Iiḍighi Abutelhedom Mọ

19 Mem mọ Ạpọlọs odi bọ Kọrịnt, ạ Pọl aago ni ạnyu ade aru asi Ẹfẹsọs. Kụ ọdi ạmhiin ni buniin ạbumatuan ẹpe phọ 2 kụ apuru bịdi mọ: “Uwaloor iigbia phọ isoorom ni inyinha mem mọ nyinha emheeraam bọ?” Kụ bịdi mọ: “Yoor kọ̋nhaghan ghan ịlo uwaloor iigbia.” 3 Kụ ọdi apuru bịdi mọ: “Kụ ọghen ọdo oḍiiny ạmuum kụ ẹdi iḍiinye bọ inyinha?” Kụ bịdi mọ: “Ọpo ạ Jọn agbeelhom ghan bọ.” 4 Kụ ạ Pọl mọ: “Ạ Jọn aḍiinye ghan we mụum oḍeenhaan mọ bịdi mokiton, kụ ạḅenhi ghan we phọ mọ omheeraam ọpo odi bọ ọmhan ọno ratu, ịduon phọ pọ, a Jizọs.” 5 Bịdi rọnhaghan ịphen phọ kụ oḍiiny mụum esi aḍien Uwo Ẹmhoogh phọ Jizọs. 6 Ạ Pọl rọḅamham rạghaagh ọdi bịdi, kụ uwaloor iigbia phọ asoorom bịdi, kụ bịdi omhiigh ọḅa ạrunhu kịrokiro r’ọmhiin ịmiin. 7 Kụ alhephiri ạnmuny dị ọrol sịphe phọ koḍighi ni 12 ạbidi.

8 Kụ esi ịraar ụnwanyu, ọdi ạghi ghan ni sịphe obughotu phọ ạghaaph ghan r’ạkpo oḅio, ọdi ạghaaph ghan ịbadi ạraraar ịlo Ọmhar phọ Ẹnhaan, ạḅilhe ạma ghan rạraar dị bịdi kokol omeeraam ịpe ọdi rạkaaph bọ. 9 Kụolo buniin uḅom ni ẹmhu bịn úmeeraam, ụghaaph ghan ghụn ịkaraph ịlo Eten Phọ ghisigh aḍita awe phọ, kụ ọdi ạwilhe bịdi kụ ạpham bụmatuan phọ ạḍuanham. Kụ tọrobo aḍio ọdi ạghi ghan ni ẹpe ogbogh ogbotu otu ịtuugha phọ ạ Tịrạnọs ạtughemhi ghan. 10 Ọdi aḍighi ghan ni ịduon phọ esi ịyal ạsia, dị tụtu oomo ạbuo a Ju phọ r’ạbuo a Gris phọ orugh bọ ẹpe Esia ọnhaghan ekpo ọnhu Uwo Ẹmhoogh phọ.

11 Kụ Ẹnhaan aḍighi ghan bịn ịikia ịiḍaany dị eego esi ạ Pọl, 12 dị tụtu ọsighe ghan rụsuoma r’inyoraam dị ẹteeny loor ọdi ọghi ọngo we dị úmoon, kụ eekonhom ghan rẹezegh phọ ạbidi ẹḅilhe eḍighi ịdi ịkaraph aruwaloor ẹḅua loor ạbidi. 13 Kụ buniin ạbuo a Ju dị ọḅua ghan ekpisi ọgba ekpisi ophorogh ghan ịkaraph aruwaloor, ụkparagha ghan ni ọsighe aḍien Uwo Ẹmhoogh phọ Jizọs ophoroghom aani ịkaraph aruwaloor dị edi loor awe; bịdi ụḅem ghan mọ: “Esi aḍien a Jizọs phọ ạ Pọl ragbeelhom ghan bọ, mị ạto rịḅenhi ghan inyinha mọ imite.” 14 Oḍual ạnmuny ọnyo a Ju dị aḍighi uwo ẹmhu ạbupinyon rịkia dị oghol mọ a Siva kụ uḍighi ghan bọ ịphen phọ. 15 Kụolo ọkaraph uwaloor phọ ạḅenhi bịdi mọ: “Mị alegheri ni Jizọs ạḅilhe alegheri Pọl; nyinha ạbuo ạnhian?” 16 Kụ oye phọ ọkaraph uwaloor phọ odi bọ loor phọ azuom bịdi, kụ eenhan tọrobo ọnyo ạbidi ạkpar apu, kụ bịdi ọrol ẹdaḅa oghiil omiteghu sịphe otu phọ r’ạraraar dị oḍighima yogh. 17 Oomo ạbuo a Ju phọ r’ạbuo a Gris phọ orugh bọ Ẹfẹsọs ụnhaghan ni ịphen phọ; kụ eḍigh ḍiigu esi oomo ạbidi, kụ awe oboom ghan ḍien Uwo Ẹmhoogh phọ Jizọs. 18 Kụ ịbadi ạbuphe momheeraam bọ uru ghan ni ọghaaph ịkaraph phọ ạbidi omiteom ọḅilhe ọghaaph ghan rạraar kịrokiro dị bịdi moḍighi. 19 Kụ ịminighan ạbidi dị oḍighi yogh ghan ịiḍaany r’ọlhoghonhaan ạḍighaagh ịkaraph aruwaloor umiteghom ni rịnya phọ ạbidi kụ oguom nịan ghisigh oomo awe phọ. Kụ ogbiighi bọ ikpoki phọ oghoom bọ rịnya phọ, ịmhan 50,000 ipoḍi a silva. 20 Kụ dị eego esi ịikpo phọ a Jehova,* ekpo ọnhu phọ ọdi ịghiom ni ghisigh elheeny ghan elheeny ẹḅilhe ẹkpar epu.

21 Ịphen phọ reten kụ ạ Pọl asopha mọ ọno roogo Mạsidonia rạ Ạkeyạ, kụ ọno ạki Jeruselem. Ọdi ạḅem mọ: “Mị rọghi ẹpe phọ, mị ạmoogh ọghi aani a Rom.” 22 Kụ ọdi arom ịyal awe igbo ạbuphe rọloghonhaan ghan bọ nyọdi ḍịghaagh mọ ọghi Mạsidonia, bụen phọ pọ a Timoti rạ Ẹrạstọs, kụolo ọdi ạrol li ẹnum ẹpe Esia.

23 Mem mọ ọpo phọ iboom ịiḅaghamhi isoor ri loor ẹmhu Eten Phọ. 24 Oye dị ọghol mọ ạ Dẹmitriọs ạrol li ẹpe phọ dị ạsighe ghan silva ạlhemhom rạraar, ọdi ạsighe ghan ni silva phọ ạkaam ruutu uma ạke phọ oghol bọ mọ Ạtẹmis, kụ ịphen phọ ịngo ghan ni oboom ạsuo we dị roḍighi ghan ọdo oḍighi phọ ọphon phọ. 25 Ọdi aakpomhoghi ni bụen ọdi r’ạbunhon dị roḍighi ghan oḍighi phọ ọphon phọ kụ ạḅenhi mọ: “We phọ, nyinha elegheri ni mọ oḍighi phọ ọphon phọ kụ rụngo ghan iyira iboom ikpoki. 26 Kụ nyinha mẹmhiin ẹḅilhe ẹnaghan mọ ạ Pọl makiton ilhoghi ịminighan awe omheeraam mọ ạrumhugh phọ ọkaam bọ rạghaagh kígey ạrumhugh, kụ kẹ́phen Ẹfẹsọs bịn, esugha ẹnum ọbo oomo phọ Esia. 27 Kụ etigheri ọḅem mọ awe kọkaaph ịkaraph ịlo aḍighi phọ ayira, awe kọ́maghamhi mụn mạar otu ịiḅereghi ogbogh uma ạke phọ, Ạtẹmis, kụ ghạlhamo r’ịduon awe oomo Esia r’awe oomo aḅirinhi phọ rọoḅereghi ghan bọ Ạtẹmis, awe kókuenhi mụn nyọdi loor ịphen ạ Pọl ạghaaph bọ.” 28 Kụ awe phọ ọnhaghan bọ ịphen phọ ụghagh ni ilhoghi iboom, kụ omhiigh ọlo mọ: “Ạtẹmis kụ ogbogh uma ạke awe phọ Ẹfẹsọs!”

29 Ịgbaragbara phọ ilheeny ni oomo ẹmha phọ, kụ awe phọ ọghi osiph Geyọs rạ Ạristạkọs, bụo ạ Mạsidonia phọ ọdaph bọ Pọl, oḍighom ẹpe erugh ephegh phọ. 30 Kụ ạ Pọl ạwa ni oḍigh ẹpe phọ ọteeny awe phọ, kụolo ạbumatuan phọ úmeera. 31 Buniin aruwo ẹmhu ạrayaal r’areephegh dị oḍighi rịghiri ọdi bịn urom ni dom ọghiom nyọdi, ọoḅereghian ghan mọ ọdi kụ́ki ẹpe erugh ephegh phọ ọbo koḍighi ghan bọ nyọdi ịyaar. 32 Kụ loor esi ịgbaragbara phọ ẹrol bọ igbo awe phọ ookpomhoghan bọ, awe phọ ụghaaph ghan kịrokiro ạraraar; kụ ogbogh opol úlegheri ịyaar phọ eḍighi bọ kụ bịdi ookpomhoghan bọ. 33 Bịdi umiteom ni Ạlẹgzạndạ igbo aḍita awe phọ, kụ ạbuo a Ju phọ onyu nyọdi ọghimhom ẹpe aghisigh phọ, kụ Ạlẹgzạndạ ạmaaghian ạwa ọghaaph aani ịyaar ọphelhaam ẹmhu ọdi ghisigh awe phọ. 34 Kụolo bịdi rọlhogh elhegh mọ ọdi ọnyo a Ju, kụ oomo phọ ạbidi ọḅoph ọnhu omhiigh ọlo esi ịyal ạwa mọ: “Ạtẹmis kụ ogbogh uma ạke awe phọ Ẹfẹsọs!”

35 Oḍiemhiom ẹmha phọ rọphoomhi ḍita awe phọ, kụ ạḅem mọ: “We Ẹfẹsọs, ạnhian kụ ịdi úlegheri mọ ẹmha phọ Ẹfẹsọs kụ repogh ghan Ạtẹmis ogbogh uma ạke phọ r’ẹkaanheen ịyaar phọ ẹḅua bọ ẹpe k’ạke ẹghar sịen ade phọ? 36 Oye kátue bọ ạgbakian ịlo ạraraar phọ ịphen phọ, pọ ịpoomhi loor anyinha ẹwilhe oḍighi ghan ạraraar r’ọghagh olhoghi. 37 Ịdi eḍighi bọ nyinha ẹsighe we dị úmi ịyaar sịphe otu ịiḅereghi phọ ḅịlhe ụ́kaaph ịkaraph ịlo uma ạke phọ ayira bịn etumhom sịen phọ. 38 Eru mạar dị ạ Dẹmitriọs r’ạbuphe r’ọdi rokumuan ghan bọ ọmhoogh ịiḅaghamhi r’oye, pọ asiḍughul otu edi ni dị abuugboom ịiruen rotu ghan kụ abupoghom* odi ni kẹn; bịdi otue ni ọki ọteeny bịdi ọkaaphogh ịiḅaghamhi ạbidi. 39 Kụolo eru mạar dị nyinha rẹwa ịdi epel ịphen phọ, pọ ọdaphan olhogh phọ, yira kookpomhoghan kụ osopha. 40 Ịdipho kụ ílo pọ otue ni ọtuan ịphen emite bọ rodon ọḅem mọ yira mọgbagharan bụo ịtooghi phọ, loor ịduon yira ụ́moogh bọ ịyaar oghol ọḅem mọ ịpe kụ iḍighi bọ ịyaar phọ awe phọ ạbuen phọ ookpomhoghan bọ rọkom ịgbaragbara phọ ịphen phọ.” 41 Ọdi rọghaaph ịphen phọ kụ ạḅenhi we phọ mọ oghelheghu.