Ọḅel Uwo Ẹmha Izrẹl

A Jehova amiteom buugboom ịiruen dị koḍiemhiom ghan we phọ Izrẹl. Kụolo awe phọ Izrẹl ụwa ghụn uwo ẹmha. Bịdi ụḅenhi Sạmụẹl mọ: ‘Areelhe phọ ukitonom bọ iyira ọmoogh ni ruwo ẹmha. Miteom oniin uwo ẹmha ụngo aani iyoor.’ Ịpe bịdi ọghaaph bọ iḍighi ni ịdi olhoghi ạ Sạmụẹl ụ́ḅaal. Esi ịduon phọ, ạ Sạmụẹl ạaḅereghi ạḅenhi a Jehova, kụ a Jehova ạḅenhi nyọdi mọ: ‘Awe phọ rughel ghan ịmhi, kạ́na. Ḅẹnhi bịdi mọ bịdi kọmoogh ni uwo ẹmha kụolo uwo ẹmha phọ kạḅenhi ni bịdi oḍighi ạraraar dị ẹbugh iboom.’ Ghạlhamo r’ịduon phọ, awe phọ ụḅem mọ: ‘Ọoḅaghamhi ólho. Ụngo iyoor uwo ẹmha!’

A Jehova ạḅenhi Sạmụẹl mọ oye dị oghol mọ Sọl kụ kaḍighi ọḅel uwo ẹmha Izrẹl. Esi ịduon phọ, mem dị ạ Sọl ạghi ophogh ạ Sạmụẹl ẹpe Remạ, ạ Sạmụẹl ạsighe ni elo aaduom ẹmhu ạ Sọl oḍeenhaan mọ mọma nyọdi oḍighi uwo ẹmha.

Ạ Sạmụẹl aakpomhoghi we phọ Izrẹl oḍeenhaan ạbidi uwo ẹmha phọ, kụolo bịdi ụ́miin Sọl. Nạ alegheri ni ịyaar phọ eḍighi bọ kụ ụ́miin bọ Sọl? Ọdi ạaghian esi dị ạraraar edi. Ọmhiin bọ Sọl, umiteom ni nyọdi ogbo awe phọ. Mem mọ omiteom bọ Sọl ogbo awe phọ, odị kụ aphoph apu oomo awe phọ. Ọdi ạmhaar kẹn ni ạnhighe. Ạ Sạmụẹl ạḅenhi we phọ mọ ‘Ịporono oye phọ a Jehova mạsaḅar bọ.’ Ịphen phọ iḍighi ni ịdi olhoghi awe phọ ạḅaal.

Ẹḅel amem mọ, Uwo Ẹmha phọ Sọl aḍighi ghan ni ịpe a Jehova ạghaaph bọ dị eego esi ạ Sạmụẹl. Kụolo ẹsighe rẹki bịn ọdi anmia. Esi ọmaam, ḍiniin aḍio ạ Sọl asopha ọphighiron ẹkia dị ísi nyọdi, loor esi dị ạ Sạmụẹl aabinya ọghi ọteeny ọdi. Ạ SạmụẹI ạḅenhi nyọdi eeghe mem mọ ạmhiin bọ? Ọdi ạḅem mọ: ‘Nạ mụnaghanan a Jehova.’ Ạ Sọl ạtuugha ni ịyaar esi ịpe emite bọ ḍụghum?

Ẹnhon amem dị ạ Sọl ạghi eenhan awe Ạmạlẹk, ạ Sạmụẹl ạḅenhi nyọdi mọ ạze oomo awe phọ. Kụolo ạ Sọl ạwilhe ni Uwo Ẹmha phọ Ạmạlẹk oghol bọ mọ Egạg. Ịphen phọ iḍighi ịdi a Jehova ạḅenhi Sạmụẹl mọ: ‘Ạ Sọl mụwilhe ịmhi kụ rạ́naghan ghan ịlo mị ạghaaph.’ Olhoghi ạ Sạmụẹl eeph ni kụ ạḅenhi Sọl mọ: ‘Loor ịduon nạ mạwilhe bọ ọnhaghanhan ghan a Jehova, ọdi kạsaḅar ọnhon uwo ẹmha.’ Kụolo ịduon ạ Sạmụẹl rạḍua bọ, ạ Sọl asiph ni eekunha ạsuoma phọ ạ Sạmụẹl, kụ ạsuoma phọ ạphaaru. Ạ Sạmụẹl ạḅenhi Sọl mọ: ‘A Jehova mạsighe ịtooghi phọ ḍịghaagh ạna.’ A Jehova kạngo ịtooghi phọ oye dị kạpomoghian kụ ạḅilhe ạnaghanhan ghan nyọdi.