Oguan Phọ Ạ Jẹftạ

Awe phọ Izrẹl ụḅilhe ni ọwilhe a Jehova omhiigh ọoḅereghi ịkaanheen ạraraar. Mem dị awe Ạmọn ozuom we phọ Izrẹl elhebiri, ịkaanheen ạrumhugh phọ awe phọ Izrẹl rọoḅereghi bọ ị́loghonhaan bịdi ḍịghaagh. Esi ịbadi ạsia, awe phọ Izrẹl ụmhiinhom ni. Eekunha phọ, bịdi ụḅenhi ni a Jehova mọ: ‘Yoor mọpioman. Seseeny ụphel iyoor ạsighe ḍịghaagh ẹ́pomoghian phọ ayoor.’ Awe phọ Izrẹl ụphueghi ni ịkaanheen ạraraar phọ bịdi ọoḅereghi ghan bọ kụ omhiigh ọoḅereghi a Jehova. Loor ịduon ị́ḅeraan bọ a Jehova ọmhiin dị awe phọ ọdi rọmiinhom, ọdi aḍighi ni ịyaar.

A Jehova ạsaḅar oye dị oghol mọ Jẹftạ oḍiemhiom awe phọ ọdi ọghi obean awe phọ Ạmọn. Ạ Jẹftạ ạḅenhi a Jehova mọ: ‘Eḍighi mạar dị nạ ụlhoghonhaan ịmhi ḍịghaagh ọkpar opu ẹ́pomoghian phọ Izrẹl, pọ mị aguanhaan mọ mị aḅula olhoghi otu, tọrobo oye dị ạphur aghiil amite sịphe olhoghi otu phọ ọmhagh ạmhi, mị kạḅogh ạngo nyịnha.’ A Jehova ạnhaghan ni ịiḅereghi phọ ạ Jẹftạ kụ ạlhoghonhaan nyọdi ḍịghaagh ọkpar opu ẹgham mọ.

Mem dị ạ Jẹftạ aḅula olhoghi otu, ọḅel oye dị amite ọmhagh ọdi pọ ọnyanhi phọ ọdi, aḍighi bọ oginha ọbumoony ọdi. Ọnyanhi phọ ạ Jẹftạ ạgher ịḅa r’ịsagha dị ạpham kụ ạghi ạteeny ọde phọ ọdi. Ạ Jẹftạ kaḍighi ika? Ọdi ạatughian ni oguan phọ ọdi aguanhaan bọ a Jehova, kụ ạlo mọ: ‘Sey nyạnhi ạmhi! Nạ maḍighi ịdi olhoghi ạmhi ụ́ḅaal. Mị uguanhaan ni a Jehova ịyaar. Kụ orue omhunhenhi oguan phọ, ẹwa dị mị kameera mọ kịa ẹpe ogbogo ịiḅereghi phọ odi bọ Sạịlo akumuan.’ Ọnyanhi phọ ọdi ạphagharanhaan mọ: ‘Ọde, eḍighi mạar dị nạ maguanhaan a Jehova ịyaar, pọ tụugh ni ịpe nạ ạghaaph bọ aḍighi. Kụ mị agbi ọghi, ạrighiri ạnmariir phọ ạmhi r’ạmhi ụki ẹpe ạraaḅaraph phọ ụtol esi ịyal ụnwanyu.’ Ọnyanhi phọ ạ Jẹftạ ạrol li ẹpe ogbogo ịiḅereghi phọ akumu a Jehova oomo ạdol aghuḍum mọ ọdi. Tọrobo ạlha, ạrighiri phọ ọdi ụghi ghan ni Sạịlo ophogh ọdi.