Iiḍighi Abutelhedom Mọ
17 Bịdi uugo Ạmfipolis rạ Ạpọlonia osi Tẹsạlonạịkạ, kụ obughotu ạbuo a Ju ạrol li ẹpe phọ. 2 Kụ ịdipho eḍighi bọ eḍighinhom ịyaar ạ Pọl, ọdi aḍigh ni ẹpe obughotu phọ ạteeny bịdi, kụ esi ịraar aḍio ophooghian ọdi r’ạbidi ugbiran ghan ni ịpe Ịge Iigbia phọ ẹḅem bọ. 3 Ọdi ạgba ghan aagholhomhi ạḅilhe ạmaaghi ghan rạraar dị ọge dị eḍeenhaan mọ ịkpe ni dị ạ Krạịst phọ kạmiinhom ạḅilhe aḅetenhu esi aḍuugh, ọdi ạḅem ghan mọ: “A Jizọs phọ mị ragbeelhom bọ kịḅenhi inyinha kụ ạ Krạịst phọ.” 4 Esi ịduon phọ, buniin ạbidi umheeraam ni kụ oḍighan Pọl rạ Sạịlạs, kụ ịbadi ạbuo a Gris dị rọoḅereghi ghan Ẹnhaan, r’ịminighan ikpolhom ạnmariir phọ uḍighan aani ni bịdi.
5 Kụolo ịphen phọ iphin ni ilhoghi* ạbuo a Ju phọ, kụ ookpomhoghi bụkaraph awe dị rotelhe yogh ẹpe aḍighi phọ kụ awe phọ omhiigh ọkomogh ịiḅaghamhi sịphe ẹmha phọ. Kụ bịdi okul otu a Jesin oḍigh ọwa ghan Pọl rạ Sạịlạs ọsighe omiteom ẹpe awe phọ ạbuphe phọ odi bọ. 6 Kụ loor ịduon bịdi ụ́miin bọ Pọl rạ Sạịlạs, ụpham ni Jesin r’abuniin abumor ọghiom bụtooghia ẹmha phọ, kụ ọḅem mọ: “Awe phọ mọkomhogh bọ ịiḅaghamhi oomo ịsien ade phọ moru aani ẹphen ẹmha phọ ayira, 7 kụ a Jesin mạsighe bịdi ạlogh otu. Oomo awe phọ ạbuen phọ rọgbagharan ghan iilhogh phọ a Siza, bịdi rọḅem ghan mọ ọnhon uwo ẹmha odi ni dị oghol mọ a Jizọs.” 8 Kụ iphin ni ilhoghi aḍita awe phọ r’ạbutooghia ẹmha phọ mem mọ ọnhaghan bọ ịphen phọ; 9 kụ ạbutooghia ẹmha phọ rạar Jesin r’ạbueripho ikpoki ọphelhaam ạrumhu ạbidi, kụ oseere bịdi.
10 Reghul bịn abumor phọ ọsighe Pọl rạ Sạịlạs onyeenheom Bẹria. Bịdi rosi kụ ọghi ẹpe obughotu ạbuo a Ju phọ. 11 Kụ bụphe ọrol bọ Bẹria kụ ụmhoogh ẹephua ọtuugha ịyaar opu bụphe ọrol bọ Tẹsạlonạịkạ, ịdi eḍighi bọ bịdi ụnhaghan ni ekpo ọnhu phọ Ẹnhaan r’ophooph olhoghi kụ omhiigha loor ọoḅeghion ghan Ịge Iigbia phọ ḍio etum ḍio ọmhiin mụghumo ạraraar phọ bịdi ọnhaghan bọ ịne ni. 12 Esi ịduon phọ, ịbadi ạbidi umheeraam ni, kụ ịminighan ạnmariir dị oḍighi bụo a Gris dị awe ọlhogh ni eegu r’abuniin alhephiri ạnmuny phọ umheeraam ni kẹn. 13 Kụolo ạbuo a Ju phọ odi bọ Tẹsạlonạịkạ rọnhaghan mọ ạ Pọl ragbeelhom aani ekpo ọnhu phọ Ẹnhaan ẹpe Bẹria, kụ oru oḍighi ịdi aḍita awe phọ ọghagh ilhoghi ọḅilhe oruphe. 14 Kụ abumor phọ oogborion ọsighe Pọl onyeenheom ẹpe ọphiiny ạbazi phọ, kụolo ạ Sạịlạs ra Timoti ụrol li Bẹria. 15 Awe phọ ọdaph bọ Pọl usiemhi nyọdi k’ẹpe Ạtẹns, kụ ạ Pọl rọḅenhi bịdi mọ ạ Sạịlạs ra Timoti oru ọteeny nyịnho eginha amem kụ bịdi ọḅua.
16 Kụolo ịduon ạ Pọl odi bọ Ạtẹns rakori bịdi, ọdi ạmhiin ni ịkaaghinheen ạrumhugh phọ emuza bọ ẹmha phọ kụ olhoghi ọdi eeph. 17 Ọdi ạghi ni ẹpe obughotu phọ amhiigh ọghaaphan ạbuo a Ju phọ r’ạbunhon awe dị rọoḅereghi ghan Ẹnhaan, kụ tọrobo aḍio ẹpe aḍighi phọ ọdi ạghaaphan ghan ni bụlo ọdi ạmhiin. 18 Kụolo buniin ạbuo igbogh ịtuugha dị rọdaph ghan ịtughemhi Ẹpikọrọs* r’ạbudi rọdaph ghan ịtughemhi ạ Zẹno* umhiigh ni ọogbaghanhaan r’ọdi, buniin ụḅem ghan mọ: “Ọokureeny* phọ ọphon phọ ạmoogh eeghe ịyaar ọghaaph?” Kụ bụnhon mọ: “Ẹkigh mụdi ọdi rạkaaph ghan ịlo iiruen ạrumhugh.” Bịdi ụghaaph ịphen phọ loor esi dị ọdi agbeelhom ghan iiḅi ịinhaghan phọ ịlo a Jizọs r’oḅetenhu esi aḍuugh phọ. 19 Kụ bịdi ọpham nyọdi ọghimhom ẹpe Ạriopạgọs phọ kụ opuru mọ: “Imhoom ịtughemhi phọ ịphen nạ rạtughemhi bọ ịghen? 20 Ịdi eḍighi bọ nạ rạkaaph ghan rạraar dị yoor kọ̋nhaghan ghan, kụ yoor rọwa ni olhegheri ẹmhu ạraraar phọ ịphen phọ.” 21 Ọkar ọghaaph, eginha ịyaar dị oomo awe Ạtẹns r’aruuruen dị odi* ẹpe phọ oḍighi ghan mem dị bịdi ụ́moogh ịyaar oḍighi pọ ọghaaph ghan r’ọnhaghan imhoom ạraraar. 22 Kụ ạ Pọl ạmheera sịphe Ạriopạgọs phọ kụ ạḅem mọ:
“Weye Ạtẹns, mị ạmiin mọ esi oomo ạraraar ẹkigh mụdi nyinha kụ rekiilhaan ghan rụmhugh phọ kepu bụnhon awe. 23 Esi ọmaam, mem mọ mị raten bọ mị ukiririom ghan ni aphogh rạraar phọ nyinha rẹeḅereghi ghan bọ, kụ mị ụmhiin eniin ẹkpan dị ọge mọ ‘Ẹlo Ẹmhugh Dị Úlegheri.’ Esi ịduon phọ ẹmhugh phọ ẹpe nyinha ílegheri bọ kụ rẹeḅereghi kụ ẹdi mị ragbeelhom bọ kịḅenhi inyinha. 24 Ẹnhaan phọ ạlhem bọ aḅirinhi phọ r’oomo ạraraar phọ edi bọ sịen aḅirinhi phọ rátugh ghan ruutu ịiḅereghi dị awe kụ ọlhogh, loor esi dị ọdi kụ Uwo Ẹmhoogh ạke phọ r’ade phọ; 25 kụ ịyaar rékuom ghan nyọdi dị ọdi kapuru ọlhoghonhaan ạḍighaagh awe, loor esi dị ọdi r’aloor kụ rạngo ghan oomo awe ghuḍum r’aḍiphooghu r’oomo ạraraar. 26 Esi oniin oye kụ ẹdi ọdi amiteom oomo awe areelhe phọ mọ ọrol sịen ade phọ, kụ ọdi ạsaḅar mem dị ọmaanhaan ạḅilhe ạma rụuku ariisi dị awe kotugh osi, 27 pịdi bịdi ọwa Ẹnhaan. Kụ eru mạar dị bịdi ọkuamhi ọlhogh ikuph ọwa nyọdi, pọ kọmiin ni nyọdi, kụolo ọkar ọghaaph, ọdi ọ́kelhan ọnyo ayira. 28 Ịdi eḍighi bọ esi ọdi kụ ẹdi yira ọmhoogh bọ ghuḍum ọḅilhe odi rotelhe, ịdipho buniin anyinha dị rọgeeghi ghan rịnya ọghaaph bọ ni mọ: ‘Yira phọ kẹn ạnmuny ọdi.’
29 Loor ịduon yira oḍighi bọ nmụny Ẹnhaan, kụ́utughian mọ Ẹnhaan phọ ạkigh gol ọbobo silva ọbobo ḍighiigh dị awe kụ ọotughian bịn ọka. 30 Ọkar agey, Ẹnhaan aphogh ni ạgunhom mem mọ ọpo awe úlegheri bọ nyọdi; kụolo nyịidipho ọdi rạḅenhi ghan we oomo arikpisi mọ okiton. 31 Loor esi dị ọdi magu ḍio dị ọdi kaagbo ịiruen dị eeleeny ạngo oomo awe phọ orugh bọ sịen ade phọ dị eego esi oye dị ọdi mạma, kụ ọdi maḍeenhaan oomo awe mọ aḍio phọ ạḍiphe phọ ketu ni esi oḅeton oye phọ ọpo phọ esi aḍuugh.”
32 Bịdi rọnhaghan ịlo oḅetenhu esi aḍuugh phọ, kụ buniin omhiigh ọmhilhogh ọdi, kụ bụnhon ọḅem ghan mọ: “Yoor kọḅilhe ni ọnaghan ọghaaph phọ ạna ọphon phọ ẹnhon amem.” 33 Kụ ạ Pọl ạwilhe bịdi ạḅua, 34 kụolo buniin awe udạph ni nyọdi kụ omheeraam. Buniin ạbuen phọ pọ ạ Dạyọnisiọs, oogboom ịiruen sịphe Ạriopạgọs phọ, r’ạnhir dị oghol mọ ạ Dạmạris r’ạbunhon.