Iiḍighi Abutelhedom Mọ
21 Yoor rọkparagha rọwilhe bịdi, kụ yoor oḍigh ụnwunyaru ọghi osi Kọs dị esi yoor ụ́meera, rẹteeny ḍio phọ etum bọ pạ kụ yoor osi Rods, kụ ọḍua pạ ọghi Pạtạrạ. 2 Yoor rọmhiin ụnwunyaru dị ạḅeeny rạki Finisia, kụ yoor ọghi oḍigh onyeenhe. 3 Yoor usi ni esi dị yoor ọmhiin ekpu ogbo phọ ạ Sạịprọs ḍịghaagh ekeeny kụ yoor ọḅeenyom onyeenhe Siria kụ osul pạ Tạyạ oseere adool dị ọsaany sịphe ụnwunyaru phọ. 4 Yoor ụwa ni bụmatuan phọ ọmhiin kụ ọrol ẹpe phọ oḍual aḍughul otu. Kụolo dị eego esi uwaloor iigbia phọ bịdi ụḅenhi ghan Pọl mọ ẹda ọdi kíḍigh Jeruselem. 5 Rẹteeny dị yoor kokeel kụ yoor onyeenhe erelhe phọ ayoor, kụolo oomo ạbidi, emhiigh nmạriir kụ esi ịbam ạnmuny, urelhean ni iyoor ẹpe ẹmha phọ omite. Yoor rosi ẹpe ọgbal ọphiiny phọ kụ yoor okpuḍian ọoḅereghi. 6 Bịdi r’ayoor rọghaaph rọmhan kụ yoor ọghi oḍigh ụnwunyaru phọ kụ bịdi ọghelheghu.
7 Kụ ụnwunyaru phọ ụsighe iyoor sịphe Tạyạ asiemhi Tọlẹmeis, kụ yoor ọghi ọmhagh bumor phọ kụ ọrol r’ạbidi ḍiniin aḍughul otu. 8 Kụ yoor ọḅua ọghi Sịsạriạ ḍio phọ etum bọ pạ, kụ yoor ọghi ka Filip ọkaaphom mọ aḍighi aani bọ oniin igbo oḍual awe phọ ọrol r’ọdi. 9 Ọdi ạmhoogh inya ạnmanyaan dị kạ̋al ilhom* dị rọmiin ghan ịmiin. 10 Yoor rọrol sịphe phọ ịminighan asiḍughul otu kụ oyil dị oghol mọ Ạgạbọs ạḅua Judia aru. 11 Kụ ọdi aru ụteeny iyoor kụ ạsighe okuughaam esin phọ ạ Pọl ạghoroghiom ruwol ọdi r’ạraghaagh ọdi kụ ạḅem mọ: “Uwaloor iigbia phọ ạḅem mọ, ‘Ịduon kụ ịdi ạbuo a Ju phọ odi bọ ẹpe Jeruselem kọkoroghi oye phọ ạmhoogh bọ okuughaam esin phọ ọphon phọ, kụ ọḅogh nyọdi ọngo we areelhe phọ.’” 12 Yoor rọnhaghan ịphen phọ, kụ yoor r’awe phọ ọrol aani bọ sịphe phọ omhiigh ọoḅereghian ọdi mọ kụ́ki Jeruselem. 13 Kụ ạ Pọl ạḅem mọ: “Uḍighi ika kụ nyinha remoghi yogh bọ odughe olhoghi ạmhi? Ilegheri mọ mị ạnya ni dị kokol ḍien Uwo Ẹmhoogh phọ Jizọs ụphaḍi ịmhi r’omhugh ẹpe Jeruselem.” 14 Yoor rọmhiin mọ yoor kótue onme olhoghi ọdi kụ yoor ọwilhe ọkpaariom ọdi* kụ ọḅem mọ: “Ogbi a Jehova* kụ amite.”
15 Ịphen phọ reten kụ yoor ookolhobian onyeenhe ọghi a Jeruselem. 16 Kụ buniin ạbumatuan ẹpe Sịsạriạ ụsighe iyoor ọghimhom kạ Mạnesọn, ọlo ạ Sạịprọs dị aḍighi oniin igbo ạbuḅel ạbumatuan phọ, dị yoor kọtol k’ọdi. 17 Yoor rosi Jeruselem kụ abumor phọ ughuraam iyoor r’ibo. 18 Rẹteeny ḍio phọ etum bọ pạ, kụ ạ Pọl r’ayoor ọghi ọteeny Jems, kụ oomo ikumor awe phọ ụrol li pạ phọ. 19 Kụ ọdi ạmhagh bịdi kụ amhiigh ọḅenhi ạbidi rạraar phọ Ẹnhaan aḍighi bọ igbo awe areelhe phọ dị eego esi ọghaaph iiḅi ịinhaghan phọ ọdi ragbeelhom ghan bọ.
20 Bịdi rọnhaghan ịphen phọ kụ omhiigh oghuenhi Ẹnhaan, kụ ọḅenhi nyọdi mọ: “Umor ayoor, ạsimuunir ạbuo a Ju phọ kụ momheeraam, kụ oomo ạbidi rooko ni Olhogh phọ r’oophugh. 21 Kụolo bịdi ọnaghan dị awe rọkaaph ghan mọ nạ rạtughemhi ghan oomo ạbuo a Ju phọ odi bọ igbo awe areelhe phọ mọ bịdi kụ́daph Olhogh phọ a Mozis, mọ kúḍun ịbam ạnmuny ạbidi ḅịlhe mọ kúḍighi rạraar phọ roḍighi ghan bọ k’iḍiodi phọ. 22 Kụ yira koḍighi ika? Loor esi dị bịdi kọnaghan ni mọ nạ maru. 23 Ḍighi ịphen yoor kọḅenhi bọ nyịnha: Inya alhephiri ạnmuny odi ni r’ayoor dị oghunya iikunya. 24 Pạm bịdi ẹghi ẹḅaalhamhi loor anyinha ọdaphan ịpe olhogh phọ ạḅem bọ, kụ ạkpeeghi tọrobo ịlo emhoghi pịdi ọsam rụmhu ạbidi. Bịn oomo awe molhegheri mọ ạraraar phọ bịdi ọnhaghan bọ ịlo ạna kị́ne, kụolo mọ nạ rạzo ni agey kạḅilhe aako Olhogh phọ. 25 Kụ ịdi egbolhomaam bụo areelhe phọ momheeraam bọ, yoor mọge ni ḍịnya ọkiom bịdi ịlo osopha phọ ayoor mọ bịdi ọghiom ghisigh ọḍua ghan esi ạraraar dị ọphinyon ọngo ịkaaghinheen ạrumhugh, r’esi ịḅaal, r’esi ẹnham dị ọphur orum kụ oghiigh* r’esi ọrolhan esi dị ụ́ḅaal.”*
26 Rẹteeny ḍio phọ etum bọ pạ kụ ạ Pọl ạpham we phọ ạghimhom kụ ọdi r’ạbidi ọḅaalhamhi siloor ạbidi, ọdaphan ịpe olhogh phọ ạḅem bọ, kụ ọdi aḍigh otu ịiḅereghi phọ oghol aḍio phọ ọḅaalhamhi aloor phọ ạbidi kasi bọ eekunha, pịdi ọpinyon rịkia phọ akol tọrobo ọnyo ạbidi ạpighiron ẹkia ḍio phọ ạḍiphe phọ.
27 Rẹteeny dị oḍual aḍughul otu phọ kesi eekunha, bịn ạbuo a Ju dị ọḅua Esia oru ọmhiin nyọdi ẹpe otu ịiḅereghi phọ, kụ oḍighi ịdi aḍita awe phọ ọghagham nyọdi ilhoghi, kụ ọghi osiph nyọdi, 28 kụ ọlooghi ghan mọ: “We Izrẹl, itu o! Ọphon kụ oye phọ rạtughemhi ghan bọ we tọrobo ekpisi ịkaraph ạraraar ịlo awe phọ ayira ra Olhogh phọ r’esi phọ ịsien phọ. Kụ ọḅaram ịphen phọ, ọdi mạpham kẹn bụo a Gris aḍighom sịen otu ịiḅereghi phọ ạapuom esi iigbia phọ ẹphen phọ.” 29 Loor esi dị bịdi mọmhiin ẹpe ẹmha phọ Trọfimọs phọ aḍighi bọ ọlo Ẹfẹsọs dị odi rạ Pọl, kụ ọsighe mọ ạ Pọl mạpham nyọdi aḍighom ẹpe otu ịiḅereghi phọ. 30 Oomo ẹmha phọ iphiigha ni kụ awe phọ oghiil oru osiph Pọl, kụ ọpham nyọdi ẹpe otu ịiḅereghi phọ omiteom, kụ oogborion oghughi rughuugh phọ. 31 Bịdi odi ni rọwa oghiigh ọdi, kụ ịinhaghan ẹghi ẹteeny oḍiemhiom ạbuo ẹgham mọ, mọ ịiḅaghamhi mesoor Jeruselem; 32 kụ ọdi aagborion ạpham bụo ẹgham r’aruwo ẹmhu ạbuo ẹgham mọ aghiil ạghi ạteeny bịdi. Bịdi rọmhiin oḍiemhiom ạbuo ẹgham mọ r’ạbuo ẹgham mọ kụ ọwilhe okuphogh ạ Pọl.
33 Oḍiemhiom ạbuo ẹgham mọ aru ni ạpham Pọl ạḅuanham kụ ạto ạḅem mọ ọkasaghiom nyọdi ịyal izime; kụ apuru ọdo oye phọ ọdi aru bọ r’ịyaar phọ ọdi aḍighi bọ. 34 Kụ aḍita awe phọ omhiigh ọghaaphogh ạraraar kịrokiro r’ạroḍogh dị ẹghi ạnyu. Kụ loor ọyugh phọ ọdi órue olhegheri ịpe remite bọ, kụ ạto mọ ọpham Pọl ọghimhom ẹpe amarugh ạbuo ẹgham mọ. 35 Kụ ọdi asi bọ sịphe ẹedanheen phọ, ạbuo ẹgham mọ ụpham ni nyọdi loor ịduon awe phọ ọwa ghan bọ oḍighi ọdi ịyaar, 36 ịdi eḍighi bọ ịbadi sịphe aḍita awe phọ ụdaph ghan ni nyọdi kụ ọlo ghan mọ: “Ikiigh nyọdi!”
37 Ịduon rọwa bọ ọpham ạ Pọl oḍighom ẹpe amarugh ạbuo ẹgham mọ, kụ ọdi apuru oḍiemhiom ạbuo ẹgham mọ mọ: “Mị atue ni ạḅenhi nyịnha ịyaar?” Kụ oye phọ mọ: “Nạ ạmaar ri ọḅa ọnhu a Grik? 38 Nạ ḍien kọ́lo Ijipt phọ aḍighi bọ ịdi awe ọgbagharan bụo ịtooghi phọ ẹpe ọmhan ạḅilhe bọ ạpham 4,000 ạrookom enu phọ ạghimhom ẹpe ẹdala phọ?” 39 Kụ ạ Pọl mọ: “Ọkar ọghaaph, mị ọnyo a Ju, kụ mị ọlo ạ Tạsọs ẹpe Silisia, mị ọlo ẹmha dị awe olhegheri ni agey. Seseeny, ụngo ịmhi eepoogh ọḅaanhaan awe phọ.” 40 Ọdi romheera, kụ ạ Pọl ạmheera sịphe ẹedanheen phọ ạmaaghian mọ awe phọ oḅoroghian. Awe phọ roḅoroghian, kụ ọdi ạḅa ọnhu a Hibru ạḅenhi bịdi mọ: