A Devid Ra Golạyạt

A Jehova ạḅenhi Sạmụẹl mọ: ‘Kịa olhoghi otu ạ Jẹsị. Mị mạsaḅar oniin ọony ọdi dị kaḍighi uwo ẹmha Izrẹl.’ Ạ Sạmụẹl ạghi ni olhoghi otu ạ Jẹsị, kụ mem dị ạmhiin ọḅel ọony phọ, ọdi ạatughian mọ: ‘Ọphon phọ kụ ẹdi a Jehova mạsaḅar.’ Kụolo a Jehova ạḅenhi Sạmụẹl mọ ọdi ọ́saḅar ọḅel ọony phọ. A Jehova ạḅilhe ạḅenhi nyọdi mọ: ‘Mị rapogh ghan ekpom oye, káḍimite.’

Ạ Jẹsị ạḅilhe ạghi ạmhagh odiiny ạnmuny ọdi, kụolo ạ Sạmụẹl ạḅenhi mọ: ‘Ọpo a Jehova ạsaḅar bọ ólho sịen phọ. Nạ ạḅilhe ni ạmoogh bụnhon ạnmuny ḍụghum?’ Ạ Jẹsị ạphagharanhaan mọ: ‘Mị ạḅilhe ni ạmoogh oniin ọony, kụolo ọdi kụ ọbam. Ḍien ọdi okol mọ Devid. Ọdi odi elhegheḍum rapogh ghan iyool ịga ạmhi.’ Mem dị ọpham bọ Devid orumom, a Jehova ạḅenhi Sạmụẹl mọ: ‘Ọdi kụ ẹdi mị ạsaḅar!’ Kụ ạ Sạmụẹl ạsighe elo aaduom ẹmhu a Devid, ọma oḍeenhaan mọ ọdi kụ kaḍighi omhoom uwo ẹmha Izrẹl.

Eniin amem dị awe Izrẹl r’awe a Filistia phọ rọwa ee ẹgham, oniin ọnyo ẹgham awe a Filistia phọ dị aḅagana dị oghol mọ Golạyạt ạḅenhi yogh ghan we phọ Izrẹl tọrobo aḍio. Ọdi ạḅenhi ghan bịdi mọ: ‘Imiteom oye dị katue eenhan ịmhi. Eḍighi mạar dị ọdi ạkpar upu ịmhi, pọ yoor koḍighi rẹbenhe anyinha. Kụolo eḍighi mạar dị mị ạkpar apu nyọdi, pọ nyinha keḍighi rẹbenhe ayoor.’

Ḍiniin aḍio dị a Devid ạsighe eḍien ạghiom bumor ọdi dị odi ẹpe erugh ẹgham mọ, ọdi ạnaghan ni ịpe a Golạyạt ạghaaph ghan bọ. Kụ ạḅem mọ: ‘Mị kạki abean nyọdi!’ Uwo ẹmha phọ Sọl ạḅenhi Devid mọ: ‘Nạ akom ạpughan.’ Kụ a Devid ạphagharanhaan mọ: ‘A Jehova kụlhoghonhaan ni ịmhi ḍịghaagh.’

Ạ Sọl ạngo ni Devid rạraar ẹgham ọdi ọsighe obeom elhebiri phọ, kụolo a Devid ạḅem mọ: ‘Mị kátue abeom rạraar phọ ịphen phọ.’ Esi ịduon phọ, a Devid ạsighe ni kạtapot ọdi, kụ ạghi ọgbal ọphiiny ạsighe oogh ikpo ạlhogh okuru ọdi kụ aghiil anyeenhe ẹpe a Golạyạt odi bọ. A Golạyạt ạmhiin bọ Devid ạlo mọ: ‘Nạ aḍighi ephurukpu ọbumoony, tue ẹphen mị kaghiigh nyịnha kụ ịnhun phọ r’ilhom ịnham mọ ẹba ḍizu phọ ạna.’ Kụolo a Devid óghiilhaan. Ọdi ạlo ạḅenhi a Golạyạt mọ: ‘Nạ ạpam ọsoph r’elhool ẹgham kụ ratu eenhan ạmhi. Kụolo mị akol ḍien phọ a Jehova kụ ratu bọ eenhan ạna. Ẹnhaan phọ ayoor r’ạna kụ kebe. Tọrobo oye dị odi sịen phọ kạmiin ni mọ a Jehova kụ ạmhoogh ịikpo apu elhool ẹgham r’ọsoph. Ọdi kịḅogh ni inyinha ạlogh ḍịghaagh ayoor.’

A Devid ạsighe ni ekpo ạlhogh sịphe ạkatapot phọ, kụ ạphiphom oomo ịnyaam ọdi kụ aroph. Dị eego esi ọlhoghonhaan ạḍighaagh a Jehova, ekpo phọ ịghi ni eḍigh epul a Golạyạt kụ ọdi amheel amhugh. Ịphen phọ iḍighi ni ịdi awe a Filistia phọ osumughu. Nạ aḍuom ni olhoghi a Jehova ịdipho a Devid?