Iiḍighi Abutelhedom Mọ
16 Ạ Pọl asi ni Dẹbi kụ ạḅua pạ ạghi Listrạ. Kụ ọnyo ạmatuan ạrol li ẹpe phọ dị oghol mọ a Timoti, onhiin phọ ọdi ọnyo ạmatuan dị aḍighi ọnyo a Ju kụolo ọde ọdi ọlo a Gris. 2 Kụ abumor phọ odi bọ Listrạ rạ Ạịkoniọm ụghaaph ghan ni ịma ịlo a Timoti. 3 Kụ ạ Pọl ạwa ni mọ ọdi ạdaph nyịnho, kụ ạpham nyọdi ạghi aḍun loor ẹmhu ạbuo a Ju phọ odi bọ rikpisi phọ ịpe phọ, ịdi eḍighi bọ oomo ạbidi ulhegheri ni mọ ọde phọ ọdi ọlo a Gris. 4 Ịduon bịdi ọḍua bọ ẹmha rọgba ẹmha, bịdi ụḅenhi ghan ni bumor phọ osopha phọ abutelhedom mọ r’ikumor awe phọ odi bọ Jeruselem mosopha bọ pịdi abumor phọ ọdaph. 5 Ịphen phọ ịkparamhi ni omheeraam abumor phọ odi bọ rookpomhoghan phọ kụ ọnhu ạbal ạbumatuan phọ ạbugh ghan bịn ḍio etum ḍio.
6 Ọḅaram ịsien, bịdi uten ni Frijia r’eelhe phọ ạ Gạlesia loor esi dị uwaloor iigbia phọ ómheera mọ bịdi ogbeelhom ekpo ọnhu phọ Ẹnhaan ẹpe Esia. 7 Bịdi osi bọ Misia, ụkparagha ni ọghi a Bitinia, kụolo uwaloor phọ a Jizọs ómheera mọ bịdi ọghi. 8 Esi ịduon phọ bịdi uugo ni Misia oru Troạs. 9 Kụ ḍughul, ạ Pọl ạmhiin ni oye ọlo ạ Mạsidonia uḍien dị ạmheera rạaḅereghian ghan nyọdi mọ: “Ḅẹeny ẹphen Mạsidonia ụlhoghonhaan iyoor ḍịghaagh.” 10 Ọdi rọmhiin uḍien phọ bịn yoor onyeenhe Mạsidonia, loor esi dị yoor uzipheriom mọ Ẹnhaan kụ urom iyoor ọghi ogbeelhom iiḅi ịinhaghan phọ ọḅenhi ạbidi.
11 Yoor uḍigh ụnwunyaru pạ Troạs osi Sạmotres dị esi yoor ụ́meera, rẹteeny ḍio phọ etum bọ pạ kụ yoor osi Nịạpọlis; 12 kụ ọḅua pạ ọghi Filipạị, ẹmha a Rom dị eḍighi ẹkpanha ẹmha ẹpe ekool phọ a Mạsidonia. Kụ yoor ọrol ẹpe phọ iphurukpu asiḍughul otu. 13 Rẹteeny Ḍio Ophooghian phọ kụ yoor omite ẹmha phọ ọghi oogbom ọphiiny, esi dị yoor ogbiom mọ esi ịiḅereghi, kụ yoor ọrol ude omhiigh ọghaaphan ạnmariir dị ookpomhoghan pạ phọ. 14 Kụ ạnhir ọlo ạ Tạyạtạịrạ dị oghol mọ a Lidiạ, dị rạaḅereghi ghan Ẹnhaan kạḅilhe aal roodor arukpe, ạnhaghan ghan ni ịpe yoor rọkaaph bọ, kụ a Jehova* ạlhoghonhaan nyọdi ḍịghaagh olher ạruru r’omheeraam ịpe ạ Pọl rạkaaph bọ. 15 Ọdi r’eghun otu ọdi roḍiiny mụum, kụ ụḅenhi iyoor mọ: “Eḍighi mạar dị nyinha ịmhiin ni ịmhi ịdipho ẹbenhe a Jehova,* pọ itu k’ạmhi ẹrol.” Ọdi ụuḅereghian ni iyoor tụtu yoor ọghi k’ọdi.
16 Ḍiniin aḍio dị yoor rọki ẹpe esi ịiḅereghi phọ, ọnyanhi otu dị ọkaraph uwaloor idike odi loor aru ni ụteeny iyoor. Ọdi agboomhi ghan ni bụrude otu phọ ọdi esi ọghaaph ghan ạraraar dị kemite. 17 Kụ ọnyanhi phọ ọphon phọ ạdaph ghan ni Pọl r’ayoor kụ ạlo ghan mọ: “Awe phọ ạbuen phọ ạrebenhe Ẹnhaan phọ Apelheghiom bọ kụ rogbeelhom ghan kịḅenhi inyinha ịdi nyinha keḍighi kụ ẹmoogh pẹlieeny.” 18 Kụ ọnyanhi phọ aḍighi ghan ni ịduon phọ ịbadi asiḍughul otu. Kụ ịpher ri Pọl kụ aaghiraan asoman nyọdi kụ ạḅenhi ọkaraph uwaloor phọ mọ: “Esi aḍien phọ a Jizọs Krạịst, mị rạḅenhi ghan nyịnha mọ mite loor ọdi.” Kụ ọkaraph uwaloor phọ amite mem mem mọ.
19 Kụ ạburude otu phọ ọdi ọmhiin bọ mọ ịlo ọḅilhe ọmhoogh ạraraar phọ bịdi ọmhoogh ghan bọ ílo mụn, bịdi usiph ni Pọl rạ Sạịlạs onyeenheom ẹpe aḍighi phọ ạbutooghia phọ odi bọ. 20 Rosiemhi bịdi ghisigh ạbutooghia ẹmha phọ kụ ọḅem mọ: “Awe phọ ạbuen phọ rọoḅaghamhi ni ẹmha phọ iboom. Bịdi ạbuo a Ju, 21 kụ rọtughemhi ghan eḍighinhom ạraraar dị ị́kpe dị yira ạbuo a Rom kọdaph.” 22 Kụ aḍita awe phọ ozuom bịdi, kụ ạbutooghia ẹmha phọ ọphanyi rụsuoma ạ Pọl rạ Sạịlạs, kụ ọngo ịto mọ ọguroghom bịdi ịkpara. 23 Rọgurogh bịdi iboom, kụ ọlhogh ikoli kụ ọto ọḅenhi okoriom ikoli phọ mọ ạmhaar akori bịdi. 24 Kụ loor ịto phọ ọngo bọ nyọdi, ọdi ạlhogh ni bịdi osoph ikoli phọ odi bọ ẹpe ọkar olhoghi phọ kụ ạlhoghoḍi ruwol ạbidi olhool.
25 Kụolo ogbo aḍughul, ạ Pọl rạ Sạịlạs ụuḅereghi ghan ni ọḅilhe ọmhoor sụor oboom ghan Ẹnhaan, kụ ạbueripho ạbuo ikoli phọ ụnhaghan ghan ni. 26 Kụ ekperenhom bịn ade phọ ephiigha iboom, kụ otu ikoli phọ aphiigha k’iphighiom. Ọḅaram ịsien, oomo arughuugh phọ ighunyonhu ni eginha amem, kụ ạraraar phọ ọkasaghiom bọ bụo ikoli phọ ẹkanyanhu. 27 Okoriom mọ ạsuma bọ ạmhiin mọ arughuugh otu ikoli phọ meghunyonhu, aruph ni elhool ẹgham ọdi ạwa oghiigha aloor, ịdi eḍighi bọ ọdi agbi ghan mọ ạbuo ikoli phọ mosumughu. 28 Kụolo ạ Pọl ạlo mọ: “Kákiigha loor ạna, oomo ayoor odi ni sịen!” 29 Kụ okoriom mọ ạḅem mọ ọngo nyịnho ịtozi, kụ aagborion aḍigh ẹpe otu ikoli phọ, kụ akpuḍian ghisigh ạ Pọl rạ Sạịlạs rapiigha loor oghiilhaan. 30 Kụ ọdi ạpham bịdi amitenhom erugh kụ apuru mọ: “We phọ, mị kaḍighi eeghe kụ ạmoogh pẹlieeny?” 31 Kụ bịdi ọḅenhi nyọdi mọ: “Meeraam Uwo Ẹmhoogh phọ Jizọs bịn nạ kạmoogh ni pẹlieeny, nạ r’eghun otu phọ ạna.” 32 Kụ bịdi ọghaaph ekpo ọnhu phọ a Jehova* ọḅenhi nyọdi r’oomo ọto ọdi. 33 Kụ ọdi ạpham bịdi ḍughul ḍughul phọ ạḍiphe phọ ạghi agbuurogh riisi phọ ạbidi. Kụ oḍiinye oomo eghun otu phọ ọdi r’ọdi mụum dị mem útoph. 34 Kụ ọdi ạpham bịdi ạghimhom olhoghi otu kụ ạḅamhaghinhaan bịdi eḍien ịdaabili, kụ oomo eghun otu phọ ọdi r’ọdi ọmhoogh iboom ibo loor ịduon ọdi mamheeraam bọ Ẹnhaan.
35 Rẹḅaal, kụ ạbutooghia ẹmha phọ orom bukoriom ạbidi mọ ọghi ọḅem mọ: “Isereghi we phọ ạbuphe phọ.” 36 Kụ okoriom ikoli phọ ạghi ạḅenhi Pọl dom mọ ạbidi mọ: “Ạbutooghia ẹmha phọ morom we mọ oru ọḅem mọ oseere ịyal phọ anyinha. Esi ịduon phọ imite egheel r’ẹepho.” 37 Kụolo ạ Pọl ạḅenhi bịdi mọ: “Bịdi ụgurogh iyoor esi ogbo, dị iyoor úsophonhaan ọoruen, mem dị yoor oḍighi ni bụo a Rom, ọḅilhe ụlhogh iyoor ikoli. Kụ nyịidipho bịdi rọwa omhian oseere ayoor? Ugbi ni! Bịdi kụ ọru r’aloor urorori iyoor omiteom.” 38 Kụ abukoriom mọ ọghi ọḅenhi bụtooghia ẹmha phọ ịphen phọ. Kụ bịdi ụmhoogh ni oghiilhaan mem mọ ọnhaghan bọ mọ awe phọ ạbuo a Rom. 39 Esi ịduon phọ bịdi uru ni ọoḅereghian Pọl rạ Sạịlạs, kụ ororori bịdi omiteom, kụ ọlhom mọ bịdi ọḍua ẹmha ạbuno. 40 Kụolo bịdi omite bọ sịphe ikoli phọ ụghi ka Lidiạ; rọmhiin bumor phọ kụ ọkparamhi kụ onyeenhe ọḍua.