Oguan Dị Oguanhaan A Jehova

Ịyal ạruwanyu reten mem mọ awe phọ Izrẹl ọḍua bọ Ijipt, bịdi usi sịphe Ẹeḅaraph ạ Sạịnạị kụ ophighi rogbogo ạbidi. A Jehova ạḅenhi ni Mozis ọsiiny ạnyu Ẹeḅaraph ạ Sạịnạị, kụ ạḅenhi mọ: ‘Mị kụ ụphel we phọ Izrẹl ạsighe ḍịghaagh awe phọ Ijipt. Eḍighi mạar dị bịdi ụnhaghanhan ịmhi kụ ọḅilhe ooko iilhogh phọ ạmhi, bịdi koḍighi we ạmhi dị ọgbatanhaan.’ Mem dị a Mozis asoor sịphe ẹeḅaraph phọ, ọdi ạḅenhi ni we phọ Izrẹl ịpe a Jehova ạḅem bọ. Kụ bịdi ọphagharanhaan mọ: ‘Yoor koḍighi ni tọrobo ịyaar dị a Jehova ụḅenhi iyoor oḍighi.’

A Mozis ạḅilhe ni ạsiiny ạnyu ẹeḅaraph phọ, kụ a Jehova ạḅenhi mọ: ‘Esi ịraar aḍughul otu, mị kịḅaanhaan ni inyinha. Pụr we phọ rụru mọ ọnyo ạbidi kụ́siiny ạnyu Ẹeḅaraph ạ Sạịnạị.’ A Mozis asoor ri kụ ạḅenhi we phọ mọ bịdi ookolhobian ọnhaghan ẹḍogh a Jehova.

Mem dị aḍio phọ ẹteeny, awe phọ Izrẹl ụmhiin ni dị aḍio phọ rẹmepheghian ḅịlhe ọkikiph ọotu aakpereghiom ẹeḅaraph phọ. Bịdi ụnhaghan kẹn ẹḍogh ọomhaany r’ẹḍogh eeḍue. Kụ a Jehova asoor sịphe ẹeḅaraph phọ ịdipho ạnian. Awe phọ Izrẹl ụmhoogh ni oghiilhaan kụ ọḅilhe ookpereghaany loor ịpe bịdi ọmhiin bọ. Oomo ẹeḅaraph phọ iphiigha ni kụ ạmughi aakpereghiom. Ẹḍogh eeḍue phọ ịghi ghan ạnyu bịn. Pọ kụ esi dị Ẹnhaan ẹḅem mọ: ‘Mị a Jehova. Kẹ́eḅereghi ịnhon ạrumhugh.’

A Mozis ạḅilhe ni aḅula ẹpe ẹeḅaraph phọ, kụ a Jehova ạngo nyọdi iilhogh dị awe phọ kọdaph kụ ọoḅereghi nyọdi r’ịdi bịdi kọzo ghan. A Mozis ạge iilhogh phọ kụ ạal ạḅenhi we phọ Izrẹl. Kụ bịdi oguanhaan mọ: ‘Yoor koḍighi ni tọrobo ịyaar dị a Jehova ụḅenhi iyoor oḍighi.’ Sịen phọ, bịdi moguanhaan Ẹnhaan oḍighi ịyaar. Bịdi koḍighi ni ịpe bịdi oguan bọ ḍụghum?