A Jehova Ạsaḅar Jọsụạ

A Mozis maḍiemhiom ni we phọ Izrẹl esi ịbadi ạsia kụ egbi bọ ọteeny amem dị kamugh. A Jehova ạḅenhi nyọdi mọ: ‘Nạ kụ kạ́sighe we phọ Izrẹl ạlogh De Oguan phọ. Kụolo mị kaḍighi ni ịdi nạ kạmiin de phọ.’ A Mozis ạḅenhi a Jehova mọ ạsaḅar oye dị kaḍiemhiom we phọ Izrẹl, kụ a Jehova ạḅenhi nyọdi mọ: ‘Kịa ạteeny Jọsụạ, ạḅenhi nyọdi mọ ọdi kụ ẹdi mọsaḅar.’

A Mozis ạḅenhi eelhe phọ Izrẹl mọ mẹteeny mem dị ọdi kamugh, ḅịlhe mọ a Jehova mạsaḅar Jọsụạ oḍiemhiom awe phọ. A Mozis ạḅenhi Jọsụạ mọ: ‘Kákiilhaan. A Jehova kạlhoghonhaan ni nyịnha ḍịghaagh.’ Íbia bịn a Mozis ạsiiny ạnyu Ẹeḅaraph phọ a Nibo, kụ a Jehova aḍeenhaan nyọdi de phọ Ọdi aguanhaan bọ Ebrạhạm, Ạịzik, ra Jekọb. A Mozis ạmhan 120 ạsia kụ agbi bọ omhugh.

A Jehova ạḅenhi Jọsụạ mọ: ‘Ịḅeeny Ọphiiny ạ Jọdạn, eḍigh de phọ a Kenạn. Mị kạlhoghonhaan ni nyịnha ḍịghaagh ịdipho mị ạlhoghonhaan bọ ḍịghaagh Mozis. Mịin ni mọ nạ ạbal ghan ni Olhogh phọ ạmhi tọrobo aḍio. Kákiilhaan. Kpọ oḅio. Kịa, ạtuugh ịpe mị ạḅenhi bọ nyịnha kụ aḍighi.’

Ạ Jọsụạ arom ni ịyal awe ọghi oḅilhigha a Jeriko. Esi ịtuugha phọ etum bọ sịen, yira kọtuugha ni olegheri ịyaar phọ emite bọ ẹpe phọ. Awe phọ oḅula bọ, ụḅenhi Jọsụạ mọ ọphon kụ ọkar amem oḍigh ade phọ a Kenạn, loor esi dị awe phọ a Kenạn rokiilhaan bịdi. Rẹḅaal, bịn ạ Jọsụạ ạḅenhi eelhe phọ Izrẹl mọ oḅetenhu onyeenhe. Kụ ọdi ạḅenhi bụpinyon rịkia phọ ọpham bọ igbe ịyo phọ mọ oḍiemhi ghan ẹpe Ọphiiny ạ Jọdạn. Mem mọ ạmuphe phọ iḍighi mem aḍigho, kụ ạmuum ọphiiny phọ amuza ni dị mamhiigh rakilhogh komite ẹpe ade phọ. Kụolo ịduon ạrada ạbupinyon rịkia phọ esoor bọ sịphe ạmuum mọ, bịn ạmuum ọphiiny phọ ạmheera eniin ạga kụ ạḍigharaghar ade emite. Ạbupinyon rịkia phọ urelhe ni osi ogbo ọphiiny phọ kụ ọmheera, kụ eelhe phọ Izrẹl orelhe ọḅeeny. Nạ ragbi mọ ịiḍaany phọ ịphen phọ ịitughianham ni bịdi ịiḍaany phọ a Jehova aḍighi bọ sịphe Ọphiiny Igbilha phọ ḍụghum?

Ekureriom mọ, awe phọ Izrẹl uḍigh ni De Phọ Oguan bọ. Nyịidipho, bịdi kotue ni ọlogh ruutu ọḅilhe ọmoogh rạmha ịlo ạbidi. Bịdi kotue ni ọzuph ịizupha kịrokiro, ọḅilhe ọmoogh iizo. Ịbadi ạraraar olhe r’ọphughol imuza ni de phọ ạḍiphe phọ dị tụtu oghol mọ ade ẹnhuum.