Iiḍighi Abutelhedom Mọ
20 Ariisi rẹphooghi kụ ạ Pọl ạḅem mọ ạbumatuan phọ oru, kụ ạkparamhi bịdi ạḅilhe ạḅenhi bịdi mọ ọmhaar ọrol kụ anyeenhe Mạsidonia. 2 Ọdi rọḅua ẹmha rọgba ẹmha ẹpe phọ rọghaaph ịbadi ạraraar rọkparamhi bụmatuan phọ kụ ạghi asi Gris. 3 Ọdi ạrol ẹpe phọ ịraar ụnwanyu, kụ mem mọ ọdi ạwa bọ oḍigh ụnwunyaru ọghi a Siria, ạnhaghan mọ ạbuo a Ju phọ oḅian oghiigh ọdi, kụ asopha mọ ọno kaago Mạsidonia kụ aḅula. 4 Kụ awe dị ọdaph nyọdi pọ ạ Sọpạtạ ọony phọ a Pirọs, ọlo ạ Bẹria, rạ Ạristạkọs rạ Sẹkọndọs phọ oḍighi bọ bụo ạ Tẹsạlonạịkạ, ra Geyọs ọlo ạ Dẹbi, ra Timoti, ra Tikikọs rạ Trọfimọs phọ oḍighi bọ bụo Esia. 5 Awe phọ ạbuen phọ uḍiemhi ghan ni ukori iyoor ẹpe Troạs; 6 kụ yoor oḍigh ụnwunyaru onyeenhe Filipạị mem mọ Ẹyaal Ạ Brẹd Phọ Ụ́logh Bọ Yist emhunheen bọ, kụ ịsighe iyoor oogh aḍughul otu ọghi ọteeny ạbidi ẹpe Troạs, kụ yoor ọrol ẹpe phọ oḍual aḍughul otu.
7 Yoor rookpomhoghan olhe eḍien ḍịḅel aḍio awiki phọ kụ ạ Pọl amhiigh ọḅaanhaan ạbidi loor ịduon ọdi kạḍua bọ ḍio phọ etum bọ pạ; kụ ọdi ạghaaph ni bịn k’ogbo aḍughul. 8 Ịminighan ịtozi ịrol li sịphe osoph ạnyu phọ yoor ọrol bọ. 9 Kụ atugbogh ạralha ạsighe ni oniin ọony dị oghol mọ a Yutikọs dị ạrol windo mem mọ ạ Pọl rạkaaph bọ rạghaaph phọ, kụ ạḅua ẹpe omunhenhiom ịyal ạdeki otu ạnyu phọ amheel amhugh. 10 Kụ ạ Pọl asoor ude ạghi ạmhinhanham nyọdi kụ aghuraam nyọdi, kụ ạḅenhi we mọ: “Kẹ́eḅaghamhian mụn loor, ọdi odi ni r’ighuḍum.” 11 Ọdi rọsiiny ạnyu kụ amhiigh olhe eḍien phọ.* Kụ ọdi ạḅilhe ni ạghaaphan bịdi ịminighan tụtu ạḍiroor ẹḅaal kụ agbi ọḅua. 12 Kụ bịdi ọpham ọony phọ ogheelhom kụ ọmhoogh iboom ịidereghi loor ịduon odi bọ r’ighuḍum.
13 Yoor ụghi ni oḍigh ụnwunyaru onyeenhe Ạsọs, ekpisi phọ yoor ọwa bọ ọghi ọsaany ạ Pọl ịdipho ọdi ụḅenhi bọ iyoor, loor esi dị ọdi asopha orelhe kụ ọghi. 14 Ọdi roru ụteeny iyoor ẹpe Ạsọs, kụ yoor ọsaany nyọdi ọghi Mitilini. 15 Rẹteeny ḍịeripho aḍio phọ kụ yoor oḍigh ụnwunyaru phọ ọghi osi ekpisi dị etuman Kiọs, kụ yoor ọḅua ọghi osi Semọs ọmheera ẹnum ḍio phọ etum bọ pạ, kụ yoor ọḅua pạ ọghi Mạịlitọs ḍio phọ etum bọ pạ. 16 Kụ ạ Pọl asopha ọḅeenyom Ẹfẹsọs ọbo ọdi kạtol ghan bọ ḍiboom ạdol ẹpe Esia, ịdi eḍighi bọ ọdi ạwa oogborion osi a Jeruselem ḍio Ẹyaal Ạ Pẹntịkọst phọ lọ edugh ni.
17 Tọrobo ịpe ẹrol bọ, ọdi ạrol li pạ Mạịlitọs arom dom ạghiom ikumor awe ookpomhoghan phọ odi bọ Ẹfẹsọs mọ oru ọteeny nyịnho. 18 Bịdi roru ọteeny nyọdi, kụ ọdi ạḅenhi bịdi mọ: “Nyinha elegheri ni ịpe mị ạrol ghan bọ sịphe igbo phọ anyinha k’ẹḅel aḍio phọ mị aru bọ ẹphen Esia. 19 Mị ukumuan ghan ịdipho ẹbenhe ạngo Uwo Ẹmhoogh phọ r’osooromhi aloor r’emoghi r’ịiḅaghamhi dị mị asoman ghan loor esi oḅian kịrokiro dị ạbuo a Ju phọ oḅian ghan. 20 Kụ mị ụ́bilhe ghan ọḅenhi anyinha rạraar dị kịngo inyinha sụo r’ọtughemhi ghan anyinha esi ogbo r’ọḍua ghan otu ọgba otu. 21 Mị ụkuamhi ghan ni agbeelhom ạḅenhi bụo a Ju r’ạbuo a Gris mọ bịdi okiton ọḅilhe ooghiraan osoman Ẹnhaan, kụ ọmhoogh omheeraam ọghi esi a Jizọs Uwo Ẹmhoogh phọ ayira. 22 Kụ nyịidipho mị rạki Jeruselem, kụ uwaloor iigbia phọ kụ unyu ịmhi, ghạlhamo r’ịduon mị úlegheri bọ ịpe kimitenhaan bọ ịmhi ẹpe phọ, 23 eginha ịyaar dị mị alhegheri pọ ịpe uwaloor iigbia phọ rụḅenhi ghan bọ ịmhi ẹmha etum ẹmha mọ ikoli r’ịmhinhimhiin kụ rikori ịmhi. 24 Tọrobo ịpe ẹrol bọ, mị ụ́maghamhi mạar ghuḍum mọ ạmhi, ịyaar dị ẹmhan ghụn mạar esi ạmhi pọ ọmhadan oḍighi phọ Uwo Ẹmhoogh phọ Jizọs ụngo bọ ịmhi, ọkuamhi ogbeelhom iiḅi ịinhaghan phọ ịlo ọokia ọnma ighirigiir phọ Ẹnhaan.
25 “Kụ ịmiin! mị alegheri ni mọ nyịidipho r’ọnyo anyinha igbo ạbuphe mị agbeelhom ghan bọ dom Ọmhar phọ ạḅenhi dị kạḅilhe ụmhiin ịmhi ólho. 26 Esi ịduon phọ mị ịmhagh inyinha pịdi nyinha ẹmiin rodon phọ mọ ịḅaal oye ílo ẹmhu ạmhi, 27 ịdi eḍighi bọ mị ụ́bilhe ghan ọḅenhi anyinha oomo ạraraar ịlo ogbi phọ Ẹnhaan. 28 Ikiririom ephogh siloor anyinha r’oomo iyool ịga phọ uwaloor iigbia phọ mạtuan bọ ịma inyinha oḍighi abupoghom, pịdi nyinha epogh ookpomhoghan phọ Ẹnhaan ọdi ạghoom bọ ịḅaal Ọony phọ ọdi. 29 Mị alegheri ni mọ mị rọḍua ilhom ịnham keḍigh ni sịen igbo phọ anyinha kụ kémiigha loor epogh iyool ịga phọ, 30 kụ awe komite ni kẹn sịen igbo phọ anyinha okiton igey phọ ọkaaph ịnhon ịlo ookelheghi ạbumatuan phọ ọsighe.
31 “Esi ịduon phọ, ịkiom ghisigh eemhanham, kụ kébulha mọ mị ụ́bilhe ghan oromhoghiom ạtorobo ọnyo anyinha r’izin ḍịroor r’adulhe esi ịraar ạsia. 32 Kụ nyịidipho mị ịḅogh inyinha rạngo Ẹnhaan r’adom ọokia ọnma ighirigiir phọ ọdi, ketue bọ ni ịlhogh inyinha epophe ẹḅilhe ịngo inyinha erua igbo oomo ạbuphe mọḅaalhamhi bọ. 33 Mị kọ̋mhoogh ghan ẹephua ọsighe a silva ọbobo a gol ọbobo ạsuoma oye. 34 Nyinha r’aloor elegheri ni mọ ạraghaagh phọ ạmhi ịphen phọ kụ ẹdi mị ạsighe ghan akumuanham ọmhoogh ịyaar ophoghaam aloor ạmhi r’ạbuphe ọrol bọ r’ạmhi. 35 Kụ mị miḍeenhaan ni inyinha esi oomo ạraraar mọ esi ọkuamhi ghan okumuan eten phọ ẹphen phọ kụ ẹdi nyinha ketue ẹloghonhaan ḍịghaagh bụlo odugh. Ịitughian ghan kẹn ikpo ọnhu Uwo Ẹmhoogh phọ Jizọs mem mọ ọdi r’aloor ạḅem bọ mọ: ‘Ọḅaal olhoghi dị rạtol ghan mem dị oye anmo inmo kụ rapu ghan ọdi rạtol ghan mem dị onmo oye phọ inmo.’”
36 Ọdi rọghaaph oomo ịphen phọ, kụ akpuḍian r’oomo ạbidi ạaḅereghi. 37 Kụ oomo phọ ạbidi umhoghi ni eboom emoghi, kụ oḅol Pọl* ọḅilhe ọkpun nyọdi, 38 ịdi eḍighi bọ ịkar kụ etir bịdi loor ịduon ọdi ạḅem bọ mọ bịdi kọ́miin mụn nyịnho. Kụ bịdi ororori nyọdi ọghi ẹpe ụnwunyaru phọ.