Na Amoọgh nị Uwaloor Dị Ka/Mugh?

ROMUGH aghuḍum odi ni niịn? Aḍipuru phọ aḍiphẹ m’egbaragbaramị nị omạrawe esi iboom asiạ. Orụgh atum orụgh, awe torobọ ekpisi m’ootughiạn nị oghaạph phọ ophọn kụ otu omiteghom odọ kirokirọ omeeraam.

Ibadi awe omeeraam mọ “uwaloor” ra/mugh ghan pạ aḍuugh oye phọ. Iyaạr dị edi ologhi aloor oye ekạr ghạn nị reḅuạ pạ aḍuugh aloor phọ bịn k’erọl eghiọm ḍughụm? Eeghe kụ uwaloor phọ odi bọ loor oye dị odi? Reḍighi ghan ika mem lọ yira omugh? Ekpo-onhụ phọ Enaạn kụ ephum bọ, aBaibul phọ, angọ nị ophanyanaạn asipuru phọ iphẹn dị k’egbaanyạn kụ eru inẹ.

Eeghe Kụ Uwaloor Phọ?

Pạ aBaibul phọ, ikpo-onhụ phọ oteneghi bọ mọ “uwaloor” ekạr emạ mọ “aḍiphooghu.” Kuolọ iphẹn phọ ekaạph idị epu ophooghu. Ogeọm aBaibul phọ aJems, esi omaạm, aḅẹm mọ: “Aḍizu lọ uwaloor i/moọgh m’emugh.” (Jems 2:26) Pọ, uwaloor phọ kụ rangọ ghạn bọ ghuḍum loor phọ.

Inyaạm ongọ aghuḍum mọ iphẹn phọ ke/tue eḍighi oopho aḍiphooghu, obobọ ookugh phọ bịn, ratele bo muupuph phọ. Itụ eeghe? Loor esi dị aḍiphooghu esophe, bịn aghuḍum odi ni ikpo-aloor phọ ekula amem—“esi ibadị ikalạ,” The World Book Encyclopedia kụ iḅẹm. Loor iduọn phọ okparaghạ osumeẹny oye katue ni aḍighi ekol, ḅilẹ kotue ni osighẹ riisi aloor oniin oye olọgh onọn. Kuolọ aniạn aghuḍum mọ kụ reḍim esi ikpo-aloor aloor phọ, pọ oomo okparaghạ ilọ osumeẹny oopho nị bịn. Oomo aḍiphooghu aḅirini phọ ke/tue esumeẹny ghalamọ reniin ekpo-aloor. Esi iduọn phọ, pọ, uwaloor pho kụ inyaạm–aghuḍum mọ ro/miịn bọ—aniạn aghuḍum mọ—rengọ bọ ghuḍum ikpo-aloor phọ. Inyaạm aghuḍum m’­iphẹn phọ aḍiphooghu kụ iphạm.—Job 34:14, 15.

Uwaloor phọ opọ phọ raḍighi oḍighi loor awe bịn? ABaibul phọ aloghonaạn nị ḍighaạgh lọ yira kokureri idị eeleny ilọ iphẹn phọ. ASolomọn Uwemạ ologhi phọ agẹ mọ: “Anhiạn kụ odi bọ dị alegheri uwaloor anmụny omạrawe, mughumọ rasiịny anyụ; ḅilẹ uwaloor inạm mughumọ rasoor ude siẹn ade phọ?” (Ecclesiastes 3:21) Kụ iḍighi kụ inạm mọ r’awe kẹn ni kụ edị oghaạph bọ m’omoogh nị uwaloor. Ketu bọ ika idiphọ phọ?

Uwaloor phọ, obobọ inyaạm-aghuḍum mọ, k’omaạm iikpọ elẹtrik dị retele loor amasinị obobọ iyaạr oḍighi. Elẹtrik phọ ro/miịn bọ k’oḍighinom ni odọ kirokirọ iiḍighi, edi esi odọ phọ iyaạr oḍighi phọ odị rengọ bọ iikpọ phọ. Esi omaạm, kotue ni oḍighi idị astov kamitiom eghologhọl, akọmputa aaḅeghiọn oghaạph aḅilẹ agbiighi raraạr, ḅilẹ kẹn atelevisọn amiteghom sifoto r’eḍọgh. Riduonphonị, iikpọ elẹtrik bịn i/moọgh raagharạ iiḍighi araraạr oḍighi phọ odị angọ bọ iikpọ phọ. Edi ni idiphọ inyaạm bịn. Odọ phọ iduọn phọ, inyaạm-aghuḍum mọ bịn i/moọgh r’eniin eegharạ olhẹm mọ odị rengọ bọ ghuḍum mọ. I/moọgh oye dị eru, ke/tue eetughiạn. Awe r’inạm obarạn “omoọgh oniin uwaloor bịn.” (Ecclesiastes 3:19) Po, mem lọ oye amugh, uwaloor phọ odị o/ghiọm bịn odi idiphọ olhẹm uwaloor onọn aḅirini.

Kụ, eeghe, nuụn kụ adọl iḍim mọ? Ḅilẹ eeghe kụ remitenaan ghạn uwaloor phọ mem lọ oye amugh?

“Na Kaḅula K’iisaạr”

Mem mọ oḅẹl oye phọ, Adam, alegheri bọ kụ aḅaạr emụ esi itọ Enaạn, aJihova aḅenị nyodị mọ: “Esi elhoman aghisigh anạ kụ nạ ale aḍien tutụ nạ aḅula pạ ude phọ, loor idị usighẹ nyina pạ. Loor idị na iisaạr kụ nạ kaḅula k’iisaạr.” (Genesis 3:19) Adam mọ arọl ghạn eghẹn kụ aJihova agbi bọ osighẹ iisaạr olhẹmọm odị? Te, odị o/rọl ekpisi! Odị ko/rọl ghạn. Kụ iḍighi kụ mem mọ aJihova Enaạn aḅẹm bọ mọ Adạm “k’aḅula pạ ude phọ,” odị aghaạph mọ Adạm k’amugh ni. Adạm ra/ḅeeny k’aḍigh aḅirini aruwaloor. Pạ aḍuugh phọ odị kaḅilẹ atọl e/moọgh aghuḍum, o/lo mụn. Amalhiọm odi aḍuugh—aghuḍum o/lo—ko/ḅua oḍigh onọn aḅirini.—Rom 6:23.

Kokaạph ika ilọ abunọn lọ m’omugh? Dọl phọ iḍim mọ edi bo ogananami pạ Ecclesiastes 9:5, 10, yira aạl bọ mọ: “Iḍim mọ i/legheri r’iyaạr . . . Ophorogh araraạr o/lo, igbiighi i/lo, olegheri-iyaạr obobọ osụologhi o/lo ologhi oḍi phọ.” (Moffatt) Esi iduọn phọ, aḍuugh, pọ adọl dị u/lo mụn. Okosuọr phọ agẹ mọ mem lọ oye amugh, “uwaloor phọ odị raḅuạ nị, odị raḅula ude phọ odị; ḍio phọ aḍiphẹ phọ iitughiạn odị repe ni.”—Psalm 146:4.

Eegholaan ni, iḍim mọ i/loghoma loor, eḅoroghạn. I/legheri iyaạr. Ke/tue emiịn nyinạ, enaghạn, obobọ eḅaanaạn nyinạ. I/kpẹ r’okpẹ lọ nạ k’aghiilaan iḍim mọ. Kuolọ ika kụ idị uwaloor phọ “raḅuạ” bọ esi oye mem aḍuugh odị?

Uwaloor phọ “Raḅula k’Egey Enaạn Phọ”

ABaibul phọ akaạph mọ mem lọ oye amugh, “uwaloor phọ raloor odị raḅula k’egey Enaạn phọ engọ bọ.” (Ecclesiastes 12:7) Iduọn phọ emạ nị mọ uwaloor dị odi apeẹph egaany aten okuaḍio phọ asi k’Enaạn ḍughụm? R’enụm! Eten phọ aBaibul phọ aḅaạm bọ ekpo-onhụ phọ “raḅula” i/wạ okạr oḍuạ esi kụ oten enọn. Esi omaạm, Izral dị u/moọgh omeeraam uḅenị mọ: “ ‘Iḅula esi amị, bịn mị k’aḅula esi anyina,’ aJihova asita phọ maḅẹm.” (Malachi 3:7) ‘Oḅula’ phọ Izrạl esi aJihova imạ ooghiraan oḅuạ esi ekeeny okol kụ oḅilẹ odaphạn elhiom eten k’Enaạn. Ḅilẹ ‘oḅula’ phọ aJihova esi Izrạl imạ oḅilẹ ooghiraan oseere-ologhi di anighẹ esi awe phọ odị. Iyạl phọ ariisi phọ “oḅula” phọ aḅarạm dị k’ozo, ko/dị egaany kụ oḅuạ ekpisi kụ oten enon.

Odọ phọ iduọn phọ, mem dị uwaloor phọ “raḅula” esi Enaạn okạr oḅuạ isiẹn ade phọ oghị anyụ akẹ kụ o/mite bọ. Ka/bula, mọ uwaloor phọ kụ inyaạm-aghuḍum mọ. Inyaạm mọ ipẹ phọ reḅuạ nị loor oye, pọ Enaạn bịn kụ ketue eḅulemi engọ nyodị. Kụ iḍighi kụ uwaloor phọ “raḅula k’egey Enaạn phọ” esi dị torobọ oḍuomologhi oye phọ opọ phọ olọ aghuḍum ghisigh abeḍenọm Enaạn bịn.

Esi omaạm, pogh ni, ipẹ Igẹ-Iigbia phọ eḅẹm bọ ilọ aḍuugh phọ aJizọs. Ogeọm ooḅi-oghaạph phọ aLuk aghaạph mọ: “Kụ aJizọs alọ aghiọm anyụ mọ: ‘Odẹ, mị aḅọgh uwaloor phọ amị alọgh ḍighaạph anạ.’ Odị roḅẹm bọ iduọn phọ bịn amugh.” (Luk 23:46) Idiphọ uwaloor phọ aJizos aḅuạ bọ esi odị, i/ḍighi dị odị m’akạr anyeene egaany k’akẹ. U/beton Jizọs esi aḍuugh tutụ k’aḍio dị emuneniom iraạr. Kụ iḅilẹ nị epelom 40 aḍughulotu kụ odị agbi onyeene k’akẹ. (Iiḍighi 1:3, 9) Toroboiperobọ, pạ amem aḍuugh pho odị, aJizọs awilẹ nị r’akpọ-oḅio uwaloor phọ odị, esi araghaạgh Odẹ phọ odị, aḍuomologhi amadạn ipẹ aJihova kotue bọ aḅulemi nyodị esi aghuḍum.

Ii, Enaạn bịn kụ ketue eḅulemi oye esi aghuḍum. (Psalm 104:30) Peeghe eeḅi dị iphẹn eghughuron!

Oḍuomologhi Dị Okuphom Owol

ABaibul phọ aḅẹm mọ: “Amen retu ni, dị buphẹ odi bọ pạ iiḍi phọ, [rootughiạn bọ, New World Translation] konaghanạn nị eḍogh phọ [aJizọs] kụ oḍuạ siphẹ iiḍi phọ abidị omiteghu.” (Jọn 5:28, 29) Ii, aJizọs Kraịst aguan mọ oomo abuphẹ odi bọ ḍiitughiạn phọ aJihova k’oḅerion ni, obobọ oḅulemi esi aghuḍum. Kparipẹ r’iinaghạn okururu mọ awe m’omuughu, iinaghạn ibo phọ bịn kekaạph nị ilọ abuphẹ m’oḅulemi bọ esi aghuḍum mọ. Peeghe aḍidụgh dị ketọl oghuraam iiḅi asiya phọ k’oḅuạ bọ pạ iiḍi phọ otu!

Keḅeeraạn nị nyinạ olegheri obughẹ ilọ ipẹ nạ kamooghọm bọ suọ oḍuomologhi phọ ophọn Enaạn engọ bọ? Yoor romạgh nyinạ oteẹny aBugbanaan aJihova ekpisi anyina elọ aḍiniin abro-sọ phọ Spirits of the Dead—Can They Help You or Harm You? Do They Really Exist?

Epel lọ oghol oḍeenaan, obọ oomo ariisi aBaibul ipẹ igẹ-iigbia aGris aKristẹn phọ usighẹ esi Ooḅi Oghaạph. Ariisi aBaibul ipẹ igẹ-iigbia aHibru phọ usighẹ esi a New World Translation of the Holy Scriptures.