Iiḍighi Abutelhedom Mọ
5 Tọrobo ịpe ẹrol bọ, oye dị oghol mọ Ạnạnạyạs, r’ạnhir ọdi dị oghol mọ ạ Sạfạịrạ, aal li de. 2 Kụolo ọdi ạsighe ni pạkiri ikpoki phọ aseere, kụ ạnhir phọ ọdi alhegheri aani ni, kụ agbi ọsighe ạpakiri oruom abutelhedom mọ. 3 Kụ a Pita ạḅenhi nyọdi mọ: “Ạnạnạyạs, uḍighi ika kụ nạ amheera bọ mọ a Setạn aakelheghi nyịnha ọgba ọkpe ọḅenhi uwaloor iigbia phọ r’ạaghi ạpakiri ikpoki phọ nạ aal bọ de phọ? 4 Ade phọ íḍighi ḍịen ḍịo ạna kụ nạ agbi bọ aal phọ? Kụ nạ aal bọ de phọ ikpoki phọ íḍighi ḍịen ịlo ạna? Uḍighi ika kụ nạ ạatughian bọ oḍighi ịyaar dị ẹrol ịduon phọ? Nạ mạgba ọkpe ạḅenhi Ẹnhaan, káwe.” 5 Kụ Ạnạnạyạs amheel amhugh mem mọ ạnhaghan bọ ịphen phọ. Kụ oomo ạbuphe ọnhaghan bọ ịphen emite bọ ọmhoogh oboom oghiilhaan. 6 Kụ ugheel ạnmuny phọ oḅerenhu ọsighe rukpe ophurughiom nyọdi, kụ ọpham omitenhom ọghi oḍi.
7 Rẹki ọmhan ịraar ạwa bịn ạnhir phọ ọdi aru, kụolo ólhegheri ịpe memite bọ. 8 Kụ a Pita apuru nyọdi mọ: “Ụḅenhi ịmhi, ịphen phọ ni kụ oomo ikpoki phọ ịyal phọ anyinha aal bọ de phọ?” Kụ ọdi mọ: “Ii, ịpe kụ oomo phọ ịdi.” 9 Kụ a Pita ạḅenhi nyọdi mọ: “Uḍighi ika kụ ịyal phọ anyinha eepuruan bọ ookelheghi uwaloor phọ a Jehova?* Mịin! Bụphe ọsighe bọ olom mọ ạna ọghi oḍi mosi sịphe ọnhu aḍibuo phọ, kụ bịdi kọsighe aani ni nyịnha ọki oḍi.” 10 Mem mem mọ bịn ọdi amheel ghisigh a Pita amhugh. Kụ ugheel ạnmuny phọ roḍigh olhoghi, kụ ọmhiin dị ọdi mamhugh kụ ọpham omitenhom ọghi oḍi otumeriom olom mọ. 11 Kụ oboom oghiilhaan ạrol li esi oomo ookpomhoghan phọ r’ạtorobo oye dị ạnhaghan aani ịlo ịphen phọ.
12 Kụ abutelhedom mọ ụghiom ni ghisigh oḍighi ghan ịbadi ịiḍaany igbo awe phọ; kụ oomo ạbidi ookpomhoghan ghan esi phọ oghol bọ mọ Ạ Vạrạndạ Ạ Sọlọmọn. 13 Kụolo ạbueripho awe phọ ụ́moogh oḅio oḍighan ạbidi; tọrobo ịpe ẹrol bọ, awe ụghaaph ghan ni ịma ịlo ạbidi. 14 Kụ ọnhu ạbal alhephiri r’ạnmariir dị omheeraam Uwo Ẹmhoogh phọ kụ oḍighan bịdi ạbugh ghan bịn. 15 Awe phọ ụpham ghan ni kẹn bụphe úmoon bọ omiteom ẹpe aroḅodo phọ ọmhunheeny ịbam ạrimhinha r’areetere, pịdi mem dị a Pita raten, oogho ọdi ạteeny buniin ạbidi. 16 Kụ aḍita awe ụḅua ghan ni kẹn rạmha phọ etuman bọ Jeruselem oru, kụ ụphamham ghan we dị úmoon r’ạbudi ịkaraph aruwaloor edi loor phọ, kụ abutelhedom mọ ookonhom oomo ạbidi.
17 Kụolo ịphen phọ iphin ni olhoghi* ogbogh ọpinyon rịkia phọ, r’oomo ạbuo ẹku ạ Sạdusi phọ odi bọ r’ọdi, kụ oḅerenhu. 18 Kụ bịdi osiph butelhedom mọ ọlhogh ikoli. 19 Kụolo ọokpaany a Jehova* ạghi ni ḍughul aghunyon rughuugh otu ikoli phọ, kụ amiteom bịdi sịphe otu ikoli phọ kụ ạḅenhi mọ: 20 “Ịki ẹpe otu ịiḅereghi phọ ẹghaaph ghan ẹḅenhi we phọ oomo ịlo aghuḍum mọ ạkuen phọ.” 21 Bịdi rọnhaghan ịphen phọ kụ oḍigh ẹpe otu ịiḅereghi phọ ḍịroor omhiigh ọtughemhi.
Mem mọ ọpo phọ ogbogh ọpinyon rịkia phọ r’ạbuphe ọrol bọ r’ọdi, uukpomhoghi ni we ạ Sạnhẹdrin phọ r’oomo ikumor awe phọ Izrẹl, kụ orom bukoriom ọghi ẹpe otu ikoli phọ ọpham abutelhedom mọ orumhom. 22 Kụolo abukoriom mọ osi bọ ẹpe otu ikoli phọ ụ́miin butelhedom mọ. Kụ bịdi oḅula ọḅenhi bụphe orom bọ bịdi ịpe memite bọ, 23 bịdi ụḅem mọ: “Yoor osi bọ ọkasaghi ni rughuugh otu ikoli phọ, kụ abukoriom ọmeregha sịphe ọnhu aḍibuo phọ, kụolo yoor oḍigh bọ ẹpe olhoghi phọ, yoor ụ́miin oye.” 24 Kụ mem mọ uwo ẹmhu abukoriom otu ịiḅereghi phọ r’aruwo ẹmhu ạbupinyon rịkia phọ ọnhaghan bọ ịphen phọ, ụuḅaghamhian ni loor, esi ịduon úlegheri bọ ịpe kẹḅilhe bọ emite. 25 Kụolo oye aru ni ạḅenhi bịdi mọ: “Ịmiin! Awe phọ nyinha ẹlhogh bọ ikoli phọ odi ẹpe otu ịiḅereghi phọ rọtughemhi ghan we phọ.” 26 Kụ uwo ẹmhu abukoriom otu ịiḅereghi phọ r’abukoriom otu ịiḅereghi phọ ọghi ọpham butelhedom mọ orumhom, kụolo úḍighi butelhedom mọ ịyaar loor esi dị ughiilhaan ghan mọ awe phọ kotoḅol bụno ikpo.
27 Kụ bịdi ọpham butelhedom mọ oru ọmheremhi ghisigh ạ Sạnhẹdrin phọ. Kụ ogbogh ọpinyon rịkia phọ ạḅenhi bịdi mọ: 28 “Yoor ịphur ri inyinha rụru mọ kị́tughemhi mụn ịlo aḍien phọ ạḍien phọ, kụolo ịmiin! nyinha melheenye ịtughemhi phọ anyinha oomo a Jeruselem, kụ nyinha rẹwa oḍighi ịdi ịḅaal oye phọ ọphon phọ kẹtol ẹmhu ayoor.” 29 Kụ a Pita r’ạbueripho abutelhedom mọ ọphagharanhaan mọ: “Ẹnhaan kụ ọtooghia dị yoor kọnaghanhan kpạripe r’ọnhaghanhan awe. 30 Ẹnhaan ạburude ạburude phọ ayira aḅeton ni Jizọs esi aḍuugh, ọpo nyinha ẹkan bọ loor oreeny eghiigh. 31 Kụ Ẹnhaan maphophe nyọdi aseere ḍịghaagh elhiom ọdi, kụ ạma nyọdi ịdipho Ọkpanha Oḍiemhiom rạ Ọpelia, pịdi aḍighi ịdi awe phọ Izrẹl kokiton ọmoogh ọsar ọwilhenhaan. 32 Yoor mọmhiin kụ rọkaaph bọ rạraar phọ ịphen phọ, kụ uwaloor iigbia phọ Ẹnhaan rạngo ghan bọ bụphe ọsighe bọ nyọdi ịdipho ọtooghia kụ ọḅilhe bọ rọnaghanhan ghan nyọdi raḍighi aani ghan ni ịduon phọ.”
33 Bịdi ọnhaghan bọ ịphen phọ, ụghagh ni ilhoghi kụ ọwa ọze abutelhedom mọ. 34 Kụolo ọnyo ạ Fạrisi dị oghol mọ ạ Gạmelịẹl; ọtughemhia Olhogh phọ dị oomo awe phọ ọlhogh ni eegu, aḅetenhu ni sịphe ạ Sạnhẹdrin phọ kụ ạḅem mọ ọsighe we phọ omiteom erugh ẹnum. 35 Kụ ọdi ạḅenhi bụphe ookpomhoghan bọ pạ ạ Sạnhẹdrin phọ mọ: “We Izrẹl, igonha loor ịpe nyinha rẹwa bọ oḍighi awe phọ ạbuen phọ. 36 Esi ọmaam, kụ egbi bọ ọteeny ạnyiidipho, a Tiudạs amite ni kụ ạḅem mọ ọno ạman ni mạar, kụ alhephiri ạnmuny dị rọki ni ọmhan 400 uḍighan ni ẹku phọ ọdi, kụolo ughiigh ni nyọdi kụ bụphe ọdaph ghan bọ nyọdi ọwalhalha bịn ẹku phọ ẹpe phọ ephe. 37 Ịphen phọ reten, kụ a Judas oye ọlo ạ Gạlili phọ amite riiḍio phọ rogbi bọ we phọ, kụ awe omhiigh ọdaph ọdi. Kụolo oghiigh bọ nyọdi, oomo ạbuphe ọdaph ghan bọ nyọdi ụwalhalha ni. 38 Esi ịduon phọ, mị kạḅem mọ ịbilhe we phọ ạbuen phọ, kẹ́eḅaghamhi bịdi. Loor esi dị eḍighi mạar dị ịtughemhi phọ ịphen phọ ọbobo oḍighi phọ ọphon phọ ạḅua esi awe kụ aru, pọ kape ni; 39 kụolo eḍighi mạar dị ạḅua esi Ẹnhaan kụ aru pọ nyinha kétue epiemhi bịdi. Ịdipho kụ ílo, eeni nyinha kebe ghan ghụn elhephiri ẹki esi Ẹnhaan.” 40 Kụ bịdi ọsighe oromha phọ ọdi, kụ ọmhagh butelhedom mọ, kụ ọgurogh, kụ ọto ọḅenhi bịdi mọ kụ́kaaph mụn ịlo aḍien phọ a Jizọs, kụ ọwilhe bịdi mọ ogheel.
41 Kụ bịdi ọḅua sịphe ạ Sạnhẹdrin phọ r’ibo, loor ịduon Ẹnhaan magbiom bọ bịdi ịdipho awe dị ọkpeanhaan dị kọtuan ḍien phọ a Jizọs oofolhomhi. 42 Kụ tọrobo aḍio bịdi ụghi ghan ni sịphe otu ịiḅereghi phọ ọḅilhe ọḅua ghan otu ọgba otu, kụ ọghiom ghisigh ọtughemhi ghan ọḅilhe ogbeelhom ghan iiḅi ịinhaghan phọ ịlo ạ Krạịst Jizọs.