Iiḍighi Abutelhedom Mọ
22 “We phọ, bumor r’ạburude, ịnaghan ịphen mị ạmhoogh bọ ọghaaph ọḅenhi anyinha nyịidipho.” 2 Bịdi rọnhaghan mọ ọdi rạḅaanhaan ghan bịdi ọnhu a Hibru kụ oomo ạbidi oḅoroghian, kụ ọdi ạḅem mọ: 3 “Mị ọnyo a Ju, kụ ụmhar ịmhi Tạsọs ẹpe Silisia, kụolo mị ụghi otu ịtuugha dị odi ẹmha phọ ẹphen phọ kụ ạ Gạmelịẹl kụ ụtughemhi ịmhi. Kụ ụtughemhi ịmhi ooko ạtorobo ạpakiri Olhogh phọ ạburude ạburude phọ ayira ooko ghan bọ, kụ mị ụmhoogh kẹn oophugh okumu Ẹnhaan ịduon nyinha ẹmhoogh bọ rodon phọ. 4 Mị ụgbiphoghom ni bụphe rọdaph bọ Eten Phọ ẹphen phọ kụ aḍighi ghan ịdi ọze bịdi, mị usiph ghan nmạriir phọ r’alhephiri phọ ạlhogh ikoli, 5 kụ ogbogh ọpinyon rịkia phọ r’oomo ikumor awe phọ olegheri ni ịphen phọ. Bịdi kẹn kụ ụngo ịmhi rịnya ọghiom abumor phọ ayira odi bọ ẹpe Dạmạskọs, kụ mị anyeenhe ọghi osiphi ạbuphe odi bọ ẹpe phọ orumhom Jeruselem ọmhiinhe.
6 “Kụ ịduon mị rạki bọ Dạmạskọs, mị ạtol rapogh ẹmha phọ ogbo ootaany, bịn aḍiboom ạḍiḅaal ẹḅua ẹpe k’ạke isoorom ịmhi ekperenhom, 7 kụ mị amheel kụ ạnhaghan ẹḍogh dị ịḅenhi ịmhi mọ: ‘Sọl, Sọl, uḍighi ika kụ nạ rụgbiphoghom bọ ịmhi?’ 8 Kụ mị apuru mọ: ‘Uwo Ẹmhoogh, nạ ạnhian?’ Kụ ẹḍogh phọ ẹḅem mọ: ‘Mị a Jizọs ọpo ạ Nạzạrẹt phọ, nạ rạgbiphoghom bọ.’ 9 Awe phọ ọrol bọ r’ạmhi ụmhiin ni ḍịḅaal phọ, kụolo ụ́naghan ẹḍogh ọpo ụḅaanhaan ghan bọ ịmhi. 10 Kụ mị ạḅem mọ: ‘Uwo Ẹmhoogh, nạ rạwa mọ mị uḍighi eeghe?’ Kụ Uwo Ẹmhoogh phọ ụḅenhi ịmhi mọ: ‘Ḅetenhu, aḍigh Dạmạskọs, bịn kọḅenhi ni nyịnha ẹpe phọ oomo ạraraar phọ rẹwa bọ mọ ḍighi.’ 11 Kụolo mị útue ụmiin ịyaar loor aḍiboom ạḍiḅaal phọ, esi ịduon phọ bụphe ọrol bọ r’ạmhi kụ ụpham ḍịghaagh ạmhi orelheom oḍigh Dạmạskọs.
12 “Kụ oniin oye dị oghol mọ Ạnạnạyạs, dị rakiilhaan ghan Ẹnhaan kạḅilhe aako Olhogh phọ, dị oomo ạbuo a Ju phọ orugh bọ ẹpe phọ rọkaaph ghan ịma ịlo ọdi, 13 aru ni ụteeny ịmhi. Ọdi ạmheera utuman ịmhi kụ ụḅenhi ịmhi mọ: ‘Sọl umor ạmhi, ḅịlhe amhiigh ọmhiin ẹten!’ Bịn mem mem mọ mị amhiigh ọmhiin ọdi. 14 Kụ ọdi ụḅenhi ịmhi mọ: ‘Ẹnhaan ạburude ạburude phọ ayira mạsaḅar nyịnha oru olhegheri ogbi phọ ọdi kụ ọmhiin oye elhiom eḍighinhom ịyaar phọ ọḅilhe ọnhaghan ẹḍogh ọdi, 15 loor esi dị ọdi mạsaḅar nyịnha ọghaaph ạraraar phọ nạ mạmhiin bọ ạḅilhe ạnhaghan ọḅenhi oomo awe. 16 Nạ rakori ghan eeghe? Ḅetenhu aḍiiny mụum, kụ aatol ịkaraph phọ ạna ạsighe, esi ọmhagh ghan aḍien phọ ọdi.’
17 “Mị roḅula Jeruselem roḍigh ẹpe otu ịiḅereghi phọ rạaḅereghi kụ mị ạmhiin uḍien 18 dị ọdi rụḅenhi ghan ịmhi mọ: ‘Gboogborion ạḍua Jeruselem, loor esi dị bịdi kómeeraam ịpe nạ rạkaaph bọ ịlo ạmhi.’ 19 Kụ mị ạḅem mọ: ‘Uwo Ẹmhoogh, bịdi r’aloor bịn olegheri ni mọ mị ụḅua ghan ni obughotu ạgba obughotu asiphi bụphe omheeraam bọ nyịnha ạlhogh ikoli ạḅilhe ạgurogh; 20 kụ mem mọ rokiigh bọ Stivin ọgbaanhaan phọ ạna, mị umheera ni mọ oghiigh nyọdi ạḅilhe ạmheera aphogh ghan rụsuoma ạnyu ạbuphe rokiigh bọ nyọdi.’ 21 Kụolo ọdi ụḅenhi ịmhi mọ: ‘Ḍụa, loor esi dị mị karom nyịnha ọghi areelhe dị ẹkelhogh.’”
22 Awe phọ ulher ghan ni rụru ọngo nyọdi tụtu ẹteeny bọ mem mọ ọdi ạghaaph bọ ịphen phọ. Kụ bịdi omhiigh ọghaaph r’ạroḍogh dị ẹghi ạnyu mọ: “Ịsighe oye phọ ọphon phọ ẹghi eghiigh, ọdi ọ́kpe mụn ọrol!” 23 Kụ loor ịduon bịdi rọlooghi bọ kọḅilhe oroḅolhoghi rụsuoma ạnyu phọ ạbidi komhophoghi ophugh, 24 oḍiemhiom ạbuo ẹgham mọ ạto mọ ọsighe Pọl oḍighom ẹpe amarugh ạbuo ẹgham mọ, kụ ạḅem mọ ọgurogh nyọdi opuru sipuru, pịdi ọdi alegheri ọkaraghi ịyaar phọ eḍighi bọ kụ awe phọ rọlooghiom bọ Pọl ịdipho phọ. 25 Bịdi rọghoroghi nyọdi ọgurogh, kụ ạ Pọl apuru uwo ẹmhu ạbuo ẹgham mọ ạmheera bọ pạ phọ mọ: “Ẹkpeanhaan ni dị nyinha kẹgurogh ọlo a Rom dị kősophanhaan ọoruen ḍụghum?” 26 Uwo ẹmhu ạbuo ẹgham mọ rọnhaghan ịphen phọ kụ ạghi ạteeny oḍiemhiom ạbuo ẹgham mọ ạḅenhi mọ: “Nạ kaḍighi ika ịduon phọ? Oye phọ ọphon phọ ọlo a Rom.” 27 Kụ oḍiemhiom ạbuo ẹgham mọ ạghi ạteeny nyọdi apuru mọ: “Nạ ọlo a Rom?” Kụ ọdi mọ: “Ii.” 28 Kụ oḍiemhiom ạbuo ẹgham mọ ạḅenhi nyọdi mọ: “Mị ụkpe ni iboom ikpoki oḍighi aani ọlo a Rom.” Kụ ạ Pọl ạḅem mọ: “Kụolo ẹlo ạmhi ụmhar ịmhi ịdipho ọlo a Rom.”
29 Esi ịduon phọ, mem mem mọ bịn awe phọ oru bọ ọgurogh ọdi r’opuru asipuru ọwilhe nyọdi; kụ oḍiemhiom ạbuo ẹgham mọ amhiigh oghiilhaan mem mọ alhegheri bọ mọ ạ Pọl ọlo a Rom kụ ọdi ạpaḍiom bọ izime.
30 Kụ loor ịduon ọdi ạwa bọ ọkar olhegheri ịyaar phọ eḍighi bọ kụ ạbuo a Ju phọ rọkaaph bọ ịkaraph ịlo ạ Pọl, ọdi ạkarion ni izime phọ ọkasaghiom bọ nyọdi ḍio phọ etum bọ pạ kụ ạto mọ aruwo ẹmhu ạbupinyon rịkia phọ r’oomo ạ Sạnhẹdrin phọ ookpomhoghan. Kụ ọdi ạsighe Pọl aru ạmheremhi igbo ạbidi.