Bịdi Úḍighi Ịpe Bịdi Oguan Bọ

A Jehova ạḅenhi Mozis mọ: ‘Tue ẹphen ạnyu ẹeḅaraph phọ ụteeny ịmhi. Mị kạge iilhogh phọ ạmhi loor aḍighiigh ạngo nyịnha kụ nạ ạsighe ạki ạngo bịdi.’ A Mozis ạsiiny ni ạnyu ẹeḅaraph phọ kụ ạrol ẹpe phọ 40 aḍughul otu. Ẹpe phọ kụ ẹdi a Jehova ạge Ḍioph Iilhogh loor ịyal asighiigh ạngo nyọdi.

Ịdipho amem mọ rẹki bọ, awe phọ Izrẹl ụutughian mọ a Mozis mạwilhe bịdi. Kụ ọḅenhi Erọn mọ: ‘Yoor rọwa oye dị kuḍiemhiom iyoor. Ụkaanhaan iyoor ẹmhugh!’ Erọn ạḅenhi bịdi mọ: ‘Ịngo ịmhi sigol phọ anyinha.’ Kụ ọdi ạsighe sigol phọ bịdi ọngo bọ nyọdi ạazaghamhi kụ ạkaam nạm. Kụ awe phọ ọḅem mọ: ‘Ạnam mọ ọphon phọ kụ Ẹmhugh phọ ịtagharan bọ iyira ẹsighe Ijipt!’ Kụ bịdi omhiigh ọoḅereghi ạnam mọ ọka bọ, kụ olhe ẹyaal. Ịphen bịdi oḍighi bọ ẹnighe ni ḍụghum? Eeye, loor esi dị bịdi moguanhaan ọoḅereghi oginha a Jehova. Kụolo nyịidipho, bịdi úḍighi ịpe bịdi oguan bọ.

A Jehova ạmhiin ni ịpe remite bọ, kụ ạḅenhi Mozis mọ: ‘Soor ạghi ạteeny we phọ. Bịdi mọwilhe oḍighi ịpe mị ạto bọ rọoḅereghi ẹkaanheen ẹmhugh.’ Kụ a Mozis asoor sịphe ẹeḅaraph phọ r’ịyal asighiigh dị ọge iilhogh phọ.

A Mozis ạtol rapogh marugh awe phọ Izrẹl, bịn ạnhaghan dị awe phọ rọmoor sụor kọḅilhe ọgher ịḅa ooseeny nạm mọ ọka bọ. Iphin ni olhoghi a Mozis, kụ aroḅolhoghi ịyal phọ asighiigh phọ ude bịn eḅomhoghian. Mem mem mọ bịn a Mozis ạagbi nạm mọ ọka bọ. Kụ apuru Erọn mọ: ‘Awe phọ ạbuen phọ ụkar ọḅenhi nyịnha eeghe dị enyu bọ nyịnha oḍighi ịyaar dị eeph ịduon?’ Erọn ạphagharanhaạn mọ: ‘Kạ́kagh olhoghi. Nạ alegheri ni ọdo awe dị awe phọ ạbuen oru. Bịdi ụḅenhi ịmhi ọkaanhaan ạbidi ẹmhugh, kụ mị ạsighe sigol phọ ạbidi asumughi nịan kụ ạnam mọ ọphon phọ amite!’ Ịphen Erọn aḍighi bọ ị́nighe. A Mozis aḅula ni ẹpe ẹeḅaraph phọ ạlhom mọ a Jehova ạsar ạwilhenhaan we phọ.

A Jehova ạsar ri ạwilhenhaan bụphe omheera bọ ọnhaghanhan ọdi. Nạ ạmiin ni sịen phọ ịdi ẹmhan mạar dị awe phọ Izrẹl kọdaph ghan Mozis, ọpo a Jehova ạma bọ oḍiemhiom ạbidi?