Ạ Hạnạ Ạlhom A Jehova Mọony Olhephiri

Oye ọlo Izrẹl dị oghol mọ Ẹlkenạ ạmhoogh ịyal ạnmariir. Ḍien oniin ughol mọ Hạnạ kụ ọphoripho ughol mọ Pẹninạ. Kụolo ạ Hạnạ kụ ẹdi ọdi ạphomhoghian apu. Ạ Pẹninạ ạgilaam ghan ni Hạnạ loor esi dị ọdi mạmhar ịbam ạnmuny kụ ạ Hạnạ kọ̋mhar. Tọrobo ạlha, Ẹlkenạ ạpham ghan ni eghun otu phọ ọdi ạghimom ogbogo ịiḅereghi phọ ạrol bọ Sạịlo. Ḍiniin aḍio dị bịdi ọghi ẹpe phọ, Ẹlkenạ ạmhiin ni dị ạnhir phọ ọdi ạphomhoghian bọ iboom ramoghi, kụ ạḅenhi mọ: ‘Seseeny kámoghi, Hạnạ. Nạ ụmhoogh ịmhi. Kụ mị ạphomhoghian ni nyịnha.’

Mọony amem, bịn oginha ạ Hạnạ anyeenhe ọghi ọoḅereghi. Ạ Hạnạ órue ọwilhe emoghi phọ, ịduon ọdi rạlom bọ dị a Jehova kạloghonhaan nyọdi ḍịghaagh. Ọdi aguanhaan ni a Jehova mọ: ‘Eḍighi mạar dị nạ ụngo ịmhi mọony olhephiri, mị kạḅogh ni nyọdi ạngo nyịnha, kụ akumu nyịnha oomo aghuḍum mọ ọdi.’

Uwo ẹmhu ạbupinyon rịkia phọ Ilạị, ạmhiin ni ịduon ạ Hạnạ ramoghi bọ kạḅilhe ọḅenhi a Jehova ịiḅaghamhi phọ ọdi, kụ ạatughian mọ ọdi ạpugholhogh miim. Ạ Hạnạ ạḅenhi ni Ilạị mọ: ‘Uwo ẹmhoogh ạmhi, mị ụ́pughol miim. Ịyaar kụ rịiḅaghamhi ịmhi iboom, kụ mị rạḅenhi ghan a Jehova.’ Ilạị ạmhiin ni mọ ọdi mạpioman kụ ạḅenhi Hạnạ mọ: ‘Ẹnhaan aḍighi ni ịpe nạ rạwa bọ ạngo nyịnha.’ Olhoghi ạ Hạnạ aphooph ni, kụ ọdi anyeenhe ọḍua. Ị́man lhạ bịn ọdi ạmhar mọony olhephiri kụ aghol mọ Sạmụẹl. Dị iikia ílo, olhoghi ạ Hạnạ ạḅaal li.

Ạ Hạnạ ówulha ịpe ọdi aguanhaan bọ a Jehova. Ọdi roghinhe Sạmụẹl mạmaam bịn ạsighe ạghi sịphe ogbogo ịiḅereghi phọ dị kakumuan ghan. Ọdi ạḅenhi Ilạị mọ: ‘Ọony phọ ọphon phọ kụ ẹdi mị ạaḅereghi bọ ạlhom a Jehova. Oomo aghuḍum mọ ọdi, mị ạḅogh nyọdi ạngo a Jehova.’ Tọrobo ạlha Ẹlkenạ rạ Hạnạ ụghi ghan ni ophogh Sạmụẹl, kụ ọpham ghan ạsuoma dị ạraghaagh ílo ọghiomaan nyọdi. A Jehova ạḅilhe aḍighi ịdi ạ Hạnạ aamor ạmhar ịraar alhephiri ạnmuny r’ịyal ạnmanyaan.