Iiḍighi Abutelhedom Mọ
28 Yoor rophun ạnyu ade, kụ yoor ogbi olhegheri mọ okol ekpu ogbo phọ mọ ạ Mọltạ. 2 Kụ awe ekpisi phọ* uḍeenhaan ni iyoor igbiririph dị ẹbugh iboom. Bịdi ughuraam ni iyoor agey kụ ọkpoonhi nịan dị yoor kọonma loor ọlophia phọ rạloph bọ r’osipheeny phọ odi bọ. 3 Ạ Pọl ạsighe ịpe ratumhughi ghan sịphe ạnian phọ, bịn ạḍiḅom ẹḅua emite loor ẹgholhoghol phọ kụ eghiiny ḍịghaagh ọdi. 4 Kụ awe phọ orugh bọ ẹpe phọ ọmhiin bọ dị ạḍiḅom mọ rẹeghelhaany pạ ạḍighaagh phọ ọdi, umhiigh ni ọghaaph ịsiphe igbo phọ ạbidi mọ: “Iikia ílo mọ oye phọ ọphon phọ ọokom enu, kụ ghạlhamo r’ịduon aphun bọ ni ạnyu ade dị ịyaar úḍighima, Elhiom Ọoruen* ímeera mọ ọdi ạghiom ghisigh ạrol r’ighuḍum.” 5 Tọrobo ịpe ẹrol bọ, ọdi aphighemhi ni ḍịghaagh ọdi kụ ẹkaraph ịyaar phọ ẹghar esuma pạ ạnian phọ kụ ọdi ịyaar óḍighima. 6 Kụolo bịdi ugbi ghan mọ ọdi kabuphogh ni ọbobo kameel bịn amugh. Bịdi rokori esi ẹedoony amem rọmhiin mọ ịyaar dị eeph ímitenhaan nyọdi, kụ onme ilhoghi ạbidi omhiigh ọḅem mọ ọdi ẹmhugh.
7 Kụ ọolha ẹmha ekpu ogbo phọ ạmhoogh ni rere dị etuman ekool phọ ẹpe phọ. Ḍien ọdi ughol mọ a Pọblịọs, kụ ọdi ughuraam ni iyoor ạḅilhe ụko iyoor igoni ịraar aḍughul otu. 8 Ọde ạ Pọblịọs ạmhinha ni loor esi osipheeny r’amunhum ọgua dị rạaḅaghamhi, kụ ạ Pọl ạghi ạteeny ạaḅereghi, kụ ạḅamham oye phọ rạghaagh ọdi aakonhom. 9 Ịphen phọ reten, kụ ạbunhon awe dị úmoon sịphe ekpu ogbo phọ oru kụ ạ Pọl aakonhom. 10 Kụ oghuenhi ayoor, bịdi uunmo ni kẹn iyoor ịbadi aruunmo, kụ mem mọ yoor rọwa bọ oḍigh ụnwunyaru phọ ọḍua, bịdi ụsighe ni tọrobo ịyaar dị yoor omhoghi oru ọsaany sịphe ụnwunyaru phọ.
11 Ịraar ụnwanyu reten kụ yoor oḍigh ụnwunyaru dị ọka nmụny a Zus oseere ẹpe ẹsooph phọ. Ụnwunyaru phọ ạḍua Ạlẹgzạndriạ kụ aru kụ ạrol ẹpe ekpu ogbo phọ mem ẹephoom mọ. 12 Yoor usul Sirạkius ọrol ịraar aḍughul otu; 13 kụ yoor ọḅua pạ ọghi osi Rigịọm. Ḍiniin aḍughul otu reten kụ ookuugh aghugh ẹpe esoorom mọ aru, kụ yoor ọkparagha osi Putiolạị omhunhenhiom ịyal aḍughul otu phọ. 14 Yoor ụmhiin ni bumor ẹpe phọ kụ ụḅenhi iyoor mọ yoor ụtol r’ạbidi oḍual aḍughul otu. Asiḍughul otu phọ remhunhughan kụ yoor ọḅua pạ onyeenhe Rom. 15 Abumor phọ odi bọ Rom rọnhaghan mọ yoor rotu, kụ osi k’ẹpe Ḍighi Ạpiọs rạ Ịraar Aruutu Abutenhenheen ọteeny ayoor. Ạ Pọl rọmhiin bịdi kụ ạseph Ẹnhaan ạḅilhe ạkpo oḅio. 16 Yoor osi bọ Rom, umheera ni mọ ạ Pọl ạrol ḍịo ọdi r’ọnyo ẹgham dị akori ghan nyọdi.
17 Tọrobo ịpe ẹrol bọ, ịraar aḍughul otu reten kụ ạ Pọl ạmhagh ịkpanha awe ạbuo a Ju phọ. Bịdi rookpomhoghan kụ ọdi ạḅenhi mọ: “We phọ, bumor phọ, mị ụ́piom we phọ ayira kụ mị úḍighi kẹn ịyaar dị ẹgbagh eḍighinhom ịyaar ạburude ạburude phọ ayira, kụolo awe phọ ayira usiph ni ịmhi ẹpe Jeruselem ọlhogh ḍịghaagh ạbuo a Rom mọ ịdipho ọnyo ikoli. 18 Bịdi rọoḅeghion ḍighiton phọ ạmhi, kụ ọwa oseere ạmhi, loor esi dị ụ́miin ịyaar ọtuan oghiigh ạmhi. 19 Kụ ạbuo a Ju phọ úmeera, esi ịduon phọ ịkpaariom ni ịmhi ọḅem mọ mị rạwa mọ ọsighe ḍighiton phọ ạmhi ọghiom Siza, kụolo mị ụ́tuan ọghaaph ịkaraph ịlo eelhe phọ ạmhi kụ aḍighi bọ ịduon phọ. 20 Pọ kụ ịyaar phọ mị ạtuan bọ ạwa ọmhiin anyinha r’ọḅaanhaan anyinha, ịdi eḍighi bọ ụtuan oḍuom olhoghi phọ awe phọ Izrẹl ọmhoogh bọ kụ ụkasaghiom bọ ịmhi izime phọ ịphen phọ.” 21 Kụ bịdi ọḅenhi nyọdi mọ: “Ạḍinya kẹ̋ḍua Judia eru dị ẹghaaph ịlo ạna, kụ abumor phọ ọḅua bọ ẹpe phọ oru kẹn kọ̋ghaaph ịyaar dị eeph ịlo ạna. 22 Kụolo yoor rogbi mọ kẹnighe ni ọnhaghan ịpe nạ kạkaaph bọ, ịdi eḍighi bọ yoor ọkar ri olegheri mọ rọkaaph ni ịkaraph ịlo ẹku phọ ẹphen phọ tọrobo ekpisi.”
23 Kụ bịdi ogu ḍio oru ọteeny ọdi, kụ awe phọ oru bọ sịphe ọdi arugh bọ upu ni bụphe oru bọ ẹḅel amem mọ. Kụ emhiigh ḍịroor bịn k’adulhe, ọdi ạkuamhi ni ạgba ạḅenhi bịdi rạraar dị egbolhomaam Ọmhar phọ Ẹnhaan, esi ọmaaghi ạraraar sịphe Olhogh phọ a Mozis r’ịge Ariil phọ, pịdi eḅonyon ilhoghi ạbidi omheeraam a Jizọs. 24 Kụ buniin umhiigh ni omheeraam ạraraar phọ ọdi rạkaaph bọ; kụolo buniin úmeeraam. 25 Kụ loor ịduon ịgbaragbara phọ emite bọ sịphe igbo phọ ạbidi, bịdi umhiigh ni ọḍuaghu, kụ ạ Pọl ạḅem mọ:
“Dị eego esi oyil phọ Ạịzạyạ uwaloor iigbia phọ ạghaaph ni ịpe eru bọ ịne ạḅenhi bụrude ạburude phọ anyinha, 26 mọ, ‘Kịa ạteeny we phọ ạbuen phọ ạḅenhi mọ: “Nyinha kẹkar ri ẹnaghan kụolo kẹ́naghanhan, kụ nyinha kẹkar ri kẹn epogh kụolo kẹ́miin. 27 Loor esi dị arokpom awe phọ ạbuen phọ mẹkpar, kụ bịdi rọnaghanham ghan ni reḅeri phọ ạbidi, kụolo róḍighi ghan ịlo ọnhaghan. Bịdi mokpereghi riḍien ạbidi, ọbo bịdi kọmiin ghan bọ eten, ọḅilhe oḍueghi reḅeri ạbidi ọbo kọnaghan ghan bọ ọḅilhe ọnaghanhan sịphe ilhoghi phọ ạbidi, ooghiraan otu mị aakonhom bịdi.”’ 28 Esi ịduon phọ ilegheri mọ ịinhaghan ịlo eten phọ Ẹnhaan rạpel ghan bọ we mẹghi ẹteeny we areelhe phọ; kụ ọkar agey bịdi kọnaghan ni.” 29* ——
30 Ọdi ạrol ẹpe phọ ịyal ạsia otu dị ọdi ạkpe kụ arugh, kụ ạmhaar ghan aghuraam oomo ạbuphe oru ghan bọ ophogh ọdi, 31 agbeelhom ghan dom Ọmhar phọ Ẹnhaan ạḅenhi bịdi ạḅilhe ạtughemhi ghan bịdi ịlo Uwo Ẹmhoogh phọ Jizọs Krạịst r’ạkpo oḅio, kụ ịyaar nyọdi ísophoghom.