K’eḅeeraạn Ni Nyinạ Olegheri Igey phọ Ḍughụm?

IGEY phọ ilọ eeghe iyaạr? Ilọ iniin asipuru dị emạn maạr epelom dị awe mopuru ghan. Iduọn siẹn nạ maakia ghan ni obobọ malọgh ghan ni iitughiạn ilọ odọ asipuru dị erọl iduọn iphẹn:

• Enaạn akạr ri ruphogh ghan iyira ḍughụm?

• Eghạm r’iminimiịn k’esi ni eekuna ḍughụm?

• Eeghe kụ r’​imitenaan ghan iyira mem lọ yira omugh?

• Oḍuomologhi odianaan ni iḍim mọ?

• Mi kaaḅereghị ika kụ Enaạn inaghanạn imị?

• Ika kụ edị mi kamiịn oḅaạl ologhi siẹn aghuḍum mọ?

Iḍighen esi kụ edị nạ kamiịn ophanyanaạn asipuru phọ iphẹn phọ? Nạ aghị riisi phọ ipẹ awe rokị ghan bọ aạl arinyạ obobọ robologhi ghan bọ, nạ atue ni amiịn simuoonịr arinyạ dị eghophora ongọ ophanyanaạn asipuru phọ iphẹn phọ. Ibadị amem, torobọ ipẹ erọl bọ, ḍiniin aḍinyạ regbạgh ghan ni ḍierị phọ. Inhọn ekịgh mudiadị emoọgh ni maạr oḍighinom mem mọ amuphẹ phọ kuolọ moọny amem bịn i/moọgh mun maạr oḍighinom bịn mooḅenion yogh obobọ onmeeghi.

Torobọ ipẹ erọl bọ, aḍiniin aḍinyạ edi ni dị ephamanạm ophanyanaạn dị akpẹ obeḍenọm. Aḍiphẹ phọ aḍinyạ igey. AJizọs Kraist aḅenị ni Enaạn esi iiḅereghị mọ: “Ekpo-onhụ phọ anạ igey ni.” (Jọn 17:17 NW) Rodon yira olegheri Ekpo-onhụ phọ epẹ phọ idiphọ Aḍinyạ ligbia phọ, aBailbul phọ. Siẹn ipoḍi phọ edạph bọ siẹn, nạ kamiigh ni onaghanạn ophanyanaạn aBaibul phọ aagholaan bọ ạru bọ inẹ ilọ asipuru phọ iphẹn.

Enaạn Akạr ri Ruphogh ghan Iyira Ḍughụm?

IYAẠR PHỌ EḌIGHI BỌ KỤ AḌIPURU PHỌ EMITE BỌ: Yira odi aḅirini dị igbagbaar r’ekeeny ooruẹn kụ emuza. Ibadị aruukụ iiḅereghị etughemị mọ iminimiịn phọ yira romiinọn ghan bọ eḍighi ogbi Enaạn.

IPẸ ABAIBUL PHỌ ATUGHEMỊ BỌ: Enaạn r’amen ra/kọm ghan ikarạph. “Ka/kaạph akolom egey Enaạn ozọ ilọ asipioghọm, ḅilẹ r’opọ apeleghom bọ ozọ ekeeny eten!” Iduọn kụ edị aJob 34:10 eḅẹm. Enaạn amoọghonaạn ni ogbi dị aḍighi olọ ephomoghiạn we. Epẹ kụ iyaạr phọ aJizọs utughemị bọ iyira ooḅereghị mọ: “Odẹ phọ ayoor odi bọ k’akẹ phọ . . . omạr phọ anạ aru ni! Oḍighi aani ipẹ nạ rawạ bọ siẹn ade phọ, idiphọ roḍighi bọ k’ake phọ!” (Matiu 6:9, 10) Enaạn ruphogh ghan ni iyira eten dị ebụgh ni iboom dị tutụ odị maḍighi ni oomo ilọ odị katue oḍighi idị omunughan ogbi phọ odị ka/piọm omite.​—Jọn 3:16.

Miịn kẹn ni Genesis 1:26-28; Jems 1:13; ḅilẹ 1 Pita 5:6, 7.

Eghạm r’Iminimiịn K’esi ni Eekuna Ḍughụm?

IYAẠR PHỌ EḌIGHI BỌ KỤ AḌIPURU PHỌ EMITE BỌ: Eghạm epạm ni oophiim osigheọgh asighuḍum awe dị ko/tue obạl omuneni. Oomo awe momiinọm ni iminimiịn.

IPẸ ABAIBUL PHỌ ATUGHEMỊ BỌ: Enaạn akaạph ni ilọ amem dị retu ghisigh dị odị kapighi eephọ oomo ade phọ. Eediạn omạr phọ odị, agomẹt k’akẹ, awe “ko/tuughạ ghan mun eghạm niịn niịn.” Kparipẹ ghụn, bidị “kogurọgh rolool-eghạm otene rusuạ.” (Isaiah 2:4) Enaạn kasiemi ni eekuna oomo ekeeny ooruẹn r’​iminimiịn. ABaibul phọ aguanaan mọ: “[Enaạn] kagbuurogh ni oomo izin riḍien abidị. Aḍuugh r’​amukum ologhi r’​emoghi r’​eephina ke/⁠tọl mun, idị eḍighi bọ iḅẹl araraạr phọ [eḅarạm ni ekeeny ooruẹn r’​iminimiịn phọ aḍio arodon] meten.”​—Ogananami 21:​3, 4.

Miịn kẹn ni Psalm 37:​10, 11; 46:9; ḅilẹ Micah 4:​1-4.

Eeghe Kụ R’imitenaan Ghan Iyira Mem lọ Yira Omugh?

IYAẠR PHỌ EḌIGHI BỌ KỤ AḌIPURU PHỌ EMITE BỌ: Ibadị aruukụ iiḅereghị aḅirini phọ rotughemị ghan mọ iyaạr edi ni loor oye dị rekiọm ghan kerọl mem lọ oye phọ mamugh. Abuniin omeeraam mọ iḍim mọ ketue ni eḍighi iyaạr buphẹ odi bọ oboḅo mọ Enaạn remiinẹ ghan ni bukarạph phọ esi osophonaan abidị apum kụ olọgh adọl iminimiịn dị eekuna i/lo loor ooni aniạn.

IPẸ ABAIBUL PHỌ ATUGHEMỊ BỌ: Oye kụ mamugh, pọ o/lo mun. “Iḍim mọ . . . u/loghoma r’iyaạr r’enụm.” Ecclesiastes 9:5, kụ iḅẹm. Loor esi dị iḍim mọ ke/tue bọ elegheri, eloghoma, obobọ emiịn torobọ iyaạr, bidị phọ ke/tue eḍighi oye ekarạph iyaạr​—obobọ eloghonaạn ḍighaạgh—buphẹ odi bọ.​—Psalm 146:​3, 4.

Miịn kẹn ni Genesis 3:19 ḅilẹ Ecclesiastes 9:6, 10.

Oḍuomologhi Odianaan ni Iḍim mọ?

IYAẠR PHỌ EḌIGHI BỌ KỤ AḌIPURU PHỌ EMITE BỌ: Yira rowạ ghan orọl, ḅilẹ yira rowa ghan oghelọm aghuḍum r’abuphẹ yira ophomoghiạn bọ. Etuụgh bịn eḍighi eseeriom dị yira komoọgh ephuọm oḅilẹ omiịn abuphẹ yira ophomoghiạn bọ kụ momuughu bọ.

IPẸ ABAIBUL PHỌ ATUGHEMỊ BỌ: Ibadị awe dị momuughu koḅilẹ ni oḅerion. AJizọs aguanaan mọ “buphẹ odi bọ pạ iiḍi phọ . . . komiteghu [ni].” (Jọn 5:​28, 29) Idị emoọgh muuḅọph r’oḅẹl ogbi phọ Enaạn, awe phọ abuphẹ koḅerion bọ komoọgh ni eepoogh orugh ade dị eḍighi paradaịs. (Luk 23:43) Oguanaan aghisigh phọ ophọn aḅarạm ni omoon aloor dị amunughan r’aghuḍum k’​agee-pọ dị katolonaạn we dị ronaghanạn ghan. ABaibul phọ aḅẹm mọ: “Awe aruukuan r’asiloor abidị kụ kole erua ade phọ, kụ bidị kotugh ni siẹn ade phọ k’iiḍuul.”​—Psalm 37:29.

Miịn kẹn ni Job 14:14, 15; Luk 7:11-17; ḅilẹ Iiḍighi 24:15.

Mi K’aaḅereghị Ika Kụ Enaạn Inaghạnạn Imị?

IYAẠR PHỌ EḌIGHI BỌ KỤ AḌIPURU PHỌ EMITE BỌ: Enighẹ oḅẹm mọ awe oomo aruukụ iịbereghị rooḅereghị ghan ni. Ghalạ mọ r’iduọn phọ ni, ibadị rologhoma ghan mọ u/pagharanaạn iiḅereghị phọ abunọ.

IPẸ ABAIBUL PHỌ ATUGHEMỊ BỌ: AJizọs utughemị ni iyira mọ oghel ooḅula ghan iniin iniin ikpo-onhụ siphẹ iiḅereghị phọ ayira. Odị aḅẹm mọ: “Kụ mem lọ nyina reeḅereghị, ke/pu ghan iyaạr bịn eḅẹm eeḅula.” (Matiu 6:7) Eru maạr lọ yira rowạ mọ Enaạn enaghạn iiḅereghị phọ ayira, yira omoọgh ooḅereghị eten dị odị asighẹ. Oḍighi idiphọ phọ, emoghi mọ yira otuughạ iyaạr phọ ogbi phọ Enaạn aru bọ kụ ogbi nuụn ooḅereghị idị etuụgh edaphạn. Oḅẹl aJọn 5:​14 egbạ mọ: “torobọ iyaạr lọ yira oghol ipẹ [Enaạn] rawạ bọ kụ olhọm, odị runaghanạn ghan ni iyira.”

Miịn kẹn ni Psalm 65:2; Jọn 14:6, 14; ḅilẹ 1 Jọn 3:22.

Ika Kụ Edị Mị Kamiịn Oḅaạl Ologhi Siẹn Aghuḍum mọ?

IYAẠR PHỌ EḌIGHI BỌ KỤ AḌIPURU PHỌ EMITE BỌ: Ibadị awe omeeraam mọ ikpoki, oolheghaan, obobọ enighẹ kụ kengọ bunọ oḅaạl ologhi. Esi iduọn phọ, bidị rọporogh ghan raraạr phọ iphẹn phọ. Eekuna phọ omiịn mọ oḅaạl ologhi apeom ni bidị.

IPẸ ABAIBUL PHỌ ATUGHEMỊ BỌ: AJizọs amạ ni isabị oḅaạl ologhi phọ mem mọ odị aḅẹm bọ mọ: “Ibo k’Enaạn edianaan ni buphẹ ologhoma bọ mọ ekparạm ni ruwaloor phọ abunọ.” (Matiu 5:3) Ogey oḅaạl ologhi phọ ko/tue omiịn epel mem lọ yira ogbariọn radạ omuneni egbogh iyaạr phọ ikuom bọ iyira, epẹ phọ pọ, eephuạ olegheri Enaạn phọ yira omoọgh bọ ḅilẹ r’olegheri arigbiom mọ odị ilọ ayira. Igey phọ ipẹ phọ omiịn ologhi aBaibul. Olegheri igey phọ ipẹ phọ k’iloghonaạn iyira ḍighaạgh orọph onaghanạn ipẹ ekạr bọ emạn maạr r’ipẹ i/mạn bọ. Ongọ ghan ogẹl igey aBaibul phọ ooḅakị osopha phọ ayira ḅilẹ r’eḍighinom iyaạr ayira ketorori ekiọm ghuḍum dị amoọgh emụ apu.​—Luk 11:28.

Miịn kẹn ni Proverbs 3:5, 6, 13-18 ḅilẹ 1 Timoti 6:9, 10.

Iphẹn yira mooḅeghiọn bọ eḍighi eekperạ eten bininịn dị ophogh ophanyanaạn aBaibul phọ ilọ oḍiiny asipuru. Nạ rawạ ni olegheri idị epel pạ ḍughụm? Eru maạr lọ nạ odi aani ni igbo abuphẹ “ologhoma bọ mọ ekparạm ni ruwaloor phọ abunọ,” iikia i/lo nạ kawạ ni olegheri obughẹ. Iduọn siẹn nạ raatughiạn ghan ni ilọ inhọn asipuru, iduọn iphẹn: ‘Eḍighi iyaạr lọ Enaạn ruphọgh ghan ni iyira, eeghe kụ iḍighi kụ odị angọ bọ ogẹl iboom ikarạph r’iminimiịn merọl esi oomo iphirigba? Ika kụ idị Mị kanighemị dọl aghuḍum eghun-otu phọ amị?’ ABaibul phọ angọ ni ophanyanaạn dị amunughan aḅilẹ aḍighi olọ ogbaanyạn sipuru phọ iphẹn phọ ḅilẹ r’inhọn odọ asipuru.

Torobọ ipẹ erọl bọ, ibadị rodon rookpukiạn ghan ni okpegheron aBaibul. Bidị omiịn Baibul phọ idiphọ aḍiidoọny aḍinyạ dị eeni amem rekpạr ghan ni onaghanạn. K’eḅeraạn ni nyinạ dị kologhonaạn nyinạ ḍighaạgh omiịn ophanyanaạn phọ siphẹ aBaibul phọ? Abugbaanaạn aJihova omiteom ni iyạl araraạr oḍighi ologhonaạn anạ ḍighaạgh.

Eḅẹl phọ, aḍinyạ phọ Naghanạn Enaạn Pidị Arọl K’agee-pọ omakạ eten dị keloghonaạn ḍighaạgh we dị eepoogh ro/moọgh ghan ooḅeghiọn ophanyanaạn aBaibul phọ aagholaan bọ ni ilọ asipuru phọ iphẹn phọ emạn bọ ni maạr. Omuneniom iyạl iyaạr oḍighi phọ pọ edeọm ituughạ aBaibul ologhi-otu oopho. Dị iyaạr ro/kpẹ, oniin onyọ Abugbaanaạn aJihova dị arugh ekool anyina kụ aḅilẹ amaạr otughemị aBaibul phọ katu ni k’anạ obobọ enhọn esi lọ ephọ ekasiạn kụ asighẹ ghan moọny amem aaḅeghiọn Baibul phọ r’anạ wiki awiki. Asirubal awe siẹn aḅirini phọ momooghọm ni suọ esi edeọm mọ ephẹn phọ. Ibadị abidị mosi ni esi dị mokureri r’​eedughạ kụ moḅẹm mọ: “Mị mamiịn igey phọ!”

Nạ ka/tue amiịn enhọn eeḍiọm dị epu siẹn. Igey aBaibul phọ ritagharạn ghan iyira kesighẹ esi eepua omeeraam, igbaragbarạ, ḅilẹ r’eepuph. Ringọ ghan iyira oḍuomologhi, ogbi, r’ibo. AJizọs aḅẹm mọ: “Nyina kelegheri ni ipẹ eru bọ igey phọ, kụ etuạn igey phọ ekpetenaan.”​—Jọn 8:32.