A Gidiọn Ạkpar Ri Apu We A Midia

Ẹsighe rẹki, awe phọ Izrẹl ụwilhe ni a Jehova kụ omhiigh ọoḅereghi ịkaanheen ạrumhugh. Kụ esi oḍual ạsia, awe phọ a Midia umhi ghan ni ịnham awe phọ Izrẹl, ọḅilhe ophiemhi ghan ịizupha ạbidi. Loor esi awe phọ a Midia, awe phọ Izrẹl ạaghian ghan ni ilhoghi aropogh ạraaḅaraph. Bịdi ụuḅereghi ni ọlhom a Jehova mọ ạphel bụno. Esi ịduon phọ, a Jehova arom ọokpaany ọghi ọteeny ọnyo ugheel ọony dị oghol mọ Gidiọn. Ọokpaany phọ ạḅenhi Gidiọn mọ: ‘A Jehova mạsaḅar nyịnha oḍighi ophelhegbe ẹgham.’ A Gidiọn apuru ni ọokpaany phọ mọ: ‘Ika kụ ẹdi mị katue bọ ạpel Izrẹl? Mị ụ́man mạar.’

Nạ ragbi mọ a Gidiọn kaḍighi eeghe kụ atue akuphom owol mọ a Jehova mạsaḅar nyọdi? Ọdi ạsighe ukpe dị oḍighinhom suphuuph ẹnham kụ aseere ude, kụ ạḅenhi a Jehova mọ: ‘Eḍighi mạar dị ḍịroor kụ ooto asoorom ukpe phọ ọphon phọ dị tụtu ạḅor, kụolo ude phọ ạgharaghar, pọ mị kalegheri ni mọ mị kụ ẹdi nạ kạsighe bọ ạpelhom we phọ Izrẹl.’ Mem dị a Gidiọn ạghi ḍịroor, ọdi ạmhiin ni mọ ukpe phọ mạḅor, kụolo ude phọ ạkaraghar ri! A Gidiọn ạḅilhe ni ạlhom a Jehova mọ aḍighi ịdi ukpe phọ kạkaraghar, kụolo ade phọ ẹḅor. Mem dị a Jehova aḍighi ịpe a Gidiọn ạḅenhi bọ nyọdi, a Gidiọn akuphom ni owol mọ a Jehova mạsaḅar nyọdi. Esi ịduon phọ, ọdi aakpomhoghi ni we Izrẹl dị kọki obean we phọ a Midia.

A Jehova ạḅenhi Gidiọn mọ: ‘Mị kaḍighi ni ịdi awe phọ Izrẹl kọkpar opu we a Midia. Kụolo loor esi aḍita awe ẹgham mọ odi bọ r’ạna, nyinha etue ni ẹetughian mọ ịnyaam anyinha, kụ nyinha ẹkpar bọ epu. Esi ịduon phọ, ḅẹnhi tọrobo oye dị rakiilhaan mọ ọdi aḅula.’ Ịphen phọ iḍighi ịdi 22,000 awe ẹgham mọ oḅula olhoghi otu, kụ 10,000 awe osugha ra Gidiọn. A Jehova ạḅilhe ni ạḅenhi Gidiọn mọ: ‘Awe ẹgham mọ odi bọ r’ạna ọpughan. Pạm bịdi ạghimom ẹpe okol ạmuum mọ kụ ạḅenhi bịdi mọ ọphughol mụum mọ. Tọrobo oye dị rạpughol mụum mọ kụ ạḅilhe ghan agon ophogh mụghumo ẹ́pomoghian phọ rotu kụ kạdaph nyịnha.’ Oginha 300 awe kụ uḍighi ịduon phọ. A Jehova aguanhaan Gidiọn mọ oginha 300 awe phọ ạbuen phọ kụ kọki ọkpar opu 135,000 awe ẹgham mọ a Midia.

Ḍughul aḍio phọ ạḍiphe phọ, a Jehova ạḅenhi Gidiọn mọ: ‘Amem mọ mẹteeny dị nyinha kẹki ezuom we phọ a Midia!’ A Gidiọn ạngo ni we ẹgham mọ ọdi ruuḍue, r’izoki dị ịmhure edi olhoghi. Kụ ọdi ạḅenhi bịdi mọ: ‘Ipogh ghan ịphen mị raḍighi bọ kụ ẹtuugh eḍighi aani.’ A Gidiọn aphulha ni eeḍue phọ ọdi, aḅom izoki phọ ọdi kụ aphighemhi ọmhure phọ ọdi mọsu bọ kụ ạlo mọ: ‘Elhool ẹgham mọ a Jehova r’ẹlo a Gidiọn!’ Ịraar okuruon awe phọ ọrol bọ r’ọdi ụtuugh ni ịduon phọ oḍighi aani. Kụ ịpe bịdi oḍighi bọ eḍighi ịdi awe phọ a Midia ọmhoogh oghiilaan kụ omhiigh oghilhighu r’ọzean asiloor. Nyịidipho a Jehova mạḅilhe ạloghonhaan we phọ Izrẹl ḍịghaagh ọkpar opu ẹ́pomhoghian phọ ạbidi.