Eeghe kụ K’obạl bọ Baibul Phọ?

ABAIBUL phọ o/ghịgh ḍinọn aḍinyạ—apạm iromoghiom ephomoghiạn k’Enaạn. (1 Tesalonika 2:13) Nạ anaghanạn nị kụ aḍighinom ipẹ aBaibul phọ atughemị bọ, pọ nạ k’amooghọm nị iboom suọ. Nạ k’abughẹ nị ephomoghiạn phọ anạ esi Enaạn aḅilẹ aḍuraan agbị nyodị, opọ Angọ bọ “oomo phọ igey inmo phọ yira omoọgh bọ.” (Jems 1:17) Bịn nạ k’alegheri ni ilọ oteeny odị esi iiḅereghị. Bịn mem iibaghamị, na k’amiịn nị ologhonaạn aḍighaạgh Enaạn. Nạ aḅọph nị ghuḍum mọ ana r’asiigbu phọ odị asereghi bọ pạ aBaibul phọ, pọ Enaạn k’engọ nị nyinạ ghuḍum k’agee-pọ.—Rom 6:23.

ABaibul phọ apạm igey ongọ onaghạn aḍughụm. Bulọ omoọgh olegheri-iyaạr aBaibul phọ m’otagharạn osighẹ esi e/legheri-iyaạr phọ eponomaam bọ sighuḍum asimunịr awe. Esi omaạm, olegheri igey phọ ilọ ipẹ remite ghan bọ mem lọ yira momugh k’itagharạn nị iyira esighẹ esi oghiilaany m’iḍim mọ k’etue ni iḍighi iyira maạr obobọ mọ asiya r’arighirị ayira dị omugh romiinọm nị. (Ezekiel 18:4) Itughemị aBaibul phọ ilọ oḅeton esi aḍuugh phọ engọ nị iidereghị bulọ iiḅi asiya abidị omugh. (Jọn 11:25) Olegheri igey phọ ilọ abukarạph aruukpaạny k’ingọ iyira ogona aloor esi ootorosiromineen igụ ḅilẹ iloghonaạn iyira ḍighaạgh onaghanạn iyaạr phọ iibaghamị phọ ephạgh bọ siẹn ade phọ.

Asinị-iilogh phọ k’emụgh edi bọ Baibul phọ iḍeenaan iyira orọl eten dị k’etuom suọ egaany. Esi omaạm, “amaạr erolọm” rengọ ghạn omoon aloor. (1 Timoti 3:2) Esi ‘owopha aloor ayira osighẹ oomo ikarạph lọ aruzu phọ r’aruwaloor phọ ayira mebiphighạ,’ bịn yira mokoronaan ophuẹ omoon aloor phọ ayira. (2 Korịnt 7:1) Oḍighinom ghan oroma phọ Emụgh omiịn bọ pạ aBaibul phọ kẹn rebughẹ ghạn oḅaalologhi apinien pho ḅilẹ r’eghuan oye phọ.—1 Korịnti 6:18.

Nạ aḍighinom Ekpo-onhụ phọ Enaạn, nạ k’aḅaạl-ologhi apu siẹn. Olegheri-iyaạr aBaibul k’uloghonaạn iyira ḍighaạgh omiịn eephọ ologhi r’ogbaanyạn ḅilẹ ingọ iyira oḍuomologhi. K’iloghonaạn iyira ḍighaạgh olhẹm iiḅi araagharạ idiphọ igbiririph, ephomoghiạn, ibo, eephọ, eekaạny, ḅilẹ r’omeeraan. (Galetia 5:22, 23; Efesọs 4:24, 32) Odọ phọ araagharạ phọ iphẹn k’elọgh-ḍighaạgh oḍighi ayira ogey olom obobọ anịr, odẹ obobọ onhiin, oọny obobọ onyanị.

Nạ m’aakia ghan ni ilọ aghisigh phọ? Imiịn a Baibul phọ iḍeenaan iyira esi phọ yira mosi bọ idiphọ amem mọ rekị bọ. Imiịn phọ iphẹn phọ i/gbạ sidọl amem mọ yira odi bọ bịn kuolọ eḅilẹ nị edeenaan mọ moọny amem ogbi Enaạn k’akiton ni de phọ atene paradaịs—Ogananami 21:3, 4.

Eloghonaạn Onaghanạn aBaibul Phọ

Eeni nạ maghị ni aạl aBaibul phọ kụ amiịn dị akpạr onaghanạn. Eeni na o/legheri esi ophogh ipạ aBaibul phọ omiịn ophanyanaạn asipuru anạ. Eḍighi idiphọ, pọ ka/nạ bịn. Oomo phọ ayira ewạ ni mọ ologhonaạn ḍighaạgh onaghanạn Ekpo-onhụ Enaạn. ABugbaanaạn aJihova, esi 235 arere, rongọ ni oophọ bịn itughemị aBaibul simuunịr awe. Ologhi abidị kaḅaạl lị ologhonaạn anạ ḍighaạgh kẹn nị.

Egbor renighẹ ghan otuughạ aBaibul phọ enụm-enụm, omiighom ikpanạ itughemị phọ. (Hibru 6:1) Nạ ratuughạ, purukụ na k’atue ale “eḍien lọ ekpạr” akuamị—iduọn phọ, pọ igey lọ eḍiinyan. (Hibru 5:14) ABaibul phọ kụ azin phọ. Arinyạ dị ogẹ okpasị Baibul, idiphọ abro-sọ phọ What Does God Require of Us?, k’eloghonaạn nị nyinạ ḍighaạgh onaghanạn ariisi Igẹ-iigbia ilọ odokirokirọ araghaạph.

Nạ Rawạ nị Olọgh Amem Wiki aWiki Onaghanạn aBaibul Phọ?

Kotue ni ogbor ookolobian ituughạ aBaibul mem ḅilẹ r’esi lọ edughanaan nyinạ. Ibadị rotuughạ ghạn otọ k’abidị. Buniin rotuughaam ghạn ghalamọ r’afon. Edeọm ituughạ phọ, i/ḍighi ekụ dị ibadị awe odị, kuolọ iikolobian ilọ oye phọ bịn dị oseere idị edaphạn sidọl oye phọ, eḅarạm nị resi lọ olegheri-iyaạr bilẹ r’asukul oye phọ asi. Ro/ḍighi ezạm, ḅilẹ iyaạr osiphe anạ umughaloor re/tọl. Sipuru aBaibul phọ anạ kopanyanaạn nị, kụ na atuughạ ilọ oḍuraạn ogbị Enaạn.

Na ra/kpẹ iyaạr odọ phọ ituughạ aBaibul phọ iphẹn phọ. (Matthew 10:8) Rotughemị oopho bịn we oomo aruukụ iiḅereghị ḅilẹ r’abulọ u/lo ekụ iiḅereghị kụ eḅeeraạn nị r’ophooph ologhi obughẹ olegheri-iyaạr abidị olọ Ekpo-onhụ Enaạn.

Anhiạn kụ katue apinom aani ituughạ phọ? Oomo eghunotu anạ. Torobọ arighirị lọ nạ asaḅar oomaghạgh otue ni opinom aani. Obobọ eḅeeraạn nyinạ, k’otue ni otuughạ r’anạ bịn.

Ibadị roseerian ghan awạ wiki awiki otuughạ aBaịbul phọ. Kụ eḍighi idị nạ k’atue ni alọgh mem di epu siẹn obobọ m’amem mọ anạ kụ ighom epu siẹn wiki awiki, pọ aBugbaanaạn phọ k’omitiom ni loor abidị ologhonaạn anạ ḍighaạgh.

Aḍimạgh Otuughạ

Yoor omạgh ni nyinạ oteẹny aBugbaanaạn aJihova. Eniin eten dị na katue aḍighi iduon phọ pọ ogẹ oghiọm esi amarugh ephẹn ude. Kụ ookolobian nuụn lọ oye k’atuughạ Baibul phọ r’anạ k’anạ oopho.

□ Kibeeraạn nị imị omoogh aḍiniin abro-sọ phọ What Does God Require of Us? Kol onhụ emạ phọ

□ Iseseeny iteẹny imị ilọ otuughạ aBaibul r’amị oopho.