Iiḍighi Abutelhedom Mọ
12 Mem mọ ạmuphe phọ Uwo Ẹmha phọ Hẹrọd amhiigh ni ọgbiphoghom abuniin ạbuo ookpomhoghan phọ. 2 Ọdi aghiighom Jems umor phọ ạ Jọn elhool ẹgham. 3 Kụ ọdi ạmhiin bọ mọ ịphen phọ ẹḅeraan ni bụo a Ju phọ, ạghi ni asiph aani Pita. (Ịphen phọ imite mem mọ role bọ Ẹyaal Ạ Brẹd Phọ Ụ́logh Bọ Yist.) 4 Ọdi rọkasaghiom Pita, kụ ạma inya arugu ạbuo ẹgham dị inya ạbuo ẹgham kụ oḍighi ghan eniin egu mọ okori Pita. Egu egu phọ ukori ghan nyọdi mem mem. Kụ ọdi ạatughian ghan omiteom a Pita ọmheremhi* ghisigh awe phọ mem dị olhe Ẹyaal Ọphel Otenhe phọ ọmhan. 5 Esi ịduon phọ a Pita ạrol li ikoli, kụ ookpomhoghan phọ úsoph ghan mem oghol ẹmhu ọdi ọoḅereghi.
6 Kụolo ḍughul phọ ạḍiphe ẹḅaal ạ Hẹrọd kamiteom bọ Pita, a Pita ạnhaanhi ghan ni, kụ ụkasaghiom nyọdi ịyal izime igbo ịyal ạbuo ẹgham, kụ abukoriom ụrol kẹn ni ẹpe ọnhu aḍibuo phọ okori ghan otu ikoli phọ. 7 Kụolo ọokpaany a Jehova* ạmheera ni sịphe phọ, kụ ạḍiḅaal esoor sịphe osoph otu ikoli phọ. Kụ ọokpaany phọ atir ịkpurugaany a Pita ạsumeeny, kụ ạḅem mọ: “Gboogborion aḅetenhu!” Kụ izime phọ ẹḍua ḍịghaagh ọdi ẹghar. 8 Kụ ọokpaany phọ ạḅenhi nyọdi mọ: “Kpọlhoghian ạsuoma ạna, ạḅilhe ạlhogha rokoro ạna.” Kụ ọdi ạtuugh ịdipho aḍighi. Kụ eekunha phọ ọokpaany phọ ạḅenhi nyọdi mọ: “Kpọlhoghian ạsuoma ạnyu phọ ạna ụdaph ghan ịmhi.” 9 Kụ ọdi amite kụ ạdaph ghan ọokpaany phọ, kụolo ólhegheri mọ ịpe ọokpaany phọ raḍighi bọ remite ni eye, ạsighe ghụn mọ ọno rạmiin ghan uḍien. 10 Bịdi urelhe ni oten ẹḅel esi phọ abukoriom mọ odi bọ rokori r’omhunhenhiom ịyal esi phọ. Kụ bịdi ọghi osi sịphe eghuugh phọ oḍighinhom bọ rukuron phọ, koten bọ ọki ẹpe ẹmha phọ, kụ eginha eghuugh phọ eghughuronhu. Bịdi romite, kụ orelhe oḍigh eniin eten, bịn mem mem mọ ọokpaany phọ ạwilhe nyọdi ạḅua. 11 A Pita rolhegheri ịpe remite bọ, kụ ạḅem mọ: “Nyịidipho mị malhegheri akuphom owol mọ a Jehova* kụ arom ọokpaany ọdi mọ aru ụtagharan ịmhi ạsighe ḍịghaagh ạ Hẹrọd ạḅilhe ụtagharan ịmhi ạsighe esi oomo ạraraar phọ ạbuo a Ju phọ ọotughian bọ mọ kimitenhaan ịmhi.”
12 Ọdi rolhegheri ịphen phọ, kụ ạghi ka Meri onhiin phọ ạ Jọn phọ rọmagh ghan bọ kẹn mọ Mạk. Kụ ịminighan ạbumatuan ụrol li sịphe phọ ọoḅereghi ghan. 13 Kụ ọdi akar bọ eghuugh ọnhu aḍibuo phọ, ẹbenhe ọnyanhi dị oghol mọ a Roda aru ni ophogh oye phọ akar bọ. 14 Kụ ọdi ạlhogh bọ elhegh mọ ẹḍogh a Pita, ạmhoogh ni iboom ibo dị tụtu ạwilhe oghughuron eghuugh phọ, kụ aghiil aḍigh olhoghi ạḅenhi bụphe odi bọ ẹpe olhoghi phọ mọ a Pita ạmeera ẹpe ọnhu aḍibuo phọ. 15 Kụ bịdi ọḅenhi nyọdi mọ: “Nạ ólhegheri ịphen nạ rạkaaph bọ.” Kụolo ọdi ạghaaph ghan bịn mọ ọdi ni. Kụ bịdi omhiigh ọḅem mọ: “Ọokpaany ọdi.” 16 Kụolo a Pita ạmheera ni ẹpe phọ akar ghan. Kụ mem mọ bịdi ọghi bọ oghughuron eghuugh phọ, ụmhiin ni nyọdi kụ eḍigh ḍiigu esi ạbidi. 17 Kụolo ọdi ạmaaghian ni ạḅenhi bịdi mọ oḅoorian, kụ ạḅenhi bịdi ịlo esi r’esi ịpe a Jehova* amiteom bọ nyọdi sịphe ikoli phọ, kụ ạḅem kẹn mọ: “Ịḅenhi Jems r’abumor phọ rạraar phọ ịphen phọ.” Ịphen phọ reten kụ ọdi amite ạghi ẹnhon ekpisi.
18 Ẹḅaal bọ, ạbuo ẹgham mọ ụuḅaghamhian ni loor iboom ịlo ịpe memitenhaan bọ Pita. 19 Kụ ạ Hẹrọd amhiigha ni loor ạwa nyọdi kụolo ọ́mhiin, kụ apuru bukoriom mọ ịpe emite bọ, kụ ạto mọ ọsighe bịdi ọghi ọlhiom; kụ ạ Hẹrọd ạḅua Judia ạghi Sịsạriạ kụ ạrol ẹpe phọ ẹnum.
20 Ọdi ạghagham ni olhoghi we phọ ạ Tạya rạ Sạịdọn. Kụ bịdi ọḅoph ilhoghi oru ọteeny nyọdi, kụ rọḅaanhaan Blạstọs, oye phọ rapogh ghan bọ otu uwo ẹmha phọ, mọ ạlhoghonhaan bụno ḍịghaagh, kụ ọlhom mọ ẹepho ẹḅilhe ẹrol igbo ạbuno r’uwo ẹmha phọ, loor esi dị eelhe uwo ẹmha phọ kụ rotuom ghan eelhe phọ ạbidi eḍien. 21 Ḍiniin aḍio dị awe ookpomhoghan, ạ Hẹrọd aanmenian ni iinmenhan aruwo ẹmha ạrol ude sịphe ạgada ịiruen phọ kụ amhiigh ọḅaanhaan awe phọ. 22 Kụ awe phọ ookpomhoghan bọ omhiigh ọlo mọ: “Ẹphen phọ ẹḍogh Ẹnhaan, kẹ́ḍogh oye!” 23 Kụ mem mem mọ bịn ọokpaany a Jehova* ạgurom nyọdi ẹzegh, loor esi dị ọdi ọ́ngo Ẹnhaan rughuenhian phọ, kụ asilheegbem emuza loor ọdi bịn amhugh.
24 Kụ ekpo ọnhu phọ a Jehova* ịghiom ni ghisigh elheeny ghan elheeny kụ awe omheeraam ghan bịn.
25 Kụ ạ Bạnạbạs rạ Sọl rọmhan oḍighi ọlhoghonhaan ạḍighaagh abumor phọ odi bọ Jeruselem, kụ ọpham Jọn phọ rọmagh ghan bọ kẹn mọ Mạk oḅula ẹpe Ạntiọk.