Iiḍighi Abutelhedom Mọ

27 Rosopha mọ yoor koḍigh ụnwunyaru onyeenhe Itạli, kụ ọḅogh Pọl r’ạbunhon ạbuo ikoli ọngo uwo ẹmhu ạbuo ẹgham dị oghol mọ a Juliọs, ọdi ọlo ẹkpigh ạbuo ẹgham dị ọghol mọ Ọgọstọs. 2 Ụnwunyaru dị ạḍua Ạdrạmitiọm rạki risiḍia dị edi Esia ạrol li pạ phọ, kụ yoor oḍigh aani onyeenhe; kụ Ạristạkọs, ọlo ạ Tẹsạlonạịkạ ẹpe Mạsidonia ạrol aani ni r’ayoor. 3 Yoor usul Sạịdọn ḍio phọ etum bọ pạ, kụ a Juliọs ạzoom ni Pọl r’igbiririph kụ amheera mọ ọdi ạghi ạteeny rịghiri ọdi pịdi bịdi ọmaar opogh nyọdi.

4 Ịpe phọ reten kụ yoor ọghi otuman ekpu ogbo phọ ạ Sạịprọs kụ oghiilhom ghan ụnwunyaru phọ, pịdi ighoph iyoor loor oghim mọ ụda bọ iyoor. 5 Kụ ịduon yoor oghiil bọ ni rọki yoor ụḅeeny ni risiḍia phọ a Silisia rạ Pạmfilia ọghi osul esiḍia phọ ạ Mạịrạ ẹpe Lisia. 6 Kụ uwo ẹmhu ạbuo ẹgham mọ ạmhiin ni ụnwunyaru ẹpe phọ dị ạḍua Ạlẹgzạndriạ rạki Itạli, kụ ạḅem mọ yoor uḍiku. 7 Kụ ụnwunyaru phọ ụsighe iyoor ẹnum ẹnum esi ịminighan asiḍughul otu ạghi asiemhi Kạnạịdọs, kụolo ịkpar ri. Kụ loor ịduon oghim mọ úmeera bọ mọ yoor ụki ghisigh, yoor ụghi otuman Krit kụ oghiilhom ghan ụnwunyaru phọ, pịdi ughoph iyoor esi oghim mọ. 8 Kụ ghạlhamo r’ịduon yoor otuman bọ ni esiḍia phọ, yoor ụkparagha ni kụ ọghi osi esi dị oghol mọ Ịma Arisiḍia, kụ esi phọ ituman ẹmha phọ ạ Lạsia.

9 Yoor ụrol li ẹpe phọ ịminighan asiḍughul otu, kụ iḍighi ni ooto r’osooromhinheen oḍigh ụnwunyaru phọ ọghiom aghisigh erelhe phọ mem mọ ạmuphe phọ loor ịduon metenhom bọ kẹn Ḍio Iiwopha* phọ rọkaagh ghan bọ ẹḍogh. Esi ịduon phọ ạ Pọl aromha 10 bịdi mọ: “We phọ, mị ạmiin mọ yira ọghiom ghisigh erelhe phọ ẹphen phọ amuboom amuphe kạtol li, kụ adool phọ ọsaany bọ sịen phọ r’ụnwunyaru phọ bịn kụ képe, yira otue ni kẹn omuughu.” 11 Tọrobo ịpe ẹrol bọ, uwo ẹmhu ạbuo ẹgham mọ ạnhaghan ghụn ịpe okiilhom ụnwunyaru phọ r’uwo ụnwunyaru phọ ọghaaph bọ kpạripe rọnhaghan ịpe ạ Pọl rạkaaph bọ. 12 Kụ loor ịduon esiḍia phọ rẹ́nighe ghan bọ ọrol mem ẹephoom, ogbogh opol ạbidi ụḅem mọ omiteom ni ụnwunyaru phọ ophogh mụghumo bịdi kotue ni osi Finiks pịdi ọtol ẹpe mem ẹephoom mọ. A Finiks esiḍia dị edi ẹpe Krit, kụ esoman ẹpe erumhuḍio phọ remite ghan bọ.

13 Kụ mem dị ookuugh dị ạḍua ẹpe esoorom mọ ratu amhiigh oghugh ẹnum ẹnum, bịdi ụutughian mọ ạraar rẹki ni ịpe bịdi ogbiighi bọ, kụ ophunhe yogh ịluma phọ omhiigh oghiilhom ụnwunyaru phọ ọgbal ọphiiny ạbazi phọ a Krit onyeenhe. 14 Kụolo mọony amem bịn ọgbagara oghim dị oghol mọ Yuroạkuilo* amhiigh oghim oru. 15 Kụ loor ịduon ọgbagara oghim mọ rapum bọ ụnwunyaru phọ, ụnwunyaru phọ órue mụn ọda oghim mọ, esi ịduon phọ yoor ulhegheri ọwilhe mọ oghim mọ ụyoom iyoor. 16 Kụ yoor ọghi otuman ẹbam ekpu ogbo dị oghol mọ ạ Kọdạ kụ oghiilhom ghan ụnwunyaru phọ pịdi ighoph iyoor esi oghim mọ, kụ ghạlhamo r’ịduon phọ bịn ịkparanhaan ni iyoor ọphamhaghan ọḅam oghuugh phọ ạrol bọ ẹpe ọmhan ụnwunyaru phọ. 17 Bịdi rọsaany ọbam oghuugh phọ sịphe ụnwunyaru phọ, kụ ọghoroghiom ụnwunyaru phọ iḍigh ọbo kạbayaghu ghan bọ, kụ loor oghiilhaan phọ bịdi ọmhoogh bọ mọ ụnwunyaru phọ kạki atirian sịphe aruḅum ịsaar phọ edi bọ ẹpe ạ Siạtis phọ, bịdi usoore yogh ni rạraar phọ rokiilhom ghan bọ ụnwunyaru phọ kụ oghim mọ amhiigh ọyoom ayoor. 18 Kụ loor ịduon ọgbagara oghim mọ rạaḅaghamhi bọ ụnwunyaru phọ, bịdi umhiigh ni oḍighi ịdi ụnwunyaru phọ kaaphoogh ḍio phọ etum bọ pạ. 19 Rẹteeny omunhenhiom ịraar aḍughul otu phọ, kụ bịdi ọsigheogh rạraar phọ roḍighinhom ghan bọ oḍighi sịphe ụnwunyaru phọ oroḅolhoghi.

20 Kụ mem dị erumhuḍio phọ r’ạraanhaan ímite esi ịbadi asiḍughul otu kụ ọgbagara oghim mọ rukirikiriom iyoor, yoor umhiigh ni ọotughian mọ yoor komuughu. 21 Bịdi rọrol ọkoony rebia, kụ ạ Pọl ạmheera sịphe igbo phọ ạbidi ạḅem mọ: “We phọ, mọ nyinha ịnhaghan ni oromha phọ ạmhi ọbo yira mụ́ḅua ẹpe Krit utu ẹphen phọ usoman muphe r’ịiḅaghamhi phọ ịphen phọ. 22 Kụolo etigheri ịphen phọ, ịkpo oḅio, loor esi dị r’oniin ọnyo anyinha dị kamugh ólho, oginha ụnwunyaru phọ kụ kape. 23 Ḍughul phọ ẹḅaal bọ rodon, ọokpaany Ẹnhaan phọ ụmhoogh bọ ịmhi ḅịlhe mị rakumuan ghan bọ rukumuan iigbia kạngo umitenhaan ni ịmhi 24 kụ ạḅem mọ: ‘Kạ́moogh oghiilhaan Pọl. Nạ ạmoogh ọmheera aghisigh a Siza, kụ mịin! Ẹnhaan kạphel li nyịnha r’ạbuen r’ạna odi bọ sịen ụnwunyaru phọ.’ 25 Esi ịduon phọ ịkpo oḅio we phọ, loor esi dị mị ameeraam ni mọ Ẹnhaan kạtuugh ni ịpe ụḅenhi bọ ịmhi aḍighi. 26 Tọrobo ịpe ẹrol bọ, ụnwunyaru phọ ayira kạpu ni esiḍia eniin ekpu ogbo.”

27 Ogbo aḍughul omhunhenhiom a 14 aḍughul phọ yoor mọrol bọ ẹpe Ọphiiny Ạbazi phọ Edrịạ r’oghim mọ rukirikiriom bọ iyoor, bụphe rokumuan ghan bọ pạ ụnwunyaru phọ umhiigh ni ọotughian mọ bụno rọkpul ạnyu ade. 28 Kụ bịdi ọto ḍịkel ọphiiny ạbazi phọ sịphe bịdi odi bọ kụ ọmhiin mọ rẹki ni ọmhan 36 a mita,* kụ ọghi ghisigh ẹnum ọḅilhe ọto kụ ọmhiin mọ rẹki ni ọmhan 27 a mita.* 29 Kụ loor oghiilhaan mọ ụnwunyaru phọ kạki atirian ạnyu asighiigh, bịdi ụsighe ni inya ịluma ẹpe ọmhan ụnwunyaru phọ osumhughi ẹpe ọphiiny ạbazi phọ kụ ogonhom ghan dị ạḍiroor kẹḅaal. 30 Kụolo bụphe rokumuan ghan bọ sịphe ụnwunyaru phọ umhiigh ni ọwa areten osumhughu, kụ ọsighe ọbam oghuugh phọ osumeeny ẹpe ọphiiny ạbazi phọ, kụ opu oḍighi ghan mụdi bịdi ọsighe ịluma ẹpe ẹsoph ụnwunyaru phọ kụ rosumhughi ẹpe ọphiiny ạbazi phọ. 31 Kụ ạ Pọl ạḅenhi uwo ẹmhu ạbuo ẹgham mọ r’ạbuo ẹgham mọ mọ: “Awe phọ ạbuen phọ ụ́tol sịen ụnwunyaru phọ nyinha kemuughu ni.” 32 Kụ ạbuo ẹgham mọ osoph iḍigh phọ ọghoroghiom bọ ọbam oghuugh phọ kụ amheel asuma ẹpe ọphiiny ạbazi phọ.

33 Rẹki ọḅaal kụ ạ Pọl aromha oomo awe phọ mọ olhe eḍien, ọdi ạḅem mọ: “Rodon kụ omhunhenhiom a 14 aḍughul otu egbi k’aḍio phọ nyinha emhiigh bọ okori r’ọoḅaghamhian aloor, kụ eḍien nyinha ke̋lhe k’aḍio phọ. 34 Esi ịduon phọ mị rạlom ni mọ ile eḍien ọbo nyinha keḍighima ghan bọ ịyaar, loor esi dị r’aḍiniin ạḍilhaal ẹmhu ọnyo anyinha képe.” 35 Ọdi rọghaaph ịphen phọ, kụ ạsighe ạ brẹd, ạngo Ẹnhaan ḍịseph ghisigh oomo ạbidi, kụ ạpatan ạ brẹd phọ amhiigh olhe. 36 Kụ oomo ạbidi ọkpo oḅio kụ omhiigh olhe aani eḍien. 37 Kụ oomo phọ ayoor ọrol bọ sịphe ụnwunyaru phọ uḍighi 276 awe.* 38 Bịdi rolhe eḍien phọ rẹpherogh kụ omhiigh oroḅolhoghi a wit phọ ẹpe ọphiiny ạbazi phọ ọbo ụnwunyaru phọ aaphoogh.

39 Ẹḅaal bọ, bụphe rokumuan ghan bọ sịphe ụnwunyaru phọ ụmhiin ni ạnyu ade kụ ụ́logh elhegh esi phọ, kụolo bịdi ụmhiin esiḍia dị ịisaar emuza kụ osopha ọghi osul ụnwunyaru phọ sịphe phọ eḍighi mạar dị bịdi kotue ni. 40 Esi ịduon phọ bịdi uugbo ịluma phọ osumhughi ẹpe ọphiiny ạbazi phọ, kụ eniin phọ amem mọ bịdi ụkarion iḍigh phọ ọkpoom bọ ịlhom mọ, kụ ọotarion ọbam ạvala phọ dị ookuugh phọ kapulha ghan, kụ onyeenhe ẹpe esiḍia phọ. 41 Ụnwunyaru phọ rọghi okara eḅum ịisaar dị ạmuum mọ aḅeer akpol ịyal ạga sịphe ọphiiny ạbazi phọ, kụ atirian kụ ẹsoph phọ eḅi sịphe ịisaar phọ bịn ítue mụn imite, kụ oolhogh phọ amhiigh ophum ọmhan ụnwunyaru phọ ạayagh. 42 Esi ịduon phọ ạbuo ẹgham mọ usopha ọze ạbuo ikoli phọ ọbo oye kạmughi ghan bọ asuma. 43 Kụolo uwo ẹmhu ạbuo ẹgham mọ ạnya ni oghoph ạ Pọl, esi ịduon phọ ọdi asophoghom ni bụo ẹgham mọ oḍighi ịpe bịdi rọwa bọ. Ọdi ạto mọ tọrobo oye dị katue ạmughi apel asuma ẹpe ọphiiny ạbazi phọ ạmhughi ghan aphun ạnyu ade, 44 kụ bụeripho ọokpaphagh sụpo r’ịnhon ạpakiri ụnwunyaru phọ mạayaghu bọ ọmhughiom ophun aani. Esi ịduon phọ oomo ạbidi uphun ni ạnyu ade, kụ r’oye ịyaar óḍighima.