Iiḍighi Abutelhedom Mọ
15 Buniin awe ụḅua ni Judia oru kụ omhiigh ọtughemhi abumor phọ mọ: “Emuton lọ nyinha eḍunha yogh, ọdaphan ịpe Olhogh phọ a Mozis ạḅem bọ, pọ nyinha kẹ́moogh pẹlieeny.” 2 Kụolo ạ Pọl rạ Bạnạbạs ụugbaghanhaan ni iboom r’ạbidi, kụ abumor phọ ọlhogh Pọl rạ Bạnạbạs r’ạbunhon awe mọ ọsighe ọghaaph phọ ọphon phọ ọghiom butelhedom mọ r’ikumor awe phọ odi bọ Jeruselem.
3 Ookpomhoghan phọ rororori bịdi ephurukpu, kụ bịdi oogo Finisia rạ Sạmeria onyeenhe, kụ ọghaaph ghan ọḅenhi bumor phọ ịpe awe areelhe phọ momheeraam aani bọ ekpo ọnhu phọ Ẹnhaan kụ oomo ạbidi ọmhoogh iboom ibo. 4 Bịdi osi bọ Jeruselem, ookpomhoghan phọ r’abutelhedom mọ r’ikumor awe phọ ughuraam ni bịdi agey, kụ bịdi ọghaaph ịlo ịbadi ạraraar phọ Ẹnhaan mạsighe bọ bịdi aḍighinhom. 5 Kụolo buniin dị ọrol ghan ẹku ạ Fạrisi phọ kụ momheeraam ekpo ọnhu phọ Ẹnhaan, ụmheregha ni ọḅem mọ: “Ẹkpeanhaan ni dị koḍun bịdi ọḅilhe ọto ọḅenhi bịdi mọ ooko Olhogh phọ a Mozis.”
6 Esi ịduon phọ abutelhedom mọ r’ikumor awe phọ uukpomhoghan ni ophogh ọghaaph phọ ọphon phọ. 7 Kụ bịdi rọoḅeghion ọghaaph phọ ọphon phọ ịminighan, kụ a Pita ạmheera ạḅenhi bịdi mọ: “We phọ, bumor phọ, nyinha elegheri ni mọ mebia ni Ẹnhaan ụsaḅar bọ ịmhi sịen igbo phọ ayira mọ eego esi ạmhi kụ awe areelhe phọ ọnhaghan iiḅi ịinhaghan phọ ọḅilhe omheeraam. 8 Kụ Ẹnhaan phọ alhegheri bọ ịpe edi bọ ekpom awe aḍeenhaan ni mọ ọno mạsighe bịdi, esi ọngo ạbidi uwaloor iigbia phọ ịdipho ọdi ụngo bọ iyira. 9 Esi ọdi ọgbaranhaan ólho igbo ayira r’ạbidi, kpạripe ghụn ọdi mạḅaalhamhi rokpom mọ ạbidi dị eego esi omheeraam mọ ạbidi. 10 Uḍighi ika kụ nyinha rẹdegh bọ Ẹnhaan esi ọḅenhi ạbumatuan phọ mọ ọgbanha ọfeguma dị ạburude ạburude phọ ayira r’ayira útue ụgban? 11 Kụari yira ọmoogh omheeraam mọ rụphel iyira dị eego esi ọokia ọnma ighirigiir Uwo Ẹmhoogh phọ Jizọs, eniin phọ eten phọ rọpel bọ bịdi.”
12 Kụ awe phọ oḅoroghian, kụ omhiigh ọnhaghan ịpe ạ Bạnạbạs rạ Pọl rọkaaph bọ ịlo ịbadi ịiḍaany phọ Ẹnhaan mạsighe bọ bịdi aḍighinhom igbo awe areelhe phọ. 13 Bịdi rọghaaph rọmhan, kụ a Jems ạḅem mọ: “We phọ, bumor phọ, ịnaghan. 14 A Simiọn mạghaaph ni ịlo esi r’esi ịpe Ẹnhaan maaghiraan bọ asoman we areelhe phọ, omiteom ịsiphe igbo phọ ạbidi we dị kokolhom ghan ḍien phọ ọdi. 15 Kụ ịphen phọ ẹḅoph ni r’ịpe ịge Ariil phọ ẹḅem bọ mọ: 16 ‘Ịphen phọ eten mị kaḅula ni ạḅilhe ạmeremhi ogbogo phọ a Devid mamhelheghu bọ; mị kạḅilhe ni ạlogh ogbogo phọ maagulhaany bọ, 17 pịdi awe dị osugha r’awe oomo areelhe phọ, bụphe ogholhom bọ ḍien phọ ạmhi, ọḅoph okumu a Jehova* r’oomo ekpom, ịphen kụ ịdi a Jehova* mạḅem, ọpo raḍighi bọ rạraar phọ ịphen 18 ọdi asopha bọ oḍighi k’iḍiodi phọ.’ 19 Esi ịduon phọ, mị kạḅem mọ kụ́uḅaghamhi we areelhe phọ rotu bọ ọoḅereghi Ẹnhaan, 20 kụolo ọge ọghiom bịdi mọ bịdi ọḍua esi ạraraar dị mọopuom ịkaaghinheen ạrumhugh, r’esi ọrolhan esi dị ụ́ḅaal,* r’esi ẹnham dị ọphur orum kụ oghiigh,* r’esi ịḅaal. 21 Ịdi eḍighi bọ k’iḍiodi phọ awe rogbeelhom ghan ni ịlo a Mozis ẹmha etum ẹmha, loor esi dị tọrobo aḍio ophooghian rọbal ghan ni rạraar phọ ọdi ạge bọ kọḅenhi we phọ ẹpe arubughotu phọ.”
22 Kụ abutelhedom mọ r’ikumor awe phọ r’oomo ookpomhoghan phọ usopha ni orom awe dị bịdi mọsaḅar sịphe igbo phọ ạbidi mọ ọdaph Pọl rạ Bạnạbạs ọghi Ạntiọk, bịdi urom Judas phọ rọmagh ghan bọ kẹn mọ Bạsạbạs rạ Sạịlạs, we dị oḍiemhiom oḍighi phọ igbo abumor phọ. 23 Bịdi ụge ni ḍịnya ọngo we phọ mọ ọpham ọghimhom, ụge mọ:
“Yoor abutelhedom mọ r’ikumor awe phọ, abumor phọ anyinha, kụ ụge riruom inyinha abumor phọ úḍighi aani bọ bụo a Ju, odi bọ Ạntiọk, ra Siria, ra Silisia: Yoor rọmagh ni o! 24 Yoor mọnhaghan mọ buniin awe ụḅua ni igbo ayoor oru ọkom ịiḅaghamhi ịngo inyinha, esi ọghaaph ạraraar dị kịgbaragbaramhi inyinha. Kụ yoor kụ ụ́ḅenhi bịdi oḍighi ịphen phọ. 25 Esi ịduon phọ yoor mọḅoph ọnhu osopha ọsaḅar awe dị kọdaph Bạnạbạs ooḅi umor phọ ayoor rạ Pọl, otu ịteeny inyinha. 26 Bụen phọ awe dị mọtuan ḍien Uwo Ẹmhoogh phọ ayira Jizọs Krạịst, ọlhogh ghuḍum mọ ạbidi esi ooto r’osooromhinheen. 27 Yoor otom Judas rạ Sạịlạs oru ọsighe ọnhu ạbidi ọghaaphom ạraraar phọ ọge bọ sịen ạḍinya phọ. 28 Uwaloor iigbia phọ r’ayoor momheeraam mọ inyinha kíleti ḍiboom adool emuton rạraar phọ ịphen ẹmhan bọ mạar: 29 ịkiom ghisigh ẹḍua ghan esi ạraraar dị ọphinyon ọngo ịkaaghinheen ạrumhugh, r’esi ịḅaal, r’esi ẹnham dị ọphur orum kụ oghiigh,* r’esi ọrolhan esi dị ụ́ḅaal.* Eḍighi mạar dị nyinha ẹghiom ghisigh ẹḍua ghan esi ạraraar phọ ịphen phọ, pọ kịnhighenhaan ni inyinha. Ịmaar ẹrol!”
30 Kụ awe phọ ạbuen phọ ọḍua onyeenhe Ạntiọk, bịdi rosi kụ ookpomhoghi oomo ạbumatuan phọ ọngo ḍịnya phọ. 31 Bịdi ạal bọ ḍịnya phọ, ụmhoogh ni ibo loor esi ikpo ọnhu ọkparamhi phọ. 32 Kụ a Judas rạ Sạịlạs phọ oḍighi bọ kẹn riil, ụghaaph ni ịbadi ạraraar ọkparamhi bumor phọ. 33 Bịdi ụrol li ẹpe phọ ephurukpu, kụ rẹteeny dị koḅula ọki ọteeny bụphe orom bọ bịdi, kụ abumor phọ ọḅenhi bịdi mọ ọghi r’ẹepho. 34* —— 35 Kụolo ạ Pọl rạ Bạnạbạs ụrol li Ạntiọk ọtughemhi ghan, kụ bịdi r’ịbadi ạbunhon ogbeelhom ghan iiḅi ịinhaghan phọ ịlo ikpo ọnhu phọ a Jehova.*
36 Iphurukpu asiḍughul otu reten, kụ ạ Pọl ạḅenhi Bạnạbạs mọ: “Oḅula ọghi ophogh bumor phọ odi bọ oomo ạramha phọ yira ọghi bọ ogbeelhom ekpo ọnhu phọ a Jehova,* ọmhiin ịdi bịdi odi.” 37 Kụ ạ Bạnạbạs ạnya ni ọpham ạ Jọn phọ rọmagh ghan bọ kẹn mọ Mạk. 38 Kụolo ạ Pọl ómheera mọ ọpham Mạk, loor ịduon ạwilhe bọ bịdi ẹpe Pạmfilia, kụ ụ́daph aani bọ bịdi uḍighi oḍighi phọ. 39 Ịphen phọ ịkom ni ọghagh olhoghi kụ bịdi ọruan, kụ ọgbaranhaan, kụ ạ Bạnạbạs ạpham Mạk aḍighom ụnwunyaru anyeenhe Sạịprọs. 40 Ạ Pọl rọsaḅar Sạịlạs kụ abumor phọ ọoḅereghi mọ ọokia ọnma ighirigiir phọ a Jehova* ạrol rạ Pọl, kụ bịdi ọḅua. 41 Ọdi aago Siria ra Silisia ạkparamhi ghan rookpomhoghan phọ.