Iiḍighi Abutelhedom Mọ

4 Ịyal phọ ạbidi odi ni rọḅaanhaan we phọ, bịn ạbupinyon rịkia phọ, r’uwo ẹmhu abukoriom otu ịiḅereghi phọ r’ạbuo ạ Sạdusi phọ oru ọteeny bịdi. 2 Kụ bịdi ụghagh ni ilhoghi iboom loor ịduon abutelhedom mọ rọtughemhi bọ we phọ kụ ọḅilhe bọ rọkaaph esi ogbo ịlo oḅetenhu esi aḍuugh phọ a Jizọs. 3 Kụ bịdi osiph butelhedom mọ, kụ loor ịduon mẹteeny bọ dulhe ụkasaghiom ni bịdi tụtu ẹteeny ḍio phọ etum bọ pạ. 4 Tọrobo ịpe ẹrol bọ, ịbadi ạbuphe ọnhaghan bọ rạghaaph phọ ạbidi umheeraam ni, kụ ọnhu ạbal alhephiri ạnmuny phọ momheeraam bọ aru aḍighi 5,000.

5 Rẹteeny ḍio phọ etum bọ pạ, kụ ạbutooghia phọ, r’ikumor awe phọ, r’ạbutughemhia Olhogh phọ ookpomhoghan sịphe Jeruselem, 6 kụ Ạnạs ogbogh ọpinyon rịkia phọ, ra Keyạfạs, rạ Jọn rạ Ạlẹgzạndạ, r’oomo asiya ogbogh ọpinyon rịkia phọ ụrolhom aani ni. 7 Kụ bịdi ọmheremhi Pita rạ Jọn sịphe ogbo phọ ạbidi kụ opuru mọ: “Ịghen ịikpo kụ ẹdi nyinha eḍighinhom bọ rạraar phọ ịphen phọ, kụ ạnhian kụ ịngo bọ inyinha ịikpo phọ?” 8 Kụ uwaloor iigbia phọ amuza loor a Pita, kụ a Pita ạḅenhi bịdi mọ:

“Bụtooghia r’ikumor awe, 9 eru mạar dị nyinha ẹtuan iiḅi phọ oḍighinhaan bọ oye phọ ọphon aḍighi ghan bọ ẹkugha kụ ripuru iyoor sipuru rodon, olhegheri oye phọ aḍighi bọ ịdi ọdi amhoon, 10 pọ oomo anyinha r’oomo awe phọ Izrẹl olhegheri mọ esi aḍien phọ a Jizọs Krạịst ọpo ạ Nạzạrẹt phọ nyinha ẹkan bọ loor oreeny eghiigh kụ Ẹnhaan aḅeton bọ esi aḍuugh, kụ ẹdi oye phọ ọphon phọ ạmheera bọ sịen ghisigh anyinha r’omhoon aloor. 11 Ọdi kụ ‘aḍighiigh phọ nyinha ạbuloghom ruutu phọ ị́maghamhi bọ mạar kụ nyịidipho meḍighi bọ ḍighiigh dị ẹmhan mạar epu ịnhon.’* 12 Ọḅaram ịsien, ọnhon oye kátue ạngo we pẹlieeny, loor esi dị ạḍinhon aḍien ílo sịen ade phọ dị Ẹnhaan mạngo we dị kịngo iyira pẹlieeny.”

13 Mem mọ bịdi ọmhiin bọ ịpe a Pita rạ Jọn rọkaaph bọ r’ạkpo oḅio, kụ olhegheri bọ mọ ụ́ki aani ruutu ịtuugha* phọ ḅịlhe mọ oye ólhegheri bịdi, iḍighi ni iikia esi ạbidi. Kụ bịdi ogbi ọotughian mọ ụrol ghan ra Jizọs. 14 Kụ ịduon bịdi ropogh bọ oye phọ ookonhom bọ dị ạmheera r’ịyal phọ ạbumatuan phọ, bịn bịdi ụ́moogh mụn ịyaar ọghaaph ịlo ịphen phọ. 15 Kụ bịdi ọto ọḅenhi ịraar phọ ạbidi mọ ọḍua sịphe ạ Sạnhẹdrin* phọ omite erugh, kụ bịdi omhiigh oopuruan 16 mọ: “Yira koḍighi ika we phọ ạbuen phọ? Ịdi eḍighi bọ, bịdi oḍighi ni ịyaar dị eḍighan elhegh dị oomo ạbuen orugh bọ Jeruselem olhegheri ni, kụ yira kótue ọḅem mọ ímite. 17 Oḍighi ịdi ịphen phọ kéelheghaany mụn, ookperemhi bịdi kụ ọḅenhi bịdi mọ kụ́kaaph mụn ịlo aḍien phọ ạḍien phọ ụḅenhi oye.”

18 Kụ bịdi ọmhagh ịyal phọ ạbumatuan phọ kụ ọto ọḅenhi mọ kụ́kaaph mụn ụḅilhe ụtughemhi ịlo aḍien phọ a Jizọs. 19 Kụolo a Pita rạ Jọn ụḅenhi bịdi mọ: “Eru mạar dị nyinha ẹetughian mọ ẹnighe ni ghisigh Ẹnhaan dị yoor kịnhaghanhan inyinha kpạripe r’ọnhaghanhan Ẹnhaan, pọ ịpe phọ ịlo anyinha. 20 Kụolo ẹlo ayoor, yoor kọ́bilhe ọghaaph ghan ịlo ạraraar phọ yoor mọmhiin bọ ọḅilhe ọnhaghan.” 21 Bịdi rọḅilhe rookperemhi ịyal phọ ạbumatuan phọ kụ oseere mọ ogheel, loor ịduon bịdi ụ́miin bọ ịyaar oghol ọlhiom ạbidi r’aloor esi awe phọ, ịdi eḍighi bọ oomo awe phọ uboom ghan Ẹnhaan loor ịphen memite bọ. 22 Oye phọ ookonhom bọ mapel li 40 ạsia.

23 Roseere bịdi, kụ ịyal phọ ạbidi ọghi ọteeny bụeripho ạbumatuan phọ ọḅenhi ịpe aruwo ẹmhu ạbupinyon rịkia phọ r’ikumor awe phọ mọḅenhi bọ bịdi. 24 Ạbueripho ạbumatuan phọ rọnhaghan ịphen phọ kụ oomo ạbidi ọḅophoghan ọoḅereghi r’ạroḍogh dị ẹghi ạnyu mọ:

“Uwo Ẹmhoogh Ịtooghi, nạ kụ ụlhem kẹ phọ r’ade phọ r’ọphiiny ạbazi phọ r’ạraraar ịlo esi r’esi, 25 kụ dị eego esi uwaloor iigbia phọ nạ uḍighi ni ịdi ọde phọ ayoor Devid aḍighi bọ ẹbenhe phọ ạna ạghaaph mọ: ‘Eeghe kụ ịkom bọ ịghagh ilhoghi areelhe phọ kụ uḍighi ika kụ awe phọ rọotughian bọ ịlo ạraraar dị ị́moogh mạar oḍighinhom? 26 Aruwo ẹmha ịsien ade phọ mọnyaaghian, kụ ạbutooghia phọ kẹn mookpomhoghan ozuom a Jehova* r’ọpo ọdi mạsaḅar bọ.’* 27 Ọkar agey ạ Hẹrọd rạ Pọntịọs Pạịlet r’awe areelhe phọ r’awe phọ Izrẹl uukpomhoghan ni sịen ẹmha phọ ẹphen phọ ozuom Jizọs ẹbenhe phọ ạna, aḍighi bọ oye iigbia, ọpo nạ mạsaḅar bọ, 28 bịdi uukpomhoghan oḍighi ịpe nạ mạghaaph bọ k’ẹpe ọmhan. Kụ ịphen phọ imite loor esi dị nạ ạmoogh ịikpo, kụ iḍighi kẹn ogbi ạna. 29 Esi ịduon phọ, Jehova,* nạghan ni ịpe bịdi ụpaarogh bọ iyoor, ạlhoghonhaan ḍịghaagh rẹbenhe phọ ạna ogbeelhom ghan ekpo ọnhu phọ ạna r’ạkpo oḅio, 30 kụ ạghiom ghisigh aselhe ḍịghaagh phọ ạna aakonhom bụphe úmoon bọ ạḅilhe ạghiom ghisigh aḍighi ghan ịiḍaany dị eego esi aḍien a Jizọs ẹbenhe phọ ạna, aḍighi bọ oye iigbia.”

31 Bịdi rọoḅereghi r’oomo ekpom, kụ esi phọ bịdi ookpomhoghan bọ ephiigha, kụ uwaloor iigbia phọ amuza loor ạtorobo ọnyo ạbidi kụ bịdi ogbeelhom ghan ekpo ọnhu phọ Ẹnhaan r’ạkpo oḅio.

32 Ọḅaram ịsien, aḍita ạbuphe omheeraam bọ ụḅoph ni ilhoghi r’ịitughian,* kụ ọnyo ạbidi ọ́ḅem ghan mọ ịyaar lọ ọno ạmhoogh ẹlo ọno bịn, bịdi useere oomo ạraraar phọ ạbidi ogbo. 33 Kụ abutelhedom mọ ụghiom ni ghisigh ọghaaph ghan ịlo oḅetenhu esi aḍuugh Uwo Ẹmhoogh phọ Jizọs kụ ọmhoogh ghan ekol, kụ Ẹnhaan ạngo bịdi ọokia ọnma ighirigiir phọ ọdi ạbughe. 34 Ọkar ọghaaph, ịyaar íkuom r’oniin ọnyo ạbidi, loor esi dị oomo ạbuphe ọmhoogh bọ rere ọbobo aruutu aalhaghi ghan ni kụ ọsighe ghan ikpoki phọ oru, 35 kụ ọngo butelhedom mọ. Kụ abutelhedom mọ ọdaph ghan dọl ạtorobo oye kụ odi ikpoki phọ. 36 Kụ a Josẹf, ọpo abutelhedom mọ ọmhagh ghan bọ mọ Bạnạbạs (ẹmhu phọ pọ, “Ọony Ịidereghi”), ọnyo a Livạị dị aḍighi ọlo ạ Sạịprọs, 37 aal li de ọdi kụ ạsighe ikpoki phọ aru ạngo butelhedom mọ.