Omhoom Oḍiemhiom R’ịyal Ạnmariir Dị Ọkpo Oḅio

Esi ịbadi ạsia, ạ Jọsụạ kụ aḍiemhiom ghan we phọ a Jehova tụtu amhugh bọ mem dị odi 110 ạsia. Mem mọ ạ Jọsụạ ạrol bọ, awe phọ Izrẹl ụuḅereghi ghan ni a Jehova. Kụolo ạ Jọsụạ romhugh bịn awe phọ omhiigh ọoḅereghi ịkaanheen ạrumhugh ịdipho awe phọ a Kenạn. Loor ịduon awe phọ Izrẹl ọwilhe bọ ọoḅereghi a Jehova, a Jehova ameera ni mọ uwo ẹmha a Kenạn dị oghol mọ Jebin ạkom ịmhinhimiin ạngo bịdi. Awe phọ umhoghi ni ọḅenhi a Jehova, kụ a Jehova ạma Berạk dị kaḍiemhiom we phọ ạḅilhe ạloghonhaan bịdi ḍịghaagh oḅula esi ọdi.

Oniin ạnhir dị oghol mọ Debora, dị aḍighi oyil a Jehova arom ni mọ ọmhagh Berạk. A Debora ạḅenhi Berạk mọ: ‘Pạm 10,000 awe ạghimom ẹpe ọphiiny phọ ạ Kạịsọn abean Sisera. Nạ kạkpar ri apu Sisera aḍighi bọ oḍiemhiom awe ẹgham mọ a Jebin.’ Kụolo a Berạk ạḅenhi a Debora mọ: ‘Eḍighi mạar dị nạ ụdaph ịmhi, pọ mị kạki ni.’ A Debora ạphagharanhaan mọ: ‘Mị kạdaph ni nyịnha kụolo legheri mọ nạ kụ kákiigh a Sisera. A Jehova ạḅem mọ ạnhir ephoph kụ kakiigh a Sisera.’

A Debora ạdaph ni Berạk r’awe ẹgham mọ ọdi aakpomhoghi bọ asi Ẹeḅaraph a Tebọ dị kọki obe ẹgham mọ. Ịduon a Sisera ạnhaghan bọ ịphen phọ, bịn aakpomhoghi rughuugh ẹgham mọ ọdi r’awe ẹgham mọ ọdi ạghimom sịphe eḍiiny phọ ạ Kạịsọn. A Debora ạḅenhi Berạk mọ: ‘Rodon phọ, a Jehova kaḍighi ni ịdi nạ kạkpar apu a Sisera r’awe ẹgham mọ ọdi.’ Kụ a Berạk ra 10,000 awe ẹgham mọ ọdi osoor ude ẹeḅaraph phọ ọghi ozuom a Sisera r’awe ẹgham mọ ọdi ọmhoogh bọ ịikpo.

A Jehova aḍighi ni ịdi ạmuum ọphiiny phọ ạ Kạịsọn amuza kụ akilhogh. Bịn eḍighi ịdi arughuugh ẹgham mọ a Sisera ítue mụn ikiil loor esi ọposo phọ. A Sisera ạwilhe ni oghuugh ẹgham mọ ọdi aghiil asuma. Kụolo a Berạk r’awe ẹgham mọ ọdi ụkpar ri opu we ẹgham mọ a Sisera kụ ophorogh a Sisera. A Sisera aghiil aḍigh ogbogo ạnhir dị oghol mọ Jeẹl, kụ ạnhir phọ ạngo nyọdi mạmaam ẹnham ọphughol kụ ạḅilhe ạsighe ukpe azu nyọdi. Kụ a Sisera amhiigh ọnhaani. Mem mọ a Sisera rạnaani bọ, ạnhir phọ ạasophoghu ni ạghi sịphe ọdi odi bọ kụ ạsighe oreeny dị ọkpol ạkan ẹmhu a Sisera bịn a Sisera amhugh.

Mem dị a Berạk rạwa a Sisera, a Jeẹl amite ni sịphe ogbogo phọ ọdi kụ ạḅenhi nyọdi mọ: ‘Ḍigh olhoghi otu mị kaḍeenhaan nyịnha oye phọ nạ rạwa bọ.’ A Berạk aḍigh bọ ogbogo phọ, ạmhiin dị a Sisera mamhugh. A Berạk ra Debora ụmoor ri ḍụor oboom a Jehova loor esi ịduon aḍighi bọ ịdi awe phọ Izrẹl ọkpar opu mụlhogh ḍien phọ ạbidi. Kụ esi 40 ạsia, ẹepho ịrol li Izrẹl.