Iiḍighi Abutelhedom Mọ
6 Riiḍio phọ ịpe phọ, mem mọ ọnhu ạbal ạbumatuan phọ rạbugh bọ, ạbuo a Ju phọ rọḅa ghan bọ ọnhu a Grik umhiigh ni ogumhom ạbuo a Ju phọ rọḅa ghan bọ ọnhu a Hibru, loor ịduon rọgunhom ghan bọ rukpukelhe ạnmariir ạbuo a Ju phọ rọḅa ghan bọ ọnhu a Grik, mem dị rodiighi rạraar. 2 Kụ a Ḍioph rạ Ịyal phọ ookpomhoghi ḍita ạbumatuan phọ kụ ọḅenhi mọ: “Ị́kpeanhaan dị yoor kọbilhe oḍighi ọtughemhi ghan ekpo ọnhu phọ Ẹnhaan kụ otu odiighi ghan riiḍien ịdaabili. 3 Esi ịduon phọ, bumor phọ, ịsaḅar oḍual awe igbo anyinha dị awe rọkaaph ghan ịma ịlo ạbidi, kụ uwaloor iigbia phọ amuza loor ḅịlhe ọsu olhoghi, pịdi yoor ọma bịdi ophogh oḍighi phọ ọphon ạmhan bọ ni mạar; 4 kụolo yoor kọkuom loor ọoḅereghi ghan ọḅilhe ọtughemhi ghan ekpo ọnhu phọ Ẹnhaan.” 5 Kụ ịphen bịdi ọghaaph bọ ịḅeraan ni oomo awe phọ kụ ọsaḅar Stivin, oye dị ạmhoogh omheeraam dị ạbugh kụ uwaloor iigbia phọ amuza loor, ra Filip, rạ Prọkọrọs, rạ Nạịkenọ, rạ Tạịmọn, rạ Pạmẹnạs, rạ Nikoleọs, oye ọlo Ạntiọk dị maḍigh aani ẹku ịiḅereghi ạbuo a Ju phọ. 6 Kụ bịdi ọsighe we phọ oruom butelhedom mọ, kụ abutelhedom mọ rọoḅereghi kụ ọḅamham rạghaagh ạbidi we phọ.
7 Kụ ekpo ọnhu phọ Ẹnhaan ilheeny ghan bịn elheeny, kụ ọnhu ạbal ạbumatuan phọ ạbugh ghan bịn sịphe Jeruselem; kụ aḍita ạbupinyon rịkia omhiigh omheeraam.
8 A Stivin phọ Ẹnhaan ạseph bọ ạḅilhe ạngo ịikpo, aḍighi yogh ghan igbogh ịiḍaany igbo awe phọ. 9 Kụolo buniin ạbuo ẹku phọ oghol bọ mọ Obughotu Awe Dị Mọtagharan, r’abuniin ạbuo ạ Sạịrini rạ Ạlẹgzạndriạ, r’abuniin ạbuo a Silisia ra Esia, umhiigh ni ọogbaghanhaan ra Stivin. 10 Kụolo bịdi útue ụmerenyan nyọdi loor ọsu olhoghi phọ ọdi r’ịduon uwaloor iigbia phọ ạlhoghonhaan ghan bọ nyọdi ḍịghaagh ọghaaph. 11 Kụ bịdi oḅian we mọ ọḅem mọ: “Yoor ụnhaghan dị ọdi ạghaaph ghan ịkaraph ịlo a Mozis rạ Ẹnhaan.” 12 Bịdi uḍighi ni ịdi awe phọ, r’ikumor awe phọ, r’ạbutughemhia Olhogh phọ ọghagham olhoghi Stivin, kụ oogborion oru ọteeny nyọdi osiph ọpham ọghimhom ẹpe ạ Sạnhẹdrin phọ. 13 Kụ bịdi ọsighe oru we dị kọgba ọkpe ọḅam ẹmhu ọdi, kụ awe phọ ọḅem mọ: “Oye phọ ọphon phọ rạkaaph ghan ịkaraph ịlo esi iigbia phọ ẹphen phọ ra Olhogh phọ. 14 Esi ọmaam, yoor ụnhaghan dị ọdi ạḅem mọ a Jizọs ọpo ạ Nạzạrẹt phọ kalereghi esi iigbia phọ ẹphen phọ kụ ạḅilhe anmeeghi eḍighinhom ạraraar phọ a Mozis ụḅenhi bọ iyira mọ oḍighi ghan.”
15 Kụ oomo awe phọ odi bọ sịphe ạ Sạnhẹdrin phọ ophogh nyọdi, kụ ọmhiin dị arisigh phọ ọdi ạghigh risigh ọokpaany.