A Jehova Ạḅaanhaan Sạmụẹl

Uwo ẹmhu ạbupinyon rịkia phọ Ilạị, ạmhoogh ịyal ạnmuny dị okumuan ghan ịdipho ạbupinyon rịkia sịphe ogbogo ịiḅereghi phọ. Siḍien ạbidi ughol mọ Họfnạị ra Finihạs. Ịyal phọ ạbidi ụ́daph ghan iilhogh phọ a Jehova, esi ịduon phọ ụzoom ghan we phọ Izrẹl ẹkaraph eten. Mem dị awe phọ Izrẹl ọpham rịkia ọghimom sịphe ogbogo ịiḅereghi phọ ọphighiron ọngo a Jehova, ạ Họfnạị ra Finihạs ụsighe ghan pạkiri ẹnham mọ ẹkar bọ ẹnighe. Ilạị ạnhaghan ni rạraar phọ ạnmuny phọ ọdi roḍighi bọ kụolo óḍighi ịyaar. A Jehova kaḅoorian ni bịn ḍụghum?

Ghạlhamo r’ịduon ạ Sạmụẹl aghom bọ ni, ọdi ọ́tuughaany aani ẹkaraph eḍeenhaan phọ ạ Họfnạị ra Finihạs. Ạdol aghuḍum mọ ạ Sạmụẹl ịḅeraan ni a Jehova. Ḍiniin aḍughul dị ạ Sạmụẹl rạnaanhi, ẹḍogh ịmagh ni Sạmụẹl kụ ọdi aḅetenhu ạghi ạteeny Ilạị ạḅenhi mọ: ‘Pọrono ạmhi!’ Kụolo Ilạị ạḅenhi nyọdi mọ: ‘Mị nyịnha ụ́mhagh. Kịa ạḅilhe ạmhinha.’ Ạ Sạmụẹl ạghi ni ạmhinha, kụ ẹḍogh phọ ẹḅilhe ẹmhagh nyọdi omhunhenhiom ịyal amem, kụ ọdi ạḅilhe ạghi ạteeny Ilạị, kụ Ilạị ạḅenhi nyọdi mọ ạghi ạḅilhe ạmhinha. Mem dị ịphẹn phọ emite omhunhenhiom ịraar amem, Ilạị alhegheri ni mọ a Jehova kụ rạmagh ghan Sạmụẹl. Esi ịduon phọ, ọdi ạḅenhi Sạmụẹl mọ eḍighi mạar dị ẹḍogh phọ ẹḅilhe ẹmhagh nyọdị, ọdi ạphagharanhaan mọ: ‘Kạaph Jehova, ẹbenhe phọ ạna rạnaghan ni.’

Ạ Sạmụẹl ạḅilhe ni ạghi ạmhinha, kụ ạnaghan dị ẹḍogh phọ ẹḅilhe ẹmhagh nyọdi mọ: ‘Sạmụẹl! Sạmụẹl!’ Kụ ọdi ạphagharanhaan mọ: ‘Kạaph, ẹbenhe phọ ạna rạnaghan ni.’ A Jehova ạḅenhi Sạmụẹl mọ: ‘Ḅẹnhi Ilạị mọ mị kạliom ni nyọdi r’eghun otu phọ ọdi loor esi dị ọdi alegheri ni mọ ạnmuny phọ ọdi roḍighi ghan ịkaraph ạraraar sịphe ogbogo ịiḅereghi phọ kụolo ọdi óḍighi ịyaar.’ Ạḍiroor rẹḅaal ạ Sạmụẹl aghunyon ni rughuugh ogbogo ịiḅereghi phọ ịdipho ọdi raḍighi ghan bọ. Ạ Sạmụẹl aghiilhaan ni ọḅenhi uwo ẹmhu ạbupinyon rịkia phọ ịpe a Jehova mạḅem bọ. Kụolo Ilạị ạmhagh ni nyọdi kụ ạḅenhi mọ: ‘Sạmụẹl, a Jehova ạḅenhi nyịnha eeghe ịyaar? Ụḅenhi ịmhi oomo ịpe ọdi ạḅenhi bọ nyịnha.’ Esi ịduon phọ, ạ Sạmụẹl ạḅenhi ni nyọdi oomo ịpe a Jehova ạghaaph bọ.

Ịduon ạ Sạmụẹl rạmanham bọ, ọdi ạghi ni ghisigh aḍighi ghan rạraar dị ẹḅeraan a Jehova. Kụ oomo awe phọ Izrẹl ulhegheri ni mọ a Jehova mạsaḅar Sạmụẹl oḍighi oyil r’oḍiemhiom.