Уҽшԥазыҟауҵо Ахәылԥаз?

Ари ашықәс инаркны Иисус Христос иԥсра агәаларшәара Ахәылԥаз аҽазыҟаҵаразы еиҳа аамҭа ҳауеит. Ахәылԥаз аусура амшқәа ирықәшәозар, аиԥылара «Ҳаԥсҭазаареи ҳмаҵзуреи» уи амчыбжь азы иҟалаӡом. Ахәылԥаз аԥсшьарамш иақәшәозар, ажәахәи «Ахьчаратә бааш» аҵареи уи амчыбжь азы иҟалаӡом. Ҳхы ишԥаҳархәо иҳауз аамҭа? Ҳәарада, ари иҷыдоу ахҭыс ишахәҭоу имҩаԥысырц азы, актәи ашәышықәсазы уи еиҿкааны ишымҩаԥыргоз еиԥш имҩаԥгатәуп (Лука 22:7—13; km-​U 3/15 1). Иара убас ҳара зегьы ҳгәы азыҟаҳҵар ҳахәҭоуп. Ишԥаҟаҵатәу уи?

• Уазхәыц шаҟа ихадоу ари ахҭыс аҿы аҟазаара (1 Кор. 11:23—26).

• Урызхәыц Иеговеи уареи шәеизыҟазаашьақәа зеиԥшроу, насгьы уи анцәаиҳәараҿы изеиҭаҳәа (1 Кор. 11:27—29; 2 Кор. 13:5).

• Урыԥхьа Ахәылԥаз аҵакы уеилзыркаауа абиблиатә жәеинраалақәа, насгьы урҭ урызхәыц (Иоанн 3:16; 15:13).

Шьоукы аброшиура «Есыҽны Аҩыра ҭаҳҵаауеит» аҿы иану аихшанҵа ала Абиблиа иаԥхьоит. Даҽа шьоукы рхы иадырхәоит ари, насгьы анаҩстәи адаҟьаҿы иаагоу аихшанҵа. Егьырҭ Ахьчаратә бааш аҿы иану Ахәылԥаз иазку астатиақәа ирыԥхьоит, насгьы Иеговеи Иисуси ҳара ҳахь иаадырԥшыз абзиабара иазхәыцуеит. Азнеишьақәа еиԥшымзар алшоит. Аха зегь реиҳа ихадоу, уи уара уҭҵаарала Иегова Иԥеи иареи рахь иумоу аизыҟазаашьақәа рырӷәӷәара ауп.