Анцәа Давид далихуеит

ИУБОУМА, араҟа иҟалаз? Аҷкәын асыс хәыҷы амшә иацәихьчеит. Амшә асыс хәыҷы агеит, иафаргьы аҭахын. Аха аҷкәын уи дашьҭалан, асыс амшә иаҿыҵихит. Амшәгьы ашьҭахьтәи ашьапқәа ианрықәгыла, аҷкәын уи ааникылан, ишьны инкаижьит! Даҽазных уи асыс алым иамихит. Шаҟа дыҷкәына гәымшәоузеи, ииашаӡами? Иудыруама, уи дызусҭоу?

Ари иқәыԥшу Давид иоуп. Уи Вифлеем ақалақь аҟны дынхоит. Уи иабду Овид, Руфи Воози рԥа иоуп. Иугәалашәома, урҭ зусҭцәаз? Уи иаб Иессеи иоуп. Давид иаб иуасақәа дырхылаԥшуеит. Иегова Саул аҳас далихиижьҭеи 10 шықәса ашьҭахь диит уи.

Иааит аамҭа, Иеговагьы Самуил идиҵоит: ‘Ахәша ҷыда аашьҭыхны Вифлеем, Иессеи иҩны ахь уца. Иҷкәынцәа руаӡәк Сара аҳас далсхит’. Самуил Иессеи иԥа еиҳабы Елиав даниба, игәаныла дазхәыцит: ‘Ари иакәзар ҟалап Иегова иалихыз’. Аха Иегова иҳәеит: ‘Иоуреи иԥшӡареи уамыхәаԥшын. Уи аҳас далсымхӡеит Сара’.

Усҟан Иессеи иҷкәын Аминадав диԥхьоит, Самуил иахьгьы дааигоит. Аха Самуил иҳәоит: ‘Мап, уи иакәӡам Иегова иалихыз’. Иессеи иҷкәын Самма дааигоит. ‘Мап, уи иакәӡам Иегова иалихыз’,— иҳәоит Самуил. Иессеи иҷкәынцәа рыбыжьҩык аӡәаӡәала инеигоит Самуил иахь, аха Иегова аӡәгьы далимхит. ‘Ара уԥацәа зегьы ыҟоума?’ — дҵааит Самуил.

— Даҽаӡәы дыҟоуп — зегь иреиҵӡоу,— иҳәеит Иессеи.— Аха уажәы иара дыҟаӡам, ауасақәа дырхылаԥшуеит.— Самуил иахь дааргоит зҭеиҭԥш ссирыз аҷкәын — уи ихьӡуп Давид. ‘Ари иара иоуп,— иҳәоит Иегова.— Ахәша ихьшьы’. Самуил убас иагьыҟаиҵоит. Аха Давид аҳас дҟалаанӡа, ԥыҭраамҭак цоит.