A Rut Rạ Nạomi

Mem dị ịgbakuro ẹrol Izrẹl, oniin ạnhir ọlo Izrẹl dị oghol mọ Nạomi ạpham ni ịyal ạnmuny ọdi ạdaph olom ọdi ạghi Moạb. Ịdipho amem mọ rẹki bọ, olom mọ ạ Nạomi amhugh ni kụ ịyal phọ ạnmuny phọ ọdi ophinhogh nmạnyaan a Moạb. Siḍien ạnmanyaan phọ ughol mọ Rut rạ Ọpạ. Kụolo dị eeph ni iboom, ịyal phọ ạnmuny phọ ạ Nạomi umhugh aani ni.

Mem mọ ạ Nạomi ạnhaghan bọ mọ ịgbakuro phọ ẹrol bọ Izrẹl mesi eekunha, ọdi asopha ni mọ ọdi kaḅula kụ a Rut rạ Ọpạ ụdaph ni nyọdi. Kụolo ịduon bịdi rọki bọ, ạ Nạomi ạḅenhi bịdi mọ: ‘Nyinha eḍighi ni bugey ạnmariir. Mị rạwa dị ịyal phọ anyinha keḅula ẹpe Moạb ẹḅilhe ẹbal ilhom.’ Ịyal phọ ạnmanyaan phọ ụphagharanhaan mọ: ‘Yoor ọphomhoghian nyịnha! Kụ yoor ụ́wa ọwilhe ạna.’ Ạ Nạomi ạghiom ni ghisigh ạkpaariom bịdi mọ oḅula Moạb. Eekunha phọ, Ọpạ aḅula ni, kụ a Rut ạdaph ạ Nạomi. Kụolo ạ Nạomi ạḅenhi Rut mọ: ‘Mịin, Ọpạ raḅula ọghi ọteeny awe phọ ọdi r’ọoḅereghi ạrumhugh phọ ọdi. Dạph aani nyọdi aḅula k’onhiin phọ ạna.’ Kụolo a Rut ạphagharanhaan mọ: ‘Eeye, mị nyịnha kạ́wilhe. Awe phọ ạna kụ koḍighi we ạmhi, kụ Ẹnhaan phọ ạna kụ keḍighi Ẹnhaan ạmhi.’ Nạ ragbi mọ ikpo ọnhu phọ a Rut itir ri ạ Nạomi?

A Rut rạ Nạomi usi ni de phọ Izrẹl mem dị momhiigh ọku ạ bạli. Ḍiniin aḍio, a Rut ạghi ni ọson ịkenheku ozo oye dị oghol mọ Boạz, aḍighi bọ ọony a Rehạb. A Boạz ạnaghan ni mọ a Rut ọlo a Moạb dị ạdaph onhiin olom ọdi aḅula Izrẹl. A Boạz ạḅenhi ni we phọ roḍighinhaan ghan bọ nyọdi oḍighi phọ mọ bịdi ọwilhe iniin ịizupha phọ pịdi a Rut atue ạson aani.

A Rut rosi olhoghi otu dulhe, kụ ạ Nạomi apuru nyọdi mọ: ‘Ozo ạnhian kụ ẹdi nạ ạghi bọ aḍighi oḍighi rodon phọ?’ A Rut ạphagharanhaan mọ: ‘Oye phọ ạmhoogh bọ ozo phọ mị ạghi bọ akumuan okol mọ Boạz.’ Ạ Nạomi ạḅenhi Rut mọ: ‘A Boạz asiya olom ạmhi. Kịa ghan ni sịphe ozo phọ ọdi akumuan r’ạbueripho ạnmanyaan phọ. Ịsiphe kụ kẹphoonhaan nyịnha.’

A Rut ạghiom ni ghisigh ạghi ghan ozo phọ a Boạz akumuan tụtu ọku bạli phọ ọmhan. A Boạz ạmhiin Rut ịdipho ọnyanhi dị ạmhaar rukumuan ạḅilhe ạmhoogh ịma ạraaghara. Mem mọ ạmuphe phọ, eḍighi mạar dị oye dị mọony ụ́moogh amhugh, ọnyo asiya ọdi katue ni apin ạnhir phọ ọdi. Esi ịduon phọ, a Boạz aphin ni Rut kụ bịdi ọmhoogh mọony dị oghol mọ Obẹd. Obẹd phọ kụ aḍighi ogbogh ọde Uwo Ẹmha phọ Devid. Ilhoghi ạrighiri phọ ạ Nạomi ịḅaal li kụ ọḅenhi nyọdi mọ: ‘A Jehova ạphur ạngo nyịnha Rut, kụ ạmaar ri raphogh nyịnha. Kụ nyịidipho, mạḅilhe ạngo nyịnha ọbumoony. Ạḍiseph ẹrolhonhaan a Jehova.’