Иов Анцәа гәык-ԥсыкала дизыҟоуп

ДРЫЦҲАУШЬОМА ари ахаҵа чмазаҩы? Уи Иов ихьӡуп, ари аԥҳәыс — иара иԥшәма лоуп. Иудыруама, уи Иов иалҳәаз? ‘Анцәа дшәиины уԥсы’. Уааи, еилаҳкаап, уи ус зылҳәази Иов абысҟак дызгәаҟуеи.

Гәык-ԥсыкала иҟаз, Анцәагьы изыӡырҩуаз уаҩын Иов. Уи Уц адгьылаҿы дынхон, Ханаан азааигәара. Иегова Иов даара бзиа дибон, аха уи дызцәымӷызгьы аӡәы дыҟан. Уи дызусҭоу удыруама?

Аҩсҭаа Аџьныш. Иугәалашәома, Аҩсҭаа — ари Иегова дызцәымӷыу амаалықь бааԥс иоуп. Уи илшеит Адами Евеи Иегова иҳәатәы харымҵартә рыгәҭасра. Уи игәы иаанагон, Иегова ауаа зегьы изымӡырҩуа рыҟаҵара илшоит ҳәа. Аха уи аҩыза иқәманшәалахама иара? Мап. Уазхәыци, гәык-ԥсыкала иҟаз, шаҟаҩы ахацәеи аҳәсеи ҳрабадырхьоу. Урҭ рахьынтә зыхьӡ уҳәарц улшода?

Иакови Иосифи Мсыр ианԥсы ашьҭахь, адгьылаҿы зегь реиҳа гәык-ԥсыкала иҟаз Иов иакәын. Иегова иҭахын Аҩсҭаа идырырц, уи зегь уаа цәгьақәаны рыҟаҵара шилымшоз, убри аҟнытә уи Аҩсҭаа иеиҳәоит: ‘Уихәаԥши Иов. Игәаҭи, уи сара гәык-ԥсыкала дшысзыҟоу’.

— Уи уара гәык-ԥсыкала дузыҟоуп,— наиҿаирхьит Аҩсҭаа,— избанзар уи уара уиқәныҳәоит, амалгьы рацәаны имоуп азы. Аха имхи амал, ушишәиуа убап.

Убасҟан Иегова иҳәеит: ‘Нас, уаалаган иԥышәа ухы. Имх имал. Иаауҭахыу зегь изуы Иов. Сишәиуазар аабап. Аха идырны иумаз: думшьыроуп иара’.

Раԥхьа Аҩсҭаа Иов ижәқәеи имахҽқәеи ауаа ирӷьычратә иҟаиҵеит, нас иуасақәа ықәихит. Уи ашьҭахь ԥшатлакәла ишьит 10-ҩык Иов иԥацәеи иԥҳацәеи, анаҩсгьы Иов абри еиԥш иҟоу ачымазара бааԥсы иирхьит. Иов даара дгәаҟуан. Убри азоуп иԥҳәысгьы изиалҳәа: ‘Анцәа дшәиины уԥсы’. Аха Иов ус аҟаҵара иҭахымхеит. Уи адагьы, уи иахь инеит х-ҩык гәыкала изыҟамыз аҩызцәа, уаанӡа иҽеимкәа ухы мҩаԥугон ҳәагьы иарҳәеит. Аха убасҟангьы Иов гәык-ԥсыкала дшыҟаз даанхеит.

Иегова уи даара диеигәырӷьон, асахьаҿы ишубо еиԥшгьы, анаҩс уи Иов диқәныҳәеит. Уи ичымазара далиргеит. Иов ихылҵит даҽа 10-ҩык ахшаара ссирқәа. Ажәқәеи, ауасақәеи, амахҽқәеи уаанӡа аасҭа ҩынтә еиҳаны иоуит.

Иов иеиԥш, уаргьы Иегова гәык-ԥсыкала уизыҟазаауама еснагь? Ус анакәха, Иегова уаргьы убасҵәҟьа дуқәныҳәоит. Уаргьы иулшоит наӡаӡа анхара, адгьыл зегьы, Едемтәи абаҳча еиԥшҵәҟьа, иссирӡаны ианыҟало.