Урҭ Иисус иӡбахә рыҩуан

Иубома ари асахьаҿы иану ауаа?~ Арҭ Матфе́и, Марк, Лука́, Иоа́нн, Пио́тр, Иа́ков, Иу́да, Па́вел роуп. Арҭ ахацәа Иисуси дареи аамҭак азы еицынхон, насгьы дара уи иԥсҭазаара атәы рҩит. Уааи урҭ ирызку еиҳа еилаҳкаап.

Урҭ рахьынтәи х-ҩык апостолцәан, Иисус ажәабжь ицырҳәон. Иузҳәома уара урҭ рыхьӡқәа?~ Арҭ Матфеи, Иоанни Пиотри роуп. Апостолцәа Матфеи Иоанни Иисус ибзианы дырдыруан, рҩыџьагьы уи иԥсҭазаара атәы рышәҟәқәа ирнырҵеит. Апостол Иоанн иара убас иҩит ашәҟәы Аатра, насгьы асаламшәҟәқәа хԥа: Актәи Иоанн, Аҩбатәи Иоанн, Ахԥатәи Иоанн. Апостол Пиотргьы иҩит Актәи Пиотр, насгьы Аҩбатәи Пиотр захьӡу асаламшәҟәқәа ҩба. Урҭгьы Абиблиаҿы иануп. Пиотр аҩбатәи исаламшәҟәы аҟны ҳара иаҳбоит Иегова ажәҩан аҟынтәи Иисус изы абарҭ рҩызцәа ажәақәа шиҳәаз: «Ари сара бзиа избо сԥа иоуп. Уи сара сиргәырӷьоит!»

Асахьаҿы иубо егьырҭ ауаагьы рышәҟәқәа рҿы Иисус иӡбахә еиҭарҳәеит. Урҭ руаӡәк Марк ихьӡын. Иҟалап иара ихаҭа ибазаргьы Иисус дшыркыз. Егьи Лука ихьӡын. Уи дҳақьымын, насгьы иҟалап уи дқьырсианхазар Иисус данԥсы ашьҭахь.

Иисус иӡбахә зыҩуаз егьырҭ ҩыџьа ахацәа иашьцәа еиҵбацәа ракәын. Иудыруама урҭ ирыхьӡыз?~ Урҭ ирыхьӡын Иакови Иудеи. Раԥхьа дара Иисус игәра ргаӡомызт. Уи ихы еилагеит ҳәа ргәы иаанагон. Аха нас игәра рго иалагеит, насгьы иқьырсианцәахеит.

Аҵыхәтәаны ари асахьаҿы иубо ауаҩы Павел иоуп. Иара дқьырсианхаанӡа Савл ихьӡын. Уи ақьырсианцәа ицәымӷын, ацәгьарақәа рзиуан. Иудыруама уара Павел дызқьырсианхаз?~ Ҽнак зны Павел Дамаскҟа дышцоз, иаалырҟьаны ажәҩан аҟынтәи бжьык иаҳаит. Ари Иисус ибжьы акәын. Уи Павел диазҵааит: «Избан сыгәра зго ауаа уара абас ицәгьаны узрызныҟәо?» Уи ашьҭахь Павел иҽиԥсахит, насгьы дқьырсианхеит. Павел иҩит Абиблиа иану 14 шәҟәы, асаламшәҟәы Римаа рахь инаркны асаламшәҟәы Ауриацәа рахь аҟынӡа.

Ҳара есҽны Абиблиа ҳаԥхьоит, ус ауми?~ Ҳара Абиблиа ҳанаԥхьо, Иисус иӡбахә акыр еиҳаны еилаҳкаауеит. Иуҭахума уара уи иӡбахә еиҳаны еилукаарц?~