Ẹnham Adool Phọ A Belạm Ịḅa Ni

Awe phọ Izrẹl mọrol li ẹpe ẹdala phọ dị rẹman ni 40 ạsia, kụ mọkpar ri opu ịbadi igbogh ạramha. Kụolo nyịidipho, bịdi odi ḍịyaghaghaany ade phọ a Moạb, edi bọ ẹḅeenyom Ọphiiny ạ Jọdạn. Mẹteeny dị bịdi koḍigh De Oguan phọ. A Belạk, uwo ẹmha phọ a Moạb, ạmhoogh ni oghiilhaan mọ awe phọ Izrẹl kọsighe de phọ ọdi. Esi ịduon phọ, ọdi ạmhagh ni oye dị oghol mọ Belạm dị kạki atuulhe we phọ Izrẹl.

Kụolo a Jehova ạḅenhi ni Belạm mọ: ‘Kátuulhe we phọ Izrẹl.’ Esi ịduon phọ a Belạm ómheera ọghi. Uwo ẹmha phọ Belạk ạḅilhe ni ạmhagh nyọdi omhunhenhiom ịyal amem kụ aguanhaan ọngo ọdi tọrobo ịyaar lọ ạwa. Ghạlhamo r’ịduon phọ ni, a Belạm ómheera. Kụ Ẹnhaan ạḅenhi mọ: ‘Nạ atue ni ạki, kụolo oginha ịpe mị kạḅenhi bọ nyịnha kụ ẹdi nạ kạkaaph.’

A Belạm aḍigh ni ẹnham adool phọ ọdi anyeenhe Moạb. Ọdi agbiighi ghan oruulhe awe phọ Izrẹl, ghạlhamo r’ịduon a Jehova ạḅenhi bọ nyọdi mọ kúḍighi ịdipho. Ọokpaany a Jehova amitenhaan ni nyọdi ẹpe eten phọ ịraar amem. A Belạm ọ́mhiin ọokpaany phọ, kụolo ẹnham adool phọ ọdi ịmhiin ni. Ẹḅel amem mọ ẹnham adool phọ ẹmhiin bọ ọokpaany phọ, ịwilhe ni eten phọ eḍigh eḍum. Omhunhenhiom ịyal amem mọ, ẹnham adool phọ ịgbal ọokpaany phọ ẹghi ẹghuuraam iikpe kụ owol a Belạm aguur iikpe phọ. Mem dị ẹnham adool phọ ẹḅilhe ẹmhiin dị ọokpaany phọ ạmheera esi dị ịlo oten ílo, iḅolholho sịphe eten phọ. Ịraar phọ amem mọ ịphen phọ, a Belạm ạgur ghan ni ẹnham adool phọ.

Ekureriom mọ, a Jehova aḍighi ni ịdi ẹnham adool phọ ẹḅa kụ epuru Belạm mọ: ‘Uḍighi ika kụ nạ rụgur ghan bọ ịmhi?’ A Belạm ạphagharanhaan mọ: ‘Nạ muufolhomhi ịmhi. Mị mughiigh ni nyịnha, mụghumo mị ụpham ni elhool ẹgham.’ Ẹnham adool phọ ịḅem mọ: ‘K’ạsia phọ nạ ruḍigh ghan bọ ịmhi, mị maḍighi ghan ni nyịnha ịduon phọ?’

Pọ kụ amem dị a Jehova aḍighi ịdi a Belạm ạmhiin ọokpaany phọ. Kụ ọokpaany phọ ạḅenhi Belạm mọ: ‘A Jehova nyịnha ọ́ḅenhi mọ kạ́ki atuulhe we phọ Izrẹl?’ A Belạm ạphagharanhaan mọ: ‘Mị maḍighi ịkaraph. Mị kaḅula ni olhoghi otu.’ Kụolo ọokpaany phọ ạḅenhi nyọdi mọ: ‘Nạ atue ni ạki Moạb, kụolo oginha ịpe a Jehova kạḅenhi bọ nyịnha kụ ẹdi nạ kạkaaph.’

A Belạm ạtuugha ni ịyaar esi ịphen emite bọ ḍụghum? Eeye. Ịphen phọ eten bọ, a Belạm ạkparagha ni oruulhe awe phọ Izrẹl ịraar amem. Kụolo, ịraar phọ amem mọ, a Jehova aḍighi ịdi ọdi ạseph ghụn bịdi. Ekureriom mọ, awe phọ Izrẹl uzuom ni we phọ a Moạb kụ oghiigh Belạm. Nạ ragbi mọ a Belạm mụ́moogh sụo eḍighi mạar dị ọdi ạnhaghanhan a Jehova k’ẹḅel amem mọ?