A Jehova Aḍeenhaan Jona Ọkparam

Awe dị ọrol egbogh ẹmha Asiria dị oghol mọ Niniva, uḍighi ghan ịkaraph ạraraar. Kụ a Jehova arom oyil ọdi dị oghol mọ Jona mọ ạghi Niniva ạḅenhi we phọ mọ ọwilhe ịkaraph ạraraar phọ bịdi roḍighi bọ. Kụolo kpạripe r’ọghi, a Jona aḍigh ụnwunyaru dị rạki Tạsis.

Mem dị ụnwunyaru phọ anyeenhe Tạsis, ọgbagara oghim aghim ni kụ abukiilhom mọ omhiigh oghiilaan. Bịdi ụmhagh ni rụmhugh phọ ạbidi kụ opuru ghan mọ: ‘Eeghe kụ rẹkom bọ ịphen phọ?’ A Jona ạḅenhi bịdi mọ: ‘Mị kụ ụkom bọ ịiḅaghamhi phọ. A Jehova urom ịmhi dom, kụolo mị akiil rasuma. Iroph ịmhi esumeeny sịphe ọphiiny phọ, bịn ọphiiny phọ kạpo ni.’ Abukiilhom mọ úmeera uḍighi ịpe a Jona ạḅenhi bọ bịdi, kụolo a Jona ạghiom ni ghisigh ạkpaariom ghan bịdi. Ekureriom mọ, bịdi uroph ni Jona osumeeny sịphe ọphiiny phọ kụ ọphiiny phọ ạpho.

A Jona ạsighe mọ ọno kamugh ni mem mọ ọdi raḅi bọ. Esi ịduon phọ, ọdi ạmhagh ni a Jehova, kụ a Jehova arom egbogh ena dị ẹghi ẹmin Jona, kụolo íkiigh Jona. Sịphe olhoghi ọkuruḅaka ena phọ, a Jona ạaḅereghi ni ạḅenhi a Jehova mọ: ‘Mị aguanhaan ọnhaghanhan ghan ạna oomo amem.’ A Jehova aghoph ni Jona sịphe ọkuruḅaka ena phọ esi ịraar aḍughul otu kụ ạḅilhe aḍighi ịdi ena phọ ẹghi ọgbal ọphiiny phọ kụ ekuḅa Jona emiteom.

Sịen a Jehova mạphel bọ Jona, nạ ragbi mọ a Jehova kạḅilhe ni atom Jona ọghi a Niniva ḍụghum? A Jehova ạḅilhe ni ạḅenhi Jona mọ ạghi Niniva. Kụ egi phọ, a Jona ạghi ni ạḅenhi we phọ a Niniva roḍighi ghan bọ ịkaraph ạraraar mọ: ‘Esi 40 aḍughul otu, kopiemhi ni Niniva.’ Ịyaar dị olhoghi úseere imite ni. Awe phọ a Niniva ụnaghan ni dom mọ kụ onmia. Uwo ẹmha phọ a Niniva ạḅenhi we phọ ọdi mọ: ‘Ịmagh Ẹnhaan kụ ẹlhom nyọdi ọsar ọwilhenhaan kụ ekiton. Eeni sịen ọdi kạsar ri ụwilhenhaan iyira.’ Mem dị a Jehova ạmhiin mọ awe phọ mokiton, ọdi ạsar ri ạwilhenhaan bịdi.

A Jona ạghagh ni olhoghi loor ịduon a Jehova ạsar bọ ạwilhenhaan we phọ a Niniva. Nạ ragbi mọ ị̋kpe dị a Jona phọ ọphon a Jehova ạnma bọ ighirigiir kạḅilhe ạnma aani ighirigiir we phọ a Niniva? R’ọghagh olhoghi a Jona amite ni ẹmha phọ kụ ạghi ạrol ẹeḍian ẹezupha ote. Mem dị ẹezupha ote phọ emhugh, imhiigh ni ophin olhoghi a Jona. Esi ịduon phọ a Jehova ạḅenhi nyọdi mọ: ‘Nạ ạmaghamhi mạar iboom ẹezupha phọ ẹphen phọ apuemhi we phọ a Niniva. Mị maḍeenhaan bịdi ọnma ighirigiir pọ kụ ịyaar phọ bịdi okpetenhaan bọ.’ Ikpo ọnhu phọ a Jehova rẹma ghan eeghe? Rẹma ghan mọ awe phọ a Niniva kụ ụmhan mạar opu ịreeny r’ịizupha.