Ịkaraph Phọ Uwo Ẹmha Phọ Devid Aḍighi Bọ

Ạ Sọl amhugh bọ, a Devid aḍighi ni uwo ẹmha. Mem mọ ạmuphe phọ, a Devid mạmhan 30 ạsia. Ḍiniin aḍio dị a Devid odi ạnyu otu ọdi, ọdi ạmhiin ni ạnhir dị ạmhaar ạnhighe dị oghol mọ Bạtsibạ. Ạ Bạtsibạ phọ ạnhir oye ẹgham a Devid dị oghol mọ Yurạyạ. A Devid arom ni mọ ọghi ọmhagh Bạtsibạ, kụ ịyal ạbidi ọrolhan esi. Ạ Bạtsibạ aamor ri kụ a Devid ạkparagha ghan ạaghi ịkaraph phọ ọdi. Ọdi ạḅenhi oḍiemhiom awe ẹgham mọ ọdi mọ ạsighe Yurạyạ aseere risigh awe ẹgham mọ kụ ọwilhe oginha ọdi. Ịpe phọ iḍighi ni ịdi oghiigh a Yurạyạ kụ a Devid aphin Bạtsibạ. Mem mọ ạmuphe phọ, a Devid mạtooghi ni ịbadi ạsia.

A Jehova ạmhiin ni ịkaraph phọ a Devid maḍighi bọ. Ọdi kaḍighi ika? A Jehova arom oyil ọdi dị oghol mọ Netạn ọghi ọteeny a Devid. Kụ a Netạn ạghi ạḅenhi Devid mọ: ‘Oniin ọolha ạrol li dị ạmhoogh ịbadi iyool ịga, kụ oniin uwo ekulhom ạrol kẹn ni dị ạmhoogh oniin oyool ọga dị ọdi ạphomhoghian iboom. Kụolo mem dị ọolha phọ rạwa ọga oḍighinhom ịyaar, ọdi ạghi ghụn ạsighe oniin oyool ọga phọ uwo ekulhom mọ ạmhoogh bọ kụ aḍighinhom ịyaar phọ ọdi rạwa bọ.’ Ịpe a Netạn ạghaaph bọ iphin ni olhoghi a Devid, kụ ạḅem mọ: ‘Ọolha phọ ọphon phọ ạkpe oghiigh!’ Pọ kụ amem dị a Netạn ạḅenhi Devid mọ: ‘Nạ kụ ọolha phọ!’ A Devid aḅonyonhu ni azuan, kụ ạḅenhi Netạn mọ: ‘Mị mạpioman a Jehova.’ Ịkaraph phọ ịphen phọ ịkom ni ịiḅaghamhi ẹngo Devid r’eghun otu phọ ọdi. A Jehova ạlhiom ni Devid kụolo óghiigh nyọdi loor esi dị ạgba agey ạḅilhe asooromhi loor.

A Devid ạwa ni ọlhoghonhaan a Jehova otu ịiḅereghi, kụolo a Jehova ạḅem mọ ọony ọdi dị oghol mọ Sọlọmọn kụ kạlogh otu ịiḅereghi phọ. Esi ịduon phọ a Devid amhiigh ni ookolhobian ạraraar dị Sọlọmọn kạsighe ạloghom otu ịiḅereghi phọ, kụ ạḅem mọ: ‘Otu ịiḅereghi phọ a Jehova kạbugh ni iboom, kụ ạ Sọlọmọn ọbumoony. Esi ịduon phọ, mị kạloghonhaan ni nyọdi ḍịghaagh ookolhobian ạraraar.’ A Devid amiteom ni iboom ikpoki dị kọloghom otu phọ, aakolhobian we dị koḍighi oḍighi phọ, aakpomhoghi gol ra silva, kụ ạḅilhe agho ireeny asida ạ Tạyạ rạ Sạịdọn. Mem dị rẹkpul dị a Devid kamugh, a Devid ạngo ni Sọlọmọn ḍịnya dị ẹpham ịpe ogbiighi bọ ọlhogh otu ịiḅereghi phọ. Ọdi ạḅem mọ: ‘A Jehova kụ aḍighi ịdi mị ạge ịphen phọ aseenhaan nyịnha. Kákiilhaan, a Jehova kạlhoghonhaan ni nyịnha ḍịghaagh. Kpọ oḅio kụ ạghi aḍighi oḍighi phọ.’