A Jehova Arom Jerimạyạ Ọghi Ogbeelhom Adom Ọdi

A Jehova ạsaḅar a Jerimạyạ oḍighi oyil ọdi ẹpe Judia. Ọdi ạḅenhi nyọdi ọghi ogbeelhom adom ọdi ọḅenhi awe phọ, r’ọphurom ạbidi rụru mọ ọwilhe oḍighi ịkaraph ạraraar. Kụolo a Jerimạyạ ạḅenhi a Jehova mọ: ‘Jehova, mị ọbumoony. Kụ mị úlegheri ịlo ọḅaanhaan awe phọ.’ A Jehova ạḅenhi ni nyọdi mọ: ‘Kạ́moogh oghiilhaan. Mị kạḅenhi ni nyịnha ịlo ọghaaph, kụ ạḅilhe ạlhoghonhaan nyịnha ḍịghaagh.’

A Jehova ạḅenhi a Jerimạyạ mọ aakpomhoghi oomo ikumor awe phọ a Judia, kụ aḅom izoki dị oḍighinhom ạḅay ghisigh ạbidi kụ ạḅenhi bịdi mọ: ‘Ịduon kụ ẹdi kopiemhi Jeruselem.’ Mem dị a Jerimạyạ aḍighi ịpe a Jehova ạḅenhi bọ nyọdi, ikumor awe phọ ụghagh ni olhoghi. Ọpinyon rịkia dị oghol mọ Pạsọ ạgurogh ni a Jerimạyạ kụ ạlhogh nyọdi olhool. Ḍughul phọ ạḍiphe phọ, a Jerimạyạ órue orelhe. Mem dị ạḍiroor ẹḅaal, ạ Pạsọ ạwilhe ni a Jerimạyạ. Kụ a Jerimạyạ ạḅem mọ: ‘Mẹnighe ni. Mị kátue mụn ạkiom ghisigh agbeelhom dom mọ ạḍien phọ.’ Kụolo a Jerimạyạ ạkar ri ạwilhe ọghaaph ghan adom mọ a Jehova ḍụghum? Eeye. Mem dị a Jerimạyạ ạḅilhe bọ ạatughian, ọdi ạḅem mọ: ‘Adom mọ a Jehova ẹkigh nịan dị reemor loor ạmhi. Mị kátue ạbilhe ọghaaph ghan adom mọ.’ Esi ịduon phọ, a Jerimạyạ ạghiom ni ghisigh ạphur ghan we phọ rụru.

Ẹsighe rẹki, awe phọ a Judia ụmhoogh ni ọnhon uwo ẹmha. Kụolo ạbupinyon rịkia phọ r’ariil ọkpe phọ ụghiom ni ghisigh oghel ghan dom mọ a Jerimạyạ. Esi ịduon phọ, bịdi ụḅenhi buḍiemhiom mọ a Judia mọ: ‘Oye phọ ọphon phọ ạkpe oghiigh.’ A Jerimạyạ ạḅenhi bịdi mọ: ‘Eḍighi mạar dị nyinha ighiigh ịmhi, pọ nyinha ekiigh oye dị olhogh úsoor. Ịphen mị rịḅenhi bọ inyinha ikpo ọnhu a Jehova, kị́lo ạmhi.’ Mem dị abuḍiemhiom mọ ọnhaghan bọ ikpo ọnhu phọ a Jerimạyạ, bịdi ụḅem mọ: ‘Oye phọ ọphon phọ ọ́kpe omhugh.’

A Jerimạyạ ạghiom ni ghisigh agbeelhom ghan dom mọ a Jehova, kụ ịphen phọ ịghagh ni ilhoghi abuḍiemhiom mọ. Kụ bịdi ọḅenhi uwo ẹmha phọ mọ aghiigh a Jerimạyạ. Uwo ẹmha phọ ạḅenhi we phọ mọ bịdi oḍighi a Jerimạyạ ịlo ẹḅeraan bịdi. Kụ awe phọ ọsighe a Jerimạyạ osumeeny ghuḍia dị ọposo odi, mọ ạrol pạ phọ amhugh. Ịduon osumeeny bọ nyọdi bịn ọdi amhiigh oḅi.

Oniin oye dị raḍighi ghan oḍighi sịphe otu uwo ẹmha phọ dị oghol mọ Ibẹdmẹlẹk ạḅenhi uwo ẹmha phọ mọ: ‘Abuḍiemhiom mọ mosumeeny a Jerimạyạ olhoghi aghuḍia. Yira ọwilhe nyọdi pạ phọ, kamugh ni.’ Kụ uwo ẹmha phọ ạḅenhi Ibẹdmẹlẹk mọ ạpham ịraar dị awe ạghi sịphe aghuḍia phọ ạkpaaghi a Jerimạyạ aphunhe. Ẹkpe ni dị yira kọtuughaany aani a Jerimạyạ. Yira kúmeera mọ ịyaar isophoghom iyira ogbeelhom iiḅi ịinhaghan phọ.