ESI ỊTUUGHA PHỌ 30
A Rehạb Ạaghi Ni We Iḅilhigha Phọ
Awe phọ Izrẹl ụghi ni oḅilhigha a Jeriko. Mem mọ bịdi osi bọ Jeriko, ụrol otu ạnhir dị oghol mọ a Rehạb. Mem mọ uwo ẹmha a Jeriko alhegheri bọ, ọdi arom we ẹgham ọdi mọ ọghi ka Rehạb. Kụolo a Rehạb ạaghi ni ịyal phọ awe phọ ọghi bọ iḅilhigha phọ ạnyu otu ọdi. Kụ aḍeenhaan we ẹgham mọ a Jeriko ẹnhon ạga dị kọki ọwa we phọ. Ọdi ạḅenhi we phọ Izrẹl ọghi bọ iḅilhigha phọ mọ: ‘Mị kịlhoghonhaan ni inyinha ḍịghaagh, ịdi eḍighi bọ mị alegheri ni mọ a Jehova odi r’anyinha. Nyinha kẹkpar ri ipu iyoor. Iseseeny, iguanhaan ịmhi mọ nyinha kẹpel li eghun otu phọ ạmhi.’
Awe iḅilhigha phọ ụḅenhi Rehạb mọ: ‘Yoor oguanhaan nyịnha mọ ịyaar kémitenhaan tọrobo oye dị ạrol sịen otu phọ ạna.’ Bịdi ụḅilhe ni ọḅenhi nyọdi mọ: ‘Kpọ ọtotogh oḍigh sịen eghuugh ookuugh phọ ạna, bịn ịyaar kéḍighi tọrobo ọlo eghun otu ạna.’
A Rehạb amiteom oḍigh sịphe eghuugh ookuugh phọ ọdi, kụ awe phọ ọghi bọ iḅilhigha phọ ọkpaph osoor ude. Bịdi ụghi ẹpe ạraaḅaraph phọ ạaghian esi ịraar aḍughul otu kụ ogbi ọghi ọteeny ạ Jọsụạ. Ịpe reten, kụ awe phọ Izrẹl ọḅeeny Ọphiiny ạ Jọdạn kụ ookolhobian ọsighe ade phọ. A Jeriko kụ ẹḅel ẹmha dị bịdi ọkpar opu. A Jehova ạḅenhi bịdi mọ orelhe ooghironhom oomo ẹmha phọ mem tọrobo aḍio esi odiiny aḍughul otu. Kụ omhunhenhiom oḍual aḍio phọ, bịdi urelhe ooghironhom Jeriko oḍual amem. Kụ ạbupinyon rikiạ phọ ophulha rụkuodu phọ ạbidi kụ awe ẹgham mọ olọ r’oomo ịnyaam ạbidi. Bịn iikpe ẹmha phọ emhiigh omelheghu! Kụolo otu phọ a Rehạb ạkar bọ ạkpaariom iikpe ẹmha phọ ómheel aani. A Jehova ạphel li Rehạb r’eghun otu phọ ọdi loor esi dị bịdi uḍuom olhoghi a Jehova.
“Ịduon kẹn kụ ẹdi Ẹnaan ẹsighe bọ Rehab . . . Ọdi ạlogh ni otu [bụo a Ju phọ ọghi bọ dom mọ] kụ ạma ẹnon eten aḍeenaan bịdi, ọbo bịdi okpetenaan bụo ẹpomoghian phọ ạbidi. Ẹnaan ịtuan iiḅi phọ ịphen dị aḍighi bọ kụ ẹsighe bọ mọ ọdi ạnir aruukuan ni.” —Jems 2:25