Iiḍighi Abutelhedom Mọ
18 Ịphen phọ reten kụ ọdi ạḅua Ạtẹns ạghi Kọrịnt. 2 Kụ ọdi ạmhiin ni ẹpe phọ ọnyo a Ju dị oghol mọ Ạkuila, ọlo ạ Pọntọs dị kébia ạḅua Itạli ạghi ẹpe phọ r’ạnhir ọdi Prisilạ, loor esi dị ạ Klọdiọs ạngo ni ịto mọ oomo ạbuo a Ju ọḍua Rom. Kụ ọdi ạghi ni ạteeny bịdi, 3 ạrol k’ạbidi akumuan ghan r’ạbidi loor esi dị ọdi r’ạbidi ụḅoph oḍighi ọkolhogh ghan arukpe ọlhoghom arogbogo. 4 Tọrobo aḍio ophooghian ọdi ạghi ghan ni sịphe obughotu phọ ạghaaphan we phọ ạḅilhe ạghaaph ghan aḅonyon ilhoghi ạbuo a Ju phọ r’ạbuo a Gris.
5 Kụ ạ Sạịlạs ra Timoti ụḅua ni Mạsidonia oru ọteeny Pọl kụ ọdi ạlhogh muboom amem agbeelhom ghan ekpo ọnhu phọ Ẹnhaan, ạghaaphan ghan bụo a Ju phọ ọma oḍeenhaan mọ a Jizọs kụ ạ Krạịst phọ. 6 Kụolo awe phọ úmeera ụsighe ịpe ọdi rạkaaph bọ, ụḅenhi yogh ghan ghụn nyọdi, esi ịduon phọ ọdi agun ni rụsuoma ọdi kụ ạḅenhi bịdi mọ: “Ịḅaal anyinha ẹrol ẹmhu anyinha. Ạraghaagh ạmhi ẹḅaal li. Emhiigh nyịidipho kụ rẹki mị kạki ghan ạteeny we areelhe phọ.” 7 Kụ ọdi ạḅua sịphe* phọ ạghi k’oye dị oghol mọ a Tisiọs Jọstọs, dị rạaḅereghi ghan Ẹnhaan, kụ otu oye phọ atuman obughotu phọ. 8 Kụ a Krispọs phọ aḍighi bọ oḍiemhiom ịsiphe obughotu phọ r’oomo ạbuo eghun otu ọdi umheeraam ni Uwo Ẹmhoogh phọ. Kụ ịbadi ạbuo ạ Kọrịnt dị ọnhaghan iiḅi ịinhaghan phọ umhiigh ni omheeraam aani, kụ oḍiiny ghan mụum. 9 Kụ ḍughul, Uwo Ẹmhoogh phọ ạḅenhi ni kẹn Pọl esi uḍien mọ: “Kạ́moogh oghiilhaan, kạaph ghan bịn, káḅoorian, 10 loor esi dị mị odi ni r’ạna kụ oye nyịnha kázuom oḍighi ịyaar, ịdi eḍighi bọ mị ạmoogh ni ịbadi awe sịen ẹmha phọ ẹphen phọ.” 11 Esi ịduon phọ ọdi ạrol li ẹpe phọ lhạ r’odiiny ụnwanyu ạtughemhi ghan bịdi ekpo ọnhu phọ Ẹnhaan.
12 Mem mọ ạ Gạlio kụ aḍighi bọ opoghom* Ạkeyạ, ạbuo a Ju phọ uupuruan ni osiph Pọl ọghimhom ẹpe ạgada ịiruen phọ, 13 kụ ọḅem mọ: “Oye phọ ọphon phọ rạtughemhi ghan we ọoḅereghi Ẹnhaan eten dị ẹgbagh olhogh phọ.” 14 Kụolo ạ Pọl rạki bọ ọghaaph aani ịyaar bịn ạ Gạlio ạḅenhi bụo a Ju phọ mọ: “Weye a Ju, eru mạar dị oye phọ ọphon phọ ạkar ri aḍighi ịkaraph ọbobo asoor olhogh ọbo mị mụmoogh ni ịyaar oghol olher ạruru ọngo anyinha. 15 Kụolo loor ịduon eḍighi bọ ịikonoghian ịlo ikpo ọnhu r’asiḍien r’olhogh phọ anyinha, pọ nyinha r’aloor ịki ẹghaaph. Mị ụ́wa oḍighi oogboom ịiruen ịdo ạraghaaph phọ ịphen phọ.” 16 Ọdi rọghaaph ịphen phọ kụ aphorogh bịdi sịphe phọ. 17 Kụ bịdi osiph Sọstẹnis phọ aḍighi bọ oḍiemhiom ịsiphe obughotu phọ omhiigh okuphogh ọdi sịphe aghisigh ạgada ịiruen phọ. Kụolo ạ Gạlio ọ́lhogh rọlhogh ọnhu mem mọ ịphen phọ remite bọ.
18 Tọrobo ịpe ẹrol bọ, ạ Pọl rọḅilhe ọrol ẹpe phọ ịminighan asiḍughul otu, kụ ạḅenhi bumor phọ mọ ọmhaar ọrol kụ aḍigh ụnwunyaru anyeenhe Siria, kụ a Prisilạ rạ Ạkuila ụdaph ni nyọdi. Kụ ọdi aagbo ni sịlhaal ọdi ẹpe Sẹnkrịạ loor esi iikunya dị ọdi aghunya. 19 Bịdi rosi Ẹfẹsọs, kụ ọdi ạwilhe bịdi pạ ẹmha phọ ạghi ẹpe obughotu phọ ạtughemhi ghan bụo a Ju phọ. 20 Kụ bịdi ọoḅereghian ghan nyọdi mọ ạḅilhe ạrol ẹeny ephurukpu, kụolo ọdi ómheera, 21 ạḅenhi ghụn bịdi mọ ọmhaar ọrol, ọdi ạḅem kẹn mọ: “Eḍighi ogbi a Jehova pọ mị kạḅilhe ni aḅula ịmhiin inyinha.” Kụ ọdi aḍigh ụnwunyaru sịphe Ẹfẹsọs 22 ạghi asi Sịsạriạ. Kụ ạḅua sịphe ạghi Jeruselem aphogh ookpomhoghan phọ kụ anyeenhe Ạntiọk.
23 Ọdi rọrol ẹpe phọ ephurukpu, kụ ạḅua ạghi rạmha eelhe phọ ạ Gạlesia ra Frijia ạkparamhi oomo ạbumatuan phọ.
24 Kụ ọnyo a Ju dị oghol mọ Ạpọlọs, ọlo Ạlẹgzạndriạ, aru ni Ẹfẹsọs; ọdi aḍighi oye dị ạmhaar rạghaaph kụ alhegheri Ịge Iigbia phọ agey. 25 Mọtughemhi ni oye phọ ọphon phọ ịlo eten phọ a Jehova,* kụ ạmhoogh agey oophugh dị eego esi uwaloor iigbia phọ. Ọdi ạghaaph ghan ni ạḅilhe ạtughemhi rạraar dị eru ịne ịlo a Jizọs, kụolo oḍiiny ạmuum mọ ạ Jọn agbeelhom ghan bọ bịn kụ ẹdi ọdi alhegheri. 26 Ọdi amhiigh ni ọghaaph r’ạkpo oḅio ẹpe obughotu phọ, kụ a Prisilạ rạ Ạkuila rọnhaghan ịpe ọdi rạkaaph bọ, kụ ọpham nyọdi otenhom ọgbal ọgba oogholhomhi eten phọ Ẹnhaan ọḅenhi nyọdi. 27 Kụ loor ịduon ọdi rạwa bọ ọghi Ạkeyạ, abumor phọ ụge ni ḍịnya ọghiom bụmatuan phọ, ọlhom mọ ọmhaar oghuraam nyọdi. Kụ ọdi asi bọ ẹpe phọ, ạkar kụ ạlhoghonhaan ḍịghaagh bụphe momheeraam bọ dị eego esi ọokia ọnma ighirigiir phọ Ẹnhaan; 28 loor esi dị ọdi ạghi ghan ni esi ogbo ạagbaghanhaan r’oboom oophugh, ạma ghan amiteom mọ ịpe ạbuo a Ju phọ rọkaaph bọ kị́ne, aḍeenhaan ghan bịdi sịphe Ịge Iigbia phọ mọ a Jizọs kụ ạ Krạịst phọ.