбар Исаиеи егьырҭ аԥааимбарцәеи ишырҳәоз еиԥш, Анцәа зегь еиҭашьақәиргылоит (Аус. 3:21). Уи аиҭашьақәыргылара дуӡӡа алагеит Иисус Аҳас даныҟала, иагьынҵәоит Зқьышықәсатәи инапхгара ахыркәшамҭазы.