Изеиԥшразеи аԥсҭазаара Џьанаҭ аҟны?

Иегова Адами Евеи абзиарақәа рацәаны ирзыҟаиҵеит. Аҟазаара 1:28

Иегова дишеит раԥхьатәи аԥҳәыс Ева, нас Адам ԥҳәысс дииҭеит (Марк иҟнытә 10:6, 7).

Иегова ишеит ауаа грак рымамкәа, хшыҩлеи цәеижьлеи инаӡаны.

Дара ҩныс ирыман иџьашьахәыз, иԥшӡаз Едемтә баҳча. Уи Џьанаҭҵәҟьан. Уаҟа ииасуан аӡиас, ирызҳауан ашәырҵлақәа, насгьы иҟан еиуеиԥшым аԥстәқәа.

Иегова урҭ драцәажәон, насгьы адырра риҭон. Иара изыӡырҩлозҭгьы, наӡаӡа Џьанаҭ дгьылаҿы инхалон.

Анцәа ҵлак аҟынтә ашәыр афара азин риимҭаӡеит. Аҟазаара 2:16, 17

Иегова Адами Евеи идирбеит абаҳчаҿы шәырҵлак, насгьы иреиҳәеит уи ашәырқәа рфар, ишыԥсуа.

Маалықьк Анцәа диҿагылеит. Ари ицәгьоу амаалықь Аҩсҭаа Аџьныш иоуп.

Аҩсҭаа иҭахӡамызт Адами Евеи Иегова иҳәатәы харҵаларц. Убри аҟынтә иара амаҭ ихы иархәаны Ева илеиҳәеит, аҵла аҟынтә ашәыр лфар, лара дшымԥсуа, аха Анцәа иеиԥш дшыҟало. Ҳәарада, ари мцын (Аҟазаара 3:1—5; 1 Тимофеи иахь 2:14).