A Devid Rạ Sọl

A Devid ạkpar bọ apu a Golạyạt, Uwo Ẹmha phọ Sọl aḍighi ni nyọdi oḍiemhiom awe ẹgham ọdi. A Devid eenhaan ni Sọl ịbadi ạraagham kụ ạkpar ghan apu. Ịpe phọ iḍighi ni ịdi aḍien a Devid eelheghaany. Tọrobo amem dị a Devid ạghi ee ẹgham arigheel, ạnmariir phọ umite ghan ni ọgher ịḅa ọḅilhe ọmhoor sụor. Bịdi ụmhoor ghan mọ: ‘Ạ Sọl mạze sịmuunir awe, kụolo a Devid mạze sịmuunir ạsimuunir awe!’ Ịphen phọ iḍighi ni ịdi ạ Sọl ạlhogh ḍien Devid kụ ạwa ghan reten oghiigh ọdi.

A Devid ạmaar oti ọne agey. Kụ ḍiniin aḍio dị ọdi ratianhaan Sọl ọne phọ, uwo ẹmha phọ Sọl ạsighe ni ọsoph aroph Devid, kụolo ọdi ạgbol li kụ ọsoph phọ agim iikpe. Ịpe reten, ạ Sọl ạḅilhe ni ạwa ịnhon areten oghiigh a Devid. Esi ịduon phọ, a Devid asuma ni aḍigh elhegheḍum.

Ạ Sọl ạpham ni 3,000 awe ẹgham ạghi ọwaam a Devid. Kụ ạghi aḍigh epogh aḍighiigh dị a Devid r’awe phọ ọdi ạaghian. Awe phọ a Devid uupholha ni ọḅenhi Devid mọ: ‘Ẹphen phọ eepoogh dị nạ kakiigh Sọl.’ A Devid ạasophoghu ni atuman Sọl kụ asoph ạsuoma ạnyu phọ ọdi, kụolo ạ Sọl ólhegheri. Olhoghi a Devid eeph ni loor ịduon ọdi asoph bọ ạsuoma phọ ạ Sọl, aḍighi bọ uwo ẹmha dị a Jehova kụ ạma ni. Kụ ọdi ómheera mọ awe phọ ọdi oḍighi ịyaar Sọl. Ạ Sọl romite kụ a Devid ạlo ạmhagh nyọdi kụ ạḅenhi nyọdi mọ ọno ạmhoogh ni eepoogh oghiigh ọdi. Etigheri ịphen a Devid aḍighi bọ, bịn ạ Sọl ọ́wilhe ni Devid.

Ẹnhon amem, a Devid r’ọbumoony umor ọdi dị oghol mọ Ạbisạị ụusophoghu ni oḍigh esi dị awe ẹgham ạ Sọl rạ Sọl odi kụ ọmhiin dị Ạbnạ, ạkpe bọ oghoph ạ Sọl, r’oomo awe phọ rọnaanhi. Ạbisạị ạḅenhi Devid mọ: ‘Ẹphen kụ eepoogh dị yira ọmhoogh oghiigh ọdi! Meera mị ukiigh nyọdi.’ Kụolo a Devid ạḅenhi mọ: ‘A Jehova kụ kạliom Sọl. Ọsighe ọsoph phọ ọdi r’izoki ạmuum mọ ọdi bịn ọḍua.’

A Devid ạghi ni ạsiiny ẹeḅaraph dị etuman esi phọ ạbuo ạ Sọl odi bọ, kụ ạlo mọ: ‘Ạbnạ, uḍighi ika kụ nạ óghoph bọ uwo ẹmha phọ? Izoki ạmuum mọ r’ọsoph phọ ọdi edi ẹghen?’ Ạ Sọl ạlhogh ni elhegh ẹḍogh a Devid kụ ạḅem mọ: ‘Nạ ụmhoogh ni eepoogh oghiigh ạmhi, kụolo nạ ịmhi úghiigh. Mị mạkar alegheri mọ nạ kụ kaḍighi uwo ẹmha Izrẹl.’ Ịpe reten kụ ạ Sọl aḅula olhoghi otu ọdi. Ghạlhamo r’ịduon ạ Sọl ạlhogh bọ Devid ḍien, awe ụrol li sịphe otu phọ ạ Sọl dị ọphomhoghian Devid.