ESI ỊTUUGHA PHỌ 58
Uphiemhi Ni Jeruselem
Awe phọ a Judia, ẹgba gbạ amem ụwilhe ghan ni a Jehova ọoḅereghi ịkaanheen ạrumhugh. Kụ esi ịbadi ạsia, a Jehova ạkparagha ghan ni ọlhoghonhaan ạbidi ḍịghaagh dị eego esi ariil phọ ọdi. Kụolo bịdi ụ́naghanhan ghan riil phọ a Jehova. Bịdi ụḅilhe kẹn ọgilaam ghan riil phọ. A Jehova aḍighi eeghe osiemhi eekunha ịiḅereghi ịkaanheen ạrumhugh phọ?
Uwo ẹmha ạ Bạbịlọn dị oghol mọ Nebukạdneza, azuoghom ghan ni reelhe kịrokiro kụ ạkpar ghan apu. Ọdi azuom ni Jeruselem kụ asiph uwo ẹmha phọ Jehoạkịn, r’awe eghun a Juda, r’ikpolhom awe phọ r’ạbuo ẹgham mọ ḅịlhe r’awe iiḍighi phọ ọdi kụ ạpham agheelhom Bạbịlọn. Ọdi ạḅilhe kẹn ni ạsigheogh oomo aruphua phọ ẹrol bọ sịphe otu ịiḅereghi phọ a Jehova, kụ ạsighe Zẹdẹkạyạ aḍighi uwo ẹmha a Judia.
Ẹḅel amem mọ ạ Zẹdẹkạyạ aḍighi bọ uwo ẹmha, ọdi aḍighi ghan ni tọrobo ịyaar dị a Nebukạdneza ạḅenhi nyọdi. Kụolo areelhe phọ okitonhom bọ nyọdi r’ariil ọkpe phọ uromha nyọdi mọ ọdi kụ́naghanhan mụn a Nebukạdneza. Kụolo a Jerimạyạ ạphur ri nyọdi rụru mọ: ‘Eḍighi mạar dị nạ ụ́naghanhan mụn a Nebukạdneza, pọ awe a Judia komuughu ni, kụ ịgbakuro r’ạreezegh ẹḅilhe ẹtol.’
Ạ Zẹdẹkạyạ rọtooghi esi ọphaanya ạsia, bịn asopha mọ ọdi kạ́naghanhan mụn uwo ẹmha phọ ạ Bạbịlọn, kụ ạlhom mọ uwo ẹmha Ijipt ạlhoghonhaan nyọdi ḍịghaagh. Ịphen phọ iḍighi ịdi a Nebukạdneza arom we ẹgham mọ ọdi ọghi ozuom a Jeruselem. A Jerimạyạ ạḅilhe ni ạḅenhi ạ Zẹdẹkạyạ mọ: ‘A Jehova ạḅem mọ eḍighi mạar dị nạ aghughuron eghuugh ẹmha phọ mọ awe ạ Bạbịlọn oḍigh, nạ r’awe ẹmha phọ kómugh. Kụolo eḍighi mạar dị nạ ụ́naghanhan ịphen a Jehova ạghaaph bọ, pọ awe phọ ạ Bạbịlọn kọsu Jeruselem kụ osiph nyịnha ọlogh ikoli.’ Ạ Zẹdẹkạyạ ạḅem mọ: ‘Mị rákughuron eghuugh phọ!’
Mem dị ạlha r’ạpakiri reten, awe phọ ạ Bạbịlọn uḅom ni iikpe phọ a Jeruselem, kụ ọlhogh nịan ẹmha phọ. Bịdi ụsu ni otu ịiḅereghi phọ ọḅilhe ọze ịbadi awe. Kụ osiphi sịmuonir ogheelhom Bạbịlọn.
Ạ Zẹdẹkạyạ asuma ni, kụ awe ẹgham mọ ạ Bạbịlọn ophorogh nyọdi osiph mem dị matuman Jeriko, kụ ọsighe ọghi ọngo a Nebukạdneza. A Nebukạdneza ạze ni nmụny ạ Zẹdẹkạyạ ghisigh ọdi, kụ ạḅilhe aḅomoghi riḍien phọ kụ ạlhogh ikoli. Sịphe phọ kụ ẹdi ọdi ạrol amhugh. Kụolo a Jehova aguanhaan ni we phọ a Judia mọ: ‘Oḍual dị ạsia reten, kụ mị ịsighe inyinha aḅulhemhi Jeruselem.’
Eeghe kụ kemitenhaan ịḍoogh phọ awe ạ Bạbịlọn osiphi bọ ogheelhom? Bịdi kọnaghanhan ni a Jehova ḍụghum?
“[Jehova] Ẹnaan Oomo Ịikpo . . . ịiruen phọ ạna esel li ḅịle ọkaraghi igey ni.”—Ogananami 16:7