ESI ỊTUUGHA PHỌ 55
Ọokpaany A Jehova Aghoph Ni Hẹzẹkạyạ
Eelhe phọ Asiria mọkpar opu ḍioph phọ arughunhughun phọ Izrẹl. Kụ nyịidipho uwo ẹmha phọ Asiria, a Sinakrib, rạwa ozuoghom ịyal phọ arughunhughun phọ a Judia. Ọdi amhiigh ni ọkpar opu ạramha a Judia. Kụ ẹmha dị ọdi ạkar ạwa ọsighe pọ a Jeruselem. Kụolo a Sinakrib ólhegheri mọ a Jehova kụ rakoph Jeruselem.
Ạ Hẹzẹkạyạ aḍighi bọ uwo ẹmha a Judia ạkpe ni Sinakrib iboom ikpoki pịdi ọdi ạbilhe Jeruselem. A Sinakrib ạar ri ikpoki phọ kụolo ạḅilhe ni arom we ẹgham mọ ọdi, ọghi ozuom a Jeruselem. Awe a Jeruselem ụkar kụ ọmhoogh oghiilaan loor ịduon awe Asiria phọ rotu bọ ozuom ạbidi. Ạ Hẹzẹkạyạ ạḅenhi ni we phọ mọ: ‘Kẹ́moogh oghiilaan. Ghạlhamo r’ịduon awe phọ Asiria ọmhoogh bọ ni ịikpo, a Jehova kụngo ni iyira ịikpo dị epu ịpe ạbidi.’
A Sinakrib arom ạ Rạbsạkạ mọ ạghi ạgilaam we phọ a Jeruselem. Kụ ạ Rạbsạkạ ạghi ni ạmheera eḍighom a Jeruselem kụ ạlo ghan mọ: ‘A Jehova kátue ịlhoghonhaan inyinha ḍịghaagh. Kémeera ạ Hẹzẹkạyạ iikelheghi inyinha. Ẹmhugh ílo dị ketue ịphel inyinha ẹsighe ḍịghaagh ayoor.’
Ạ Hẹzẹkạyạ apuru ni a Jehova ịlo oḍighi, kụ a Jehova ạphagharanhaan mọ: ‘Ịpe ạ Rạbsạkạ ạghaaph bọ kị́ngo nyịnha oghiilaan. A Sinakrib kátue ạkpar apu Jeruselem.’ A Sinakrib ạge ni ḍịnya ạghiom ạ Hẹzẹkạyạ, kụ ạḅem mọ: ‘Kítoph ịnyaam anyinha esi ee ẹgham r’ayoor. Ikughuron eghuugh ẹmha phọ yoor uḍigh, ịdi eḍighi bọ a Jehova kátue ịphel inyinha.’ Ạ Hẹzẹkạyạ ạaḅereghi ni ạḅenhi a Jehova mọ: ‘Seseeny Jehova, ụphel iyoor pịdi oomo awe aḅirinhi phọ olegheri mọ nạ bịn kụ egey Ẹnhaan.’ A Jehova ạḅenhi ạ Hẹzẹkạyạ mọ: ‘Mị kakoph ni Jeruselem, kụ uwo ẹmha phọ Asiria káḍigh Jeruselem, loor esi dị mị kụ ụmhoogh ẹmha phọ.’
A Sinakrib aḍuom olhoghi mọ mọony amem, ọdi kụ kạmoogh Jeruselem. Kụolo ḍughul phọ ạḍiphe phọ, a Jehova arom ni oniin ọokpaany ọdi ọghi ọze awe ẹgham mọ Asiria. Kụ ọokpaany phọ aḍigh sịphe awe ẹgham mọ Asiria odi bọ kụ ạze 185,000 awe ẹgham mọ. Mem dị a Sinakrib ạmhiin mọ ạbugbagara awe ẹgham mọ ọdi momhuughu, ọdi aḅonyonhu ni azuan kụ anyeenhe ogheel. A Jehova aghoph ni ạ Hẹzẹkạyạ ra Jeruselem ịdipho ọdi aguanhaan bọ. Ọḅem mọ nạ ụrol aani Jeruselem mem mọ ọpo phọ, nạ muḍuom aani ni olhoghi a Jehova ḍụghum?
“Ọokpaany phọ a Jehova atughan r’awe phọ ạbuphe rokiilhaan bọ nyọdi, kụ rạtagharan ghan ni bịdi.”—Psalm 34:7