Аԥхьаҩцәа рызҵаарақәа

Ажәамаанақәа 24:16 иануп: «Ииашоу ауаҩы бжьынтәы дкаҳаргьы илшоит, аха уеизгьы дгылоит». Арҭ ажәақәа зҵанакуа зныкымкәа агәнаҳа ҟазҵо, аха нас Анцәа ианажьра зауа иоума?

Мап. Ари ажәеинраалаҿы «акаҳара» иаанаго ауадаҩрақәеи арыцҳарақәеи рықәшәара ауп, «агылара» — урҭ рыхгара ауп.

Шәааи ари ажәеинраала иаԥхьагылоу, насгьы иашьҭагылоу ажәеинраалақәа ирҳәо ҳахәаԥшып: «Иҽеим ауаҩ иеиԥш ауаҩ иаша инхарҭа аҿаԥхьа имҩа кны умтәан, иԥсшьарҭа ҭыԥ уаламкьысын, избанзар ииашоу ауаҩы бжьынтәы дкаҳаргьы илшоит, аха уеизгьы дгылоит, иҽеим ауаа ракәзар арыцҳара аан икаҳауеит. Уаӷа данкаҳауа умгәырӷьалан, дахьышьацәхнысло уамеигәырӷьалан» (Ажәам. 24:15—17).

Шьоукы ргәы иаанагоит 16-тәи ажәеинраалаҿы зыӡбахә ҳәоу агәнаҳа ҟазҵо, аха нас уи иахьхәуа, насгьы ҩаԥхьа Анцәа иразра зауа иоуп ҳәа. Англиа инхо ҩыџьа апапцәа ирҳәеит ажәытәангьы иахьагьы ажәабжьҳәаҩцәа уи ажәеинраала ауаа убас ишреилдыркаауаз. Иара убас дара ирҳәеит уи аилкаара инақәыршәаны «ауаҩ бзиа дкаҳар.., даҽакала иухәозар, агәнаҳа ӷәӷәақәа ҟаиҵар алшоит. Аха иара Анцәа иахь абзиабара ахаангьы ицәыӡӡом, насгьы дгылоит, избанзар игәнаҳақәа дрыхьхәуеит». Ари аҩыза агәаанагара агәнаҳа аҿагылара зҭахым ауаҩы игәаԥхар ҟалоит. Иара агәнаҳа акырынтә иҟаиҵаларгьы, Анцәа уеизгьы ианаижьуеит ҳәа дхәыцлар ауеит.

Аха 16-тәи ажәеинраалаҿы зыӡбахә ҳәоу уи акәӡам.

16-тәи, 17-тәи ажәенраалақәа рҿы «дкаҳаргьы», насгьы «данкаҳауа» ҳәа еиҭагоу ауриатә жәақәа еиуеиԥшым аҭагылазаашьақәа рҿы ухы иаурхәар ауеит. Урҭ ажәақәа ҵакыс ирымоу акаҳараҵәҟьа акәзар ауеит. Иаҳҳәап, ацә каҳаит, аӡәы ахыбра далҟьеит, ахаҳә хәыҷ амҩа ианшәалеит (Ҩынтә. 22:4, 8; Ам. 9:9). Иара убас уи ажәа акаҳараҵәҟьа акәымкәа, даҽа ҵакык аанарԥшуазар ауеит. Иаҳҳәап, арҭ ажәеинраалақәа рҿы еиԥш: «Иегова ауаҩы ишьаҿақәа ирӷәӷәоит. Уи имҩагьы агәырӷьара изаанагоит. Иара акаҳара далагаргьы, дкаҳаӡом, избанзар Иегова уи инапы икуп» (Аԥсал. 37:23, 24; Ажәам. 11:5).

Шәааи иара убас ҳахәаԥшып атеолог Едвард Пламптре ииҳәаз: «[„Акаҳара“ ҳәа еиҭагоу ауриатә ажәа] ахаангьы агәнаҳа аҽаҭара аанагаӡом». Абар даҽа ҵарауаҩык 16-тәи ажәеинраала иазкны ииҳәаз: «Анцәа ижәлар иҽеимкәа рызныҟәара иаԥсаӡам, избанзар дара уеизгьы ақәҿиара роуеит, ауаа цәгьақәа ракәзар, иҭахоит!»

Излаҳбаз ала, Ажәамаанақәа 24:16 аҿы зыӡбахә ҳәоу агәнаҳа ҟазҵо ауаҩ иакәымкәа, инымҵәошәа иубо ауадаҩрақәеи арыцҳарақәеи ирықәшәо иоуп. Ицәгьоу ари адунеи аҿы Анцәа изиашоу ауаҩы игәабзиара иадҳәалоу ауадаҩрақәа, ма егьырҭ ауадаҩрақәа дрықәшәозар ауеит. Мамзаргьы аҳәынҭқарцәа рҟынтә ашьҭашәарыцара ӷәӷәақәа дрықәшәозар алшоит. Аха иара агәра ганы дыҟазар илшоит Иегова ицхыраарала урҭ ауадаҩрақәа зегь рыхгара шилшо. Иҟалап шәара ижәбахьазар ус еиԥш иҟоу аԥышәарақәа аҵыхәтәаны Анцәа имаҵзуҩцәа азылԥхарақәа шырзаанаго. Избан? Избанар «Иегова икаҳауа зегь дрыцхраауеит, насгьы ихәаз зегь шьҭихуеит» (Аԥсал. 41:1—3; 145:14—19).

Анцәа изиашоу ауаҩы егьырҭ ангәаҟуа дгәырӷьаӡом. Иара идыруеит «иҵабыргу Анцәа ицәшәо зегь зылԥхараны ишырԥыло, избанзар дара иара ицәшәоит». Уи ауп иара дзыргәырӷьо (Еккл. 8:11—13; Иов 31:3—6; Аԥсал. 27:5, 6).