Bịdi Ụgbagharan A Jehova

Mem mọ awe phọ Izrẹl ọrol bọ ẹpe ẹdala phọ, a Kora, Detạn, rạ Ạbạịrạm, ḅịlhe r’ạbunhon 250 awe dị oḍighan bịdi, ụgbagharan ni Mozis. Bịdi ụḅenhi nyọdi mọ: ‘Ẹlo ạna mẹkasian ni! Eeghe kụ iḍighi kụ nạ kaḍighi bọ oḍiemhiom ayoor kụ Erọn aḍighi uwo ẹmhu ạbupinyon rịkia? A Jehova odi ni r’oomo ayira, kóginha Erọn r’ạna bịn.’ Ịpe bịdi oḍighi bọ ị́ḅeraan a Jehova. Ọdi alhoghoma mọ bịdi mọḅaar ẹmhu ọki esi ọdi!

A Mozis ạḅenhi Kora r’ạbuphe oḍighan bọ nyọdi mọ: ‘Itu sịphe ogbogo ịiḅereghi phọ iḍuenheen, ẹphamam rạraar ọsuom ịnsẹns phọ anyinha. A Jehova kuḍeenhaan ni iyira oye phọ ọdi mạsaḅar bọ.’

Ḍịeripho aḍio phọ, a Kora rạ 250 awe phọ oḍighan bọ nyọdi ụghi ni ọteeny Mozis sịphe ogbogo ịiḅereghi phọ. Sịphe phọ bịdi ụsuughi ịnsẹns mụdi bịdi ạbupinyon rịkia. A Jehova ạḅenhi Mozis ra Erọn mọ: ‘Ịgbatan siloor anyinha esi a Kora r’awe phọ ọdi.’

Ghạlhamo r’ịduon a Kora ạghi bọ ni ạteeny Mozis sịphe ogbogo ịiḅereghi phọ, a Detạn, Ạbạịrạm r’arughun otu phọ ạbidi úmeera ụki aani. A Jehova ạḅenhi we phọ Izrẹl mọ ọḍua ogbogo a Kora, Detạn, rạ Ạbạịrạm, kụ mem mem mọ, awe phọ Izrẹl ọḅua. A Detạn rạ Ạbạịrạm ụmheera ni erugh arogbogo phọ ạbidi, kụ eginha amem, bịn ade phọ ekpegherenhu ẹmhinhogh bịdi! Kụ sịphe ogbogo ịiḅereghi phọ, ạnian ịḅua ni ẹpe k’ạke esoor, kụ elhe Kora rạ 250 awe phọ oḍighan bọ nyọdi.

A Jehova ạḅenhi Mozis mọ: ‘Ḅẹnhi tọrobo ọolha eghun mọ amiteom ịkpara kụ ạge ghan ḍien oye phọ sịphe ịkpara phọ. Kụolo ịkpara eghun a Livạị, gẹ ḍien Erọn. Sịghe oomo ịkpara phọ ạlhogh olhoghi ogbogo ịiḅereghi phọ. Ạfạlhạwạị kasi ni ịkpara oye phọ mị ạsaḅar bọ.’

Ḍịeripho aḍio phọ, a Mozis amiteom ni oomo ịkpara phọ kụ aḍeenhaan rạalha phọ Izrẹl. Ịkpara phọ Erọn isi ni fạlhạwạị ạlmọnd r’iimhumha ạlmọnd dị mẹḅaal. A Jehova ạsighe eten phọ ẹphen phọ kụ aḍeenhaan mọ ọdi mạsaḅar Erọn oḍighi uwo ẹmhu ạbupinyon rịkia phọ.