Ạ Jọsụạ R’awe Phọ A Gibiọn

Mem mọ ophiemhi bọ Jeriko kụ ịinhaghan phọ elheeny bọ oomo phọ a Kenạn, aruwo ẹmha phọ ạbidi uḍighan ọghi eenhan awe phọ Izrẹl. Kụolo awe phọ a Gibiọn ụmhoogh ni ịnhon ịitughian. Bịdi ụsighe igbaany ạrusuoma dị meḅu ọkpolhoghian kụ ọghi ọteeny Jọsụạ ọḅenhi mọ: ‘Yoor ụḅua ni ekpisi dị ẹkel kụ oru. Yoor mọnhaghan ịlo a Jehova r’oomo ịpe ọdi iḍighinhaan bọ inyinha ẹpe Ijipt ra Moạb. Iguanhaan iyoor mọ nyinha iyoor kízuoghom, bịn yoor koḍighi rẹbenhe anyinha.’

Ạ Jọsụạ amheeraam ni ịpe awe phọ ọghaaph bọ kụ aguanhaan mọ awe phọ Izrẹl kózuoghom bịdi. Ịraar aḍughul otu reten bịn ạ Jọsụạ alhegheri mọ awe phọ ụ́ḍua ekpisi dị ẹkel kụ oru. Bịdi ọkar otugh sịphe ade phọ a Kenạn. Ạ Jọsụạ apuru ni we phọ a Gibiọn mọ: ‘Eeghe kụ iḍighi kụ nyinha iikelheghi bọ iyoor?’ Kụ bịdi ọphagharanhaan mọ: ‘Yoor ụmhoogh oghiilhaan, loor esi dị yoor olegheri mọ a Jehova kụ rabe ẹgham mọ anyinha. Iseseeny, iyoor kị́ze.’ Ạ Jọsụạ aḍighi ni ịpe ọdi ạghaaph bọ kụ ọ́ze we phọ.

Íbia bịn oogh aruwo ẹmha a Kenạn r’awe ẹgham ạbidi onyeenhe ọghi ozuom awe phọ a Gibiọn. Ạ Jọsụạ r’awe ẹgham mọ ọdi urelhe ni oomo aḍughul ọghi ọlhoghonhaan awe phọ a Gibiọn ḍịghaagh. Kụ eḅon ạḍiroor bịdi ọghi bọ osi, bịn ẹgham mọ emhiigh. Awe ẹgham mọ a Kenạn umhiigh ni osumughu. Tọrobo ekpisi dị awe phọ osuma rọki, a Jehova aḍighi ịdi igbogh iiḅoghoḍi ibikpo emhelheghuom ghan we phọ ẹze. Ạ Jọsụạ ạaḅereghi ni ạḅenhi a Jehova mọ aḍighi ịdi erumuḍio phọ kẹmu ghan bịn. Eeghe kụ iḍighi kụ ạ Jọsụạ ạḅenhi bọ a Jehova mọ aḍighi ịdi erumuḍio phọ kẹmu ghan bịn ghạlhamo r’ịduon kémite ghan bọ? Ạ Jọsụạ aḍuom olhoghi a Jehova. Erumuḍio phọ ịmu ni tụtu awe phọ Izrẹl ọze ruwo ẹmha phọ a Kenạn r’awe ẹgham mọ ạbidi ọmhan.