Iiḍighi Abutelhedom Mọ

13 Sịphe ookpomhoghan phọ ạrol bọ ẹpe Ạntiọk ariil r’ạbutughemhia ụrol li, bụen phọ pọ: ạ Bạnạbạs, ra Simiọn ọpo ọmhagh ghan bọ kẹn mọ Oḍiil,* ra Lusiọs ọpo ạ Sạịrini, rạ Mạnạẹn ọpo ạ Hẹrọd ọtooghia phọ r’ọdi ọghi bọ oniin otu ịtuugha, rạ Sọl. 2 Kụ ịduon bịdi rokumuan bọ kọngo a Jehova* kọḅilhe ọkaagh ẹḍogh, uwaloor iigbia phọ ạḅenhi bịdi mọ: “Ịgbatan Bạnạbạs rạ Sọl eseere pịdi bịdi oḍighi oḍighi phọ mị ạtuan bọ ạmhagh bịdi.” 3 Bịdi rọkaagh ẹḍogh rọḅilhe rọoḅereghi, kụ ọḅamham rạghaagh ạbidi Sọl rạ Bạnạbạs kụ ọḅenhi mọ ọghi.

4 Kụ awe phọ ạbuen phọ uwaloor iigbia phọ arom bọ ụghi ni osi Sẹlusiạ, kụ oḍigh ụnwunyaru ẹpe phọ onyeenhe Sạịprọs. 5 Bịdi rosi Sạlạmis, kụ omhiigh ogbeelhom ekpo ọnhu phọ Ẹnhaan ẹpe arubughotu ạbuo a Ju phọ. Kụ bịdi ụphamham ni Jọn pịdi ạloghonhaan ghan bịdi ḍịghaagh.

6 Bịdi orelhe bọ oomo ekpu ogbo phọ osi Pạfọs, ụmhiin ni ọnyo a Ju dị oghol mọ ạ Bạạ-Jizọs, kụ ọdi aḍighi oye idike r’oyil ọkpe. 7 Ọdi ạrol r’opoghom* mọ Sạjiọs Pọlọs, oye dị ạmhoogh olhegheri ịyaar. Oye phọ ọphon phọ ạkar ạwa ọnhaghan ekpo ọnhu phọ Ẹnhaan, kụ ạmhagh Bạnạbạs rạ Sọl mọ oru. 8 Kụolo oye idike phọ rọmagh ghan bọ kẹn mọ Ẹlịmạs (ẹmhu phọ pọ “oye idike”) amhiigh ni osophoghom ạbidi, kụ ạkparagha ghan oḍighi ịdi opoghom mọ kámeeraam ekpo ọnhu phọ Ẹnhaan. 9 Kụ uwaloor iigbia phọ amuza ni loor ạ Sọl phọ rọmagh ghan bọ kẹn mọ Pọl, kụ akiririom aphogh nyọdi 10 kụ ạḅem mọ: “Nạ oye dị iigbegheḍiom r’ịdo kịrokiro ịkaraph emuza loor, ọony Eru, mụlhogh ḍien elhiom eḍighinhom ịyaar, nạ kạ́bilhe ọgbaaghiom areten phọ a Jehova* esel bọ? 11 Mịin! A Jehova* kạlhiom ni nyịnha, kụ nạ kạ́miin mụn eten, nạ kạ́miin mụn ḍịḅaal erumhuḍio phọ esi ekulha amem.” Kụ mem mem mọ bịn ariḍien phọ ọdi eḍighi tụm, bịn oomo esi phọ eghul, kụ amhiigh ooba ọwa oye dị kạpam ḍịghaagh ọdi atelheom. 12 Kụ opoghom mọ ạmhiin bọ ịpe emite bọ, amheeraam ni Uwo Ẹmhoogh phọ, loor esi dị ạraraar phọ ọdi ạtuugha bọ ịlo a Jehova* iḍigh ni ḍiigu esi ọdi.

13 Kụ ạ Pọl r’ạbuphe rọdaph bọ nyọdi uḍigh ni oghuugh sịphe Pạfọs ọghi osi Pạgạ ẹpe Pạmfilia. Kụolo ạ Jọn ạwilhe ni bịdi aḅula Jeruselem. 14 Tọrobo ịpe ẹrol bọ, bịdi ụḅua ni Pạgạ ọghi Ạntiọk ẹpe Pisidia. Kụ Ḍio Ophooghian phọ, bịdi ụghi ni ẹpe obughotu phọ ọrolhoghu ude. 15 Rạal omiteom Olhogh phọ r’ịge Ariil phọ, kụ abuḍiemhiom mọ sịphe obughotu phọ orom dom ọḅenhi bịdi mọ: “We phọ, bumor phọ, eru mạar dị nyinha ẹmhoogh ịyaar ọghaaph dị kẹkparamhi we phọ, pọ itu ẹḅenhi we phọ.” 16 Kụ ạ Pọl ạmheera, kụ ạmaaghian, kụ ạḅenhi we phọ mọ:

“We Izrẹl, r’awe dị rokiilhaan Ẹnhaan dị úḍighi bụo a Ju, ịnaghan. 17 Ẹnhaan awe phọ Izrẹl ạsaḅar ri bụrude ạburude phọ ayoor, kụ aphophe bịdi mem mọ oḍighi bọ ruuruen ẹpe ade phọ Ijipt kụ ạsighe bịdi ẹpe phọ amiteom r’ạḍighaagh iphelhegbe phọ ọdi. 18 Kụ ọdi ạmhinhoghom ni rọozo phọ ạbidi esi 40 ạsia ẹpe ẹdala phọ. 19 Ọdi rophiemhi oḍual areelhe ade phọ a Kenạn, kụ ạngo de phọ bụrude ạburude phọ ayira ịdipho erua. 20 Kụ ịphen phọ imite igbo 450 ạsia.

“Ịphen phọ reten kụ ọdi ạma buugboom ịiruen mọ oḍiemhiom ghan bịdi tụtu ẹteeny mem oyil phọ Sạmụẹl. 21 Kụolo ẹsighe rẹki kụ bịdi ọḅem mọ bụno rọwa uwo ẹmha, kụ Ẹnhaan ạngo bịdi Sọl ọony phọ a Kis, oye ọlo eghun ạ Bẹnjạmịn, kụ ạtooghi 40 ạsia. 22 Ẹnhaan rọsighe nyọdi sịphe ạgada ịtooghi phọ, kụ ạsaḅar Devid mọ ạḍighi uwo ẹmha ạbidi, ọpo ọdi ạghaaph bọ ịlo ọdi mọ: ‘Mị mạmhiin Devid ọony phọ ạ Jẹsị ịdipho oye dị raḍighi ghan ogbi phọ ạmhi; kụ ọdi kaḍighi ni oomo ạraraar phọ mị rạwa bọ.’ 23 Ẹnhaan mamiteom ọpelia igbo ạnmuny* oye phọ ọphon phọ ạngo Izrẹl ọdaphan oguan phọ ọdi, kụ ọphon phọ a Jizọs. 24 Kụ a Jizọs agbi bọ oru phọ, ạ Jọn magbeelhom ni esi ogbo ạḅenhi oomo awe phọ Izrẹl mọ oḍiiny ạmuum kụ kaḍeenhaan mọ oye makiton. 25 Ạ Jọn ạḅem ghan mem mọ ọdi rạman bọ oḍighi phọ ọdi mọ: ‘Nyinha regbi ghan mọ mị ạnhian? Mị kụ kóye phọ nyinha rekori bọ. Kụolo ịmiin! Oye odi ni ọmhan ạmhi ratu dị iḍigh arokoro ọdi bịn mị ụ́man ọkarion.’

26 “We phọ, bumor phọ, nyinha ạnmuny ạnmuny phọ Ebrạhạm r’anyinha phọ rekiilhaan bọ Ẹnhaan kụolo úḍighi bọ bụo a Ju, Ẹnhaan muruom iyira dom mọ ạḍien egbolhomaam bọ pẹlieeny phọ ayira. 27 Awe phọ orugh bọ Jeruselem r’ạbutooghia phọ ạbidi ụ́sighe ọpelia phọ, kụolo mem mọ bịdi osophonhaan bọ nyọdi ọoruen phọ, umhunhemhi ni rạraar phọ edi bọ sịphe ịge Ariil phọ, ịpe rọbal ghan bọ kọḅenhi we phọ tọrobo aḍio ophooghian. 28 Kụ ghạlhamo r’ịduon bịdi ụ́miin bọ ịyaar ọtuan oghiigh ọdi, ụḅem ni mọ ạ Pạịlet aghiigh nyọdi. 29 Bịdi romhunhenhi oomo ịpe ọge bọ ịlo ọdi, kụ ọsighe nyọdi sịphe oreeny phọ osoore ọghi ọlhogh olhoghi oḍi. 30 Kụolo Ẹnhaan aḅeton ni nyọdi esi aḍuugh, 31 kụ esi ịbadi asiḍughul otu ọdi aḍeenhaan ni loor ọdi bụphe ọdaph bọ nyọdi ẹpe Gạlili ọghi Jeruselem. Kụ bụen phọ kụ rọkaaph bọ ịlo ọdi kọḅenhi we.

32 “Esi ịduon phọ iiḅi ịinhaghan ịlo oguan phọ oguan bọ bụrude ạburude phọ ayira kụ ẹdi yoor ogbeelhom bọ rịḅenhi inyinha. 33 Kụ Ẹnhaan maḍighi ụngo iyoor, ạnmuny phọ ạbidi, oomo ịpe ọdi aguan bọ esi oḅeton a Jizọs esi aḍuugh; ịdipho ọge bọ sịphe omunhenhiom ịyal ạḍuor phọ mọ: ‘Nạ ọony ạmhi; kụ mị maḍighi ọde ạna rodon phọ.’ 34 Ẹnhaan aḅeton nyọdi esi aḍuugh phọ dị kạ́moogh mụn ḍizu dị kẹḅor. Kụ Ọdi aḍeenhaan mọ ịphen phọ kemite ni mem mọ ạḅem bọ mọ: ‘Mị kạkar kụ iḍeenhaan inyinha ẹphomhoghian ọḅar phọ mị aguan bọ oḍeenhaan a Devid.’ 35 Kụ ọkaaph ni kẹn esi ạḍinhon ạḍuor mọ: ‘Nạ kámeera mọ aḍizu oye dị ạḅar nyịnha ẹḅor.’ 36 A Devid akumu ni Ẹnhaan oomo ạdol aghuḍum mọ ọdi, kụ ạnhaanhi rạlha aḍuugh,* kụ oḍi nyọdi sịphe oḍi bọ bụrude ạburude phọ ọdi, kụ ọdi ạḅor ri. 37 Kụolo ḍịeripho ạḍighaagh phọ, ọpo Ẹnhaan aḅeton bọ esi aḍuugh phọ ọ́ḅor.

38 “Esi ịduon phọ, bumor phọ, ilegheri mọ Ẹnhaan kạsar ịkaraph anyinha ạbilhenhaan dị eego esi oye phọ ọphon phọ. 39 Olhogh phọ a Mozis órue ịtagharan inyinha ọsighe esi ịkaraph, kụolo tọrobo oye lọ amheeraam nyọdi, Ẹnhaan kạtagharan ni ạsighe esi ịkaraph. 40 Esi ịduon phọ, igonha loor ọbo ịpe ịge Ariil phọ ẹḅem bọ kimitenhaan ghan bọ inyinha, ịpe ẹḅem bọ mọ: 41 ‘We ạrigilaam, ịmiin, keḍighi ni iikia esi anyinha, kụ nyinha ẹḅilhe emuughu, loor esi dị mị raḍighi ni oḍighi sịen ọrugh phọ anyinha, kụ nyinha kémeeraam ni bịn ghạlhamo oye kụ ịḅenhi inyinha ịlo esi r’esi.’”

42 Kụ mem dị bịdi romite ọḍua, awe phọ ụuḅereghian ni bịdi mọ oru Ḍio Ophooghian phọ etum bọ sịphe ọḅilhe ọghaaph ịlo ịphen phọ. 43 Romiteghu, kụ ịbadi ạbuo a Ju r’ạbudi moḍigh aani ẹku ịiḅereghi ạbuo a Ju phọ rọoḅereghi Ẹnhaan omhiigh ọdaph ạ Pọl rạ Bạnạbạs, kụ bịdi ọḅenhi we phọ mọ ọghiom ghisigh oḍighi ghan ịdi Ẹnhaan kaḍeenhaan bịdi ọokia ọnma ighirigiir phọ ọdi.

44 Ḍio Ophooghian phọ etum bọ sịphe, esugha ẹnum bịn ọbo oomo awe ẹmha phọ kụ uukpomhoghan ọnhaghan ekpo ọnhu phọ a Jehova.* 45 Kụ mem mọ ạbuo a Ju phọ ọmhiin bọ ḍita awe phọ, iphin ni ilhoghi* ạbidi kụ bịdi omhiigh ọghaaph ịkaraph ạraraar dị ẹgbagh ịpe ạ Pọl rạkaaph bọ. 46 Kụ ạ Pọl rạ Bạnạbạs ọḅenhi bịdi r’ạkpo oḅio mọ: “Ịkar kụ ẹkpeanhaan mọ ọphur ọghaaph ekpo ọnhu phọ Ẹnhaan ịḅenhi inyinha. Kụ sịen nyinha rekel bọ ḅịlhe ị́miin bọ loor anyinha ịdipho awe dị ọkpe ọmhoogh aghuḍum k’agee-pọ, ịmiin! yoor mooghiraan osoman we areelhe phọ. 47 Ịdi eḍighi bọ a Jehova* mụḅenhi iyoor mọ: ‘Mị mịma inyinha oḍighi ạḍiḅaal areelhe phọ, pịdi mị ịsighe inyinha ạpelhom we oomo aḅirinhi phọ.’”

48 Kụ awe areelhe phọ ọnhaghan bọ ịphen phọ, umhiigh ni obo r’ọghaaph ịma ịlo ekpo ọnhu phọ a Jehova,* kụ oomo ạbuphe oḍeenhaan bọ mọ bụno rọwa ni ọmhoogh aghuḍum k’agee-pọ omheeraam. 49 Ọḅaram ịsien, ekpo ọnhu phọ a Jehova* ịrara ghan bịn oomo eelhe phọ. 50 Kụ ạbuo a Ju phọ ụghaaph ni rạraar dị enme ilhoghi ikpolhom ạnmariir phọ rokiilhaan ghan bọ Ẹnhaan r’ịkpanha awe phọ, kụ bịdi oḍighi ịdi omhiigh ọgbiphoghom ạ Pọl rạ Bạnạbạs kụ ophorogh bịdi omiteom sịphe ẹmha phọ ạbidi. 51 Kụ bịdi ọokpa ịisaar aruwol phọ ạbidi, oḍeenhaan mọ mọphur we phọ rụru kụ onyeenhe Ạịkoniọm. 52 Kụ ạbumatuan phọ ụghiom ni ghisigh ọmhoogh iboom ibo kụ uwaloor iigbia phọ amuza loor ạbidi.