Iiḍighi Abutelhedom Mọ
11 Kụ abutelhedom mọ r’abumor phọ odi bọ Judia ụnhaghan ni mọ awe areelhe phọ momheeraam aani ekpo ọnhu phọ Ẹnhaan. 2 Esi ịduon phọ a Pita aḅula bọ Jeruselem, bụphe ọphamhanham bọ olhogh iḍun phọ umhiigh ni ọogbaghanhaan r’ọdi, 3 bịdi ụḅem ghan mọ: “Nạ uḍigh olhoghi otu awe dị kőḍunha ạḅilhe alhean bịdi.” 4 Kụ a Pita amhiigh ọḅenhi ạbidi oomo ịpe emite bọ ịlo esi r’esi, mọ:
5 “Mị ụrol Jọpạ rạaḅereghi ghan, kụ mị ạmhiin uḍien ịyaar dị ẹghigh oboom oodugha ukpe dị ọpham inya aruukunha phọ ẹpe k’ạke rosoore sịen ade phọ, kụ ịyaar phọ eru esi sịphe mị odi bọ. 6 Kụ mị akiririom aphogh, kụ ạmhiin oomo ịnham ịsien ade phọ, ịdi ẹmhoogh inya asike, r’ịnham elhegheḍum, r’ịdi rekuura ghan, r’ịnhun phọ. 7 Kụ mị ụnhaghan kẹn ẹḍogh dị ịḅenhi ịmhi mọ: ‘Ḅetenhu Pita, aghiigh ạany!’ 8 Kụ mị ạphagharanhaan mọ: ‘Eeye Uwo Ẹmhoogh, mị kátue, loor esi dị ạraraar dị olhogh phọ ạḅem mọ eḍighi ugbinhi ugbinhi ḅịlhe mọ ị́ḅaal ke̋ḍigh ghan ọnhu ạmhi.’ 9 Kụ ẹḍogh phọ ẹḅilhe ẹḍua ẹpe k’ạke phọ omhunhenhiom ịyal ạmem ẹḅem mọ: ‘Kạ́ḅem mọ ạraraar dị Ẹnhaan mạḅaalhamhi ị́ḅaal.’ 10 Kụ ịphen phọ ịḅilhe ni emite omhunhenhiom ịraar amem, kụ ọkpaaghi oomo ạraraar phọ oḅulhemhi ẹpe k’ạke. 11 Kụ ọkaraghi amem mọ ọpo phọ kụ ẹdi ịraar awe dị ọḅua Sịsạriạ oru, ọmheera sịphe otu phọ yoor ọrol bọ. 12 Kụ uwaloor iigbia phọ ụḅenhi ịmhi mọ mị ụdaph bịdi, ḅịlhe mọ mị kụ́moogh iikia. Kụ odiiny phọ abumor phọ ạbuen phọ ụdaph aani ni ịmhi, kụ yoor oḍigh olhoghi otu oye phọ.
13 “Kụ ọdi ụḅenhi iyoor ịdi ọokpaany aru k’ọdi ạḅenhi nyọdi mọ: ‘Tom we mọ ọghi Jọpạ ọmhagh oye dị oghol mọ ạ Sạịmọn dị rọmagh ghan kẹn mọ a Pita, 14 kụ ọdi kạḅenhi ni nyịnha rạraar dị eghun otu phọ ạna r’ạna keḍighi kụ ẹmoogh pẹlieeny.’ 15 Kụolo ịduon mị amhiigh bọ rạghaaph phọ, bịn uwaloor iigbia phọ asoorom aani bịdi ịduon usoorom bọ iyira emhiighom mọ. 16 Kụ mị ạatughian ịpe Uwo Ẹmhoogh phọ ạghaaph ghan bọ mọ: ‘Ạ Jọn aḍiinye ghan we mụum, kụolo kiḍiinyeom inyinha uwaloor iigbia phọ.’ 17 Kụ eru mạar dị Ẹnhaan ạngo ni bịdi inmo phọ ọdi rạngo ghan bọ oopho, ịpe ọdi ụngo bọ iyira phọ omheeraam bọ Uwo Ẹmhoogh phọ Jizọs Krạịst, mị phọ pọ ạnhian osophoghom Ẹnhaan?”
18 Bịdi ọnhaghan bọ rạraar phọ ịphen phọ, ụwilhe ni ọogbaghanhaan r’ọdi, kụ omhiigh oghuenhi Ẹnhaan esi ọḅem ghan mọ: “Ịduon phọ pọ, Ẹnhaan mạngo aani we areelhe phọ eepoogh okiton ọbo ọmoogh ghuḍum.”
19 Bụphe ọtuan bọ ịgbiphoghom mọ ọwalhalha mem mọ oghiigh bọ Stivin, usumughu ni ọghi k’ẹpe Finisia, rạ Sạịprọs, rạ Ạntiọk, kụolo bịdi ụghaaph ghan ekpo ọnhu phọ Ẹnhaan ọḅenhi oginha ạbuo a Ju. 20 Tọrobo ịpe ẹrol bọ, buniin ạbidi ụḅua ni Sạịprọs rạ Sạịrini oru Ạntiọk kụ omhiigh ọghaaph iiḅi ịinhaghan phọ ịlo Uwo Ẹmhoogh phọ Jizọs ọḅenhi ạbuphe rọḅa ghan bọ ọnhu a Grik. 21 Kụ ọḅaram ịsien, ạḍighaagh phọ a Jehova* ịrol li r’ạbidi, kụ ịbadi awe omheeraam kụ omhiigh ọdaph Uwo Ẹmhoogh phọ.
22 Abumor phọ odi bọ ookpomhoghan phọ ạrol bọ Jeruselem ụnhaghan ni ịlo ạbidi, kụ orom Bạnạbạs mọ ạghi Ạntiọk. 23 Ọdi asi bọ ẹpe phọ kụ ạmhiin bọ ọokia ọnma ighirigiir phọ Ẹnhaan maḍeenhaan bọ bịdi, abo ni kụ ạḅenhi bịdi mọ ọghiom ghisigh ọḅar Uwo Ẹmhoogh phọ r’oomo ekpom; 24 loor esi dị ọdi ogey oye dị uwaloor iigbia phọ amuza loor ḅịlhe ạmhoogh omheeraam di ạbugh. Kụ aḍiboom aḍita awe umheeraam ni Uwo Ẹmhoogh phọ. 25 Kụ ọdi ạḅua ni ạghi Tạsọs ọwa ạ Sọl oomo ẹpe phọ. 26 Ọdi rọmhiin Sọl, kụ ạpham arumhom Ạntiọk. Kụ bịdi ooḍikuan ghan r’abumor phọ sịphe ookpomhoghan phọ ḍikpom ạlha ọḅilhe ọtughemhi ḍiboom aḍita awe, kụ Ạntiọk kụ ẹḅel ekpisi dị ọmhagh bụmatuan phọ mọ ạ Krịstẹn dị eego esi ịiḅakiom Ẹnhaan.
27 Riiḍio phọ ịpe phọ ariil ụḅua ni Jeruselem oru Ạntiọk. 28 Kụ dị eego esi uwaloor iigbia phọ oniin ọnyo ạbidi dị oghol mọ Ạgạbọs aḅetenhu ni kụ ạḅem mọ iboom ịgbakuro kesoor ri oomo ade phọ mọony amem. Kụ ọkar agey, ịgbakuro phọ isoor ri mem mọ ạ Klọdiọs. 29 Esi ịduon phọ ạbumatuan phọ usopha ni ọghiom ạraraar dị kẹloghonhaan ḍịghaagh* bumor phọ odi bọ Judia, ọdaphan ịpe tọrobo ọnyo ạbidi katue bọ; 30 kụ bịdi uḍighi ni ịduon phọ, esi ọḅogh ạraraar phọ ọlhogh ạḍighaagh ạ Bạnạbạs rạ Sọl mọ bịdi ọsighe ọghiom ikumor awe phọ.