Ḍioph R’ịyal Awe Iḅilhigha Phọ

Awe phọ Izrẹl ụḅua ni Ẹeḅaraph ạ Sạịnạị, kụ oogo ẹdala a Perạn osi esi dị oghol mọ Kedẹs. Sịphe phọ, a Jehova ạḅenhi Mozis mọ: ‘Tom ḍioph r’ịyal awe ọghi oḅilhigha de phọ a Kenạn, tọrobo eghun omiteom ghan oniin oye. Bịdi ọghi oḅilhigha de phọ mị kạngo bọ we phọ Izrẹl.’ A Mozis ạsaḅar ri 12 awe kụ ạḅenhi bịdi mọ: ‘Ịki de phọ a Kenạn ẹwaaghi ẹmhiin mụghumo ade phọ ẹnighe ni oḅeph eḍien. Ipoghom ni mụghumo awe phọ ọmoogh ni ịnyaam ọbobo ụ́moogh, mụghumo otugh rogbogo ọbobo igbogh ạramha.’ Kụ aḍioph r’ịyal awe iḅilhigha phọ ẹḅaram aani bọ Jọsụạ ra Kelẹb onyeenhe Kenạn.

Inya dị aḍughul otu reten, awe iḅilhigha phọ uḅula ni ra fig, pọmegrạnet r’ịizughum a grep. Awe iḅilhigha phọ ụḅem mọ: ‘Ade phọ ẹnighe ni, kụolo awe phọ ọmoogh ịnyaam kụ ạramha phọ ẹmoogh iikpe dị ephoph.’ Kụolo a Kelẹb ạḅem mọ: ‘Yira kotue ni ọkpar opu bịdi. Ọghi eginha amem!’ Nạ alegheri ni ịyaar phọ eḍighi bọ kụ a Kelẹb ạḅem bọ ịduon phọ? A Kelẹb rạ Jọsụạ uḍuom olhoghi a Jehova. Kụolo ạbueripho aḍioph awe iḅilhigha phọ ụḅem mọ: ‘Eeye! Awe phọ oḅagana yogh ịdipho uba awe! Yira ọkigh sịkpakpa esi ạbidi.’

Awe phọ Izrẹl uḅonyonhu ni ozuan, kụ omhiigh ogum. Kụ oniin ạḅenhi ghan nyoniin mọ: ‘Ọsaḅar ọnhon oḍiemhiom dị kụsighe iyira aḅulhemhi Ijipt. Eeghe kụ iḍighi kụ yira kọki bọ ẹpe phọ dị kụze iyira?’ Ạ Jọsụạ ra Kelẹb ụḅenhi we phọ mọ: ‘Kụ́ḅaar ẹmhu ụki esi a Jehova, kụ́moogh oghiilaan. A Jehova kughoph ni iyira.’ Kụolo awe phọ Izrẹl ụ́naghan. Bịdi ụwa ghụn oghiigh ạ Jọsụạ ra Kelẹb!

Ịpe bịdi oḍighi bọ ịrol ika esi a Jehova? A Jehova ạḅenhi Mozis mọ: ‘Etigheri oomo ịpe mị maḍighinhaan bọ we phọ Izrẹl, bịdi ọkiom ni ghisigh rọḅaar ẹmhu koru esi ạmhi. Esi ịduon phọ, bịdi kọtol sịen ẹdala phọ esi 40 ạsia. Kụ ịsien ẹdala phọ kụ ẹdi oomo phọ ạbidi komuughu. Ịbam ạnmuny ạbidi rạ Jọsụạ ra Kelẹb bịn kụ koḍigh de phọ mị maguanhaan bọ ọngo ạbidi.’