Iiḍighi Abutelhedom Mọ
14 Bịdi rosi Ạịkoniọm kụ oḍigh obughotu ạbuo a Ju phọ kụ ịma eten ọghaaph phọ ạbidi iḍighi ni ịdi ịbadi ạbuo a Ju phọ r’ạbuo a Gris omheeraam. 2 Kụolo ạbuo a Ju phọ ạbuphe úmeeraam aani bọ uḍighi ni ịdi awe areelhe phọ ọghagham bumor phọ ilhoghi ọḅilhe orupheom bịdi. 3 Bịdi ụrol li ẹpe phọ ịbadi asiḍughul otu, kụ ọghaaph ghan r’ạkpo oḅio dị eego esi ịikpo a Jehova,* kụ ọdi aḍeenhaan ni mọ adom ọokia ọnma ighirigiir phọ ọdi etu ni ịne esi ọsighe ạbidi oḍighinhom ịiḍaany. 4 Kụolo amadia ạrol li ẹmha phọ; buniin uḍighan bụo a Ju phọ kụ bụeripho oḍighan butelhedom mọ. 5 Kụ mem mọ awe areelhe phọ r’ạbuo a Ju phọ r’ạbutooghia ạbuo a Ju phọ oḅian bọ ọzoom abutelhedom mọ ịlo ạteeny r’oroḅol ạbidi ikpo, 6 ụḅenhi ni bịdi kụ bịdi osumughu ọghi Likeonia, ra Listrạ, rạ Dẹbi, r’ịphoripho ạramha phọ etuman bọ ẹpe phọ. 7 Kụ bịdi ọghiom ghisigh ogbeelhom ghan iiḅi ịinhaghan phọ ẹpe phọ.
8 Ẹpe Listrạ oye ạrol li dị aḍighi ẹkugha, dị kőrelhe ghan k’amem mọ ọmhar bọ. 9 Oye phọ ọphon phọ ạrol ude ạnhaghan ghan ịpe ạ Pọl rạkaaph bọ. Kụ ạ Pọl rophogh oye phọ rokiririom, kụ ạmhiin mọ omheeraam oye phọ katue ni aakonhom oye phọ, 10 kụ ạḅem r’ẹḍogh dị ẹghi ạnyu mọ: “Ḅetenhu ạmheera.” Kụ oye phọ aḅetenhu amhiigh orelhe. 11 Kụ aḍita awe phọ rọmhiin ịpe ạ Pọl aḍighi bọ, kụ ọlo ọnhu a Likeonia mọ: “Ạrumhugh phọ meetenheghian we etu ịteeny iyira!” 12 Kụ bịdi omhiigh ọmhagh ạ Bạnạbạs mọ a Zus, kụ ọmhagh ghan Pọl mọ ạ Hẹmis, loor ịduon ọdi kụ aḍiemhiom ghan bọ rạghaaph phọ. 13 Otu ịiḅereghi a Zus ạrol li eḍighom ẹmha phọ, kụ ọpinyon rịkia a Zus ạpham sịnam r’ạsifalhaway dị olho arumhom sịphe ọnhu aḍibuo ẹmha phọ dị aḍita awe phọ r’ọdi kọpinyon rịkia.
14 Kụolo mem mọ otelhedom mọ Bạnạbạs r’otelhedom mọ Pọl ọnhaghan bọ ịphen phọ, bịdi ụphanyi ni rụsuoma ạbidi kụ oghiil oḍigh igbo aḍita awe phọ kụ ọlo mọ: 15 “We phọ, nyinha ịtu eeghe kụ reḍighi bọ rạraar phọ ịphen phọ? Yoor awe ni dị rọmiinhom aani ghan rạraar phọ nyinha rẹmiinhom bọ. Kụ yoor rogbeelhom ghan iiḅi ịinhaghan phọ kịḅenhi inyinha, pịdi nyinha ẹbilhe rạraar phọ ịphen phọ ị́moogh bọ mạar oḍighinhom, etu ẹeḅereghi Ẹnhaan phọ edi ghan bo, ọpo ạlhem bọ kẹ phọ r’ade phọ r’ọphiiny ạbazi phọ r’ạraraar ịlo esi r’esi. 16 Ẹpe ọmhan ọdi ạngo ni ọgel mọ awe areelhe phọ oḍighi tọrobo ịlo ẹḅeraan bịdi, 17 kụolo ọdi aḍighi ghan ni iiḅi oḍeenhaan mọ ọno odi ni. Ọdi aḍighi ghan ịdi ọlophia kạloph ạḅilhe aḍighi ịdi iizo phọ anyinha emhuum iboom iimhumha, ọdi ịpheremhi ghan ni inyinha eḍien ạḅilhe aḍighi ịdi nyinha kẹmoogh ibo.” 18 Kụ ghạlhamo r’ịphen bịdi ọghaaph bọ bịn, bịdi útue ukikima ḍita awe phọ ọphinyon ạrikia ọngo ạbidi.
19 Kụolo ạbuo a Ju ụḅua ni Ạntiọk rạ Ạịkoniọm oru kụ oḍighi ịdi aḍita awe phọ oroḅol Pọl ikpo, kụ ọghogh nyọdi ọḍuanham sịphe ẹmha phọ, ogbiom ghan mọ ọdi mamhugh. 20 Kụ ạbumatuan phọ rokoom nyọdi, kụ ọdi aḅetenhu kụ aḍigh ẹpe olhoghi ẹmha phọ. Kụ ḍio phọ etum bọ sịphe ọdi rạ Bạnạbạs onyeenhe Dẹbi. 21 Bịdi rogbeelhom iiḅi ịinhaghan phọ ẹmha phọ ẹpe phọ rọḅilhe rọlhoghonhaan ḍịghaagh ịminighan awe oḍighi ạbumatuan, kụ bịdi oḅula Listrạ, rạ Ạịkoniọm, rạ Ạntiọk. 22 Kụ bịdi ọkparamhi bumor phọ ẹpe phọ, kụ oromha bịdi ọghiom aghisigh ọpham omheeraam mọ ạbidi ọkparamhi kụ ọḅenhi bịdi mọ: “Yira kọmiinhom ni iboom ịmhinhimhiin kụ ogbi oḍigh Ọmhar phọ Ẹnhaan.” 23 Ọḅaram ịsien, bịdi ụmaaghi ni ikumor awe tọrobo ookpomhoghan, kụ ọkaagh ẹḍogh ọoḅereghi, kụ ọḅogh bịdi ọngo a Jehova* phọ bịdi momheeraam bọ.
24 Kụ bịdi oogo Pisidia ọghi Pạmfilia, 25 kụ bịdi rogbeelhom ekpo ọnhu phọ Ẹnhaan ẹpe Pạgạ, kụ ọḅua ọghi Ạtạlạyạ. 26 Kụ bịdi oḍigh ụnwunyaru ẹpe phọ onyeenhe Ạntiọk, ẹpe abumor phọ ọoḅereghi bọ mọ ọokia ọnma ighirigiir phọ Ẹnhaan ạrol r’ạbidi oḍighi oḍighi phọ ọphon bịdi mọmhan bọ.
27 Bịdi rosi kụ ookpomhoghi bụo ookpomhoghan phọ, kụ ọghaaph ịlo ịbadi ạraraar phọ Ẹnhaan mạsighe bọ bịdi aḍighinhom, r’ịdi ọdi maghughuronhaan eghuugh omheeraam we areelhe phọ. 28 Kụ bịdi ọrol ẹpe phọ r’ạbumatuan phọ ịbadi asiḍughul otu.